2 Corintios 2
2
1It'imina ti je awo ka poye'eje japa ka jlomaye ka ijio'wase, kajeyepa ti je awo ka iyoye asjlak'aliye, ka wo 'ate ti ajo'wasepi. 2Siut'itie ka kiak iyo'nase, ka iyoyeta asjlak'aliye'eje, ¿tempi i'nio' jats'ajkanit'ni siuti ja inlajak'i, 'yina ti awoye asjlak'aliye? 3Nakape ti it'imina ti kiak awone ki ip'isinik ti atate'ase, ti je awo ka itienkiujnieye je 'esie, ka 'wina siupa ka woyeyi. ¡Je 'yu'wase'm ka kiak awoyeyi, jlam'ne ka ts'ajkanitie'ni! 'Yina nak je akakiuni, ti siuti po' ni awo ti ts'ajkaj'ni, kiak jiwoyeyi pit inkasajyi'n. 4Siukia ip'isinik ti anajnat ti atate'ase, wuj ti ijliak'ali po' jakayi, paj ti itiet t'e' atojnata'ni. 'Yina siuti kiak iyo, ti ajlo'wase ki ip'isinik ka neyi ts'iji ka kiak awoyeyi, awoye asjlak'aliye, najata jla'am ti awojonk'iye ka'wena' pet ti jlam je awoyi ti wuj ti ts'ama'ase.
Pablo wuj ti ip'ilisi'n siupa teje t'ipi ilia'm
5Ti po' siunie ti iyo injlak'aliye, je sijwanjli ka kiak iwonk'i, kiak jiwoyeyi pit inwikie'eyeyi ti iyoye asjlak'aliye, 'yina ti je kat'aja wat ti asa'am. Siuti awo'ate, “Je kat'aja wat”, kajeyepa ti je awojonk'iye ka iyini'ni ape'e ni jitis iyo. 6'Yina in'lojwa ti jiwoyeyi jitisa' siupa iyoyi, awo'ate 'etsaka ni siunie jiwonayi. 7Jlam'ne 'nakayi, 'esiji ka inkiwaliyeyi'i siupi jitis iyo, ja 'wenajliyi ti janoyeje,#Lc 17.3 'lojwinie'e ka ijiatayiji paka iwoyi ka inka'm ape'e siupi iyoyi, ti tajleje siupi jijliak'ali ti je jlase'. 8It'imina ti ajlo'wase'm ka ekiajlayi'i siupi jiwoyet'iyipi ti 'nelanjie'e, ti wuj ti i'namajayi paka.
9Pajk'ipe ta'a ti kiak awo'nase, ti ajlo'wasepi ki ip'isinik, ti ajejlita ka woyeyi siunie 'eyasanayi ka woyeyi. 10Siuti po' pa ti inkiwaliyeyi'i siupi jitis iyo, sekyi'i jip'elisina', 'yina siupet ti ya'am kia'awo ja sikiwali'yi'i pi jitis iyo, jla'yi ti jap'ilisi'n 'neje peyit. Ka ijiatayi ka jitis poye, awo'ate ene jitieyi'i pi Sijwajieti, ti ap'elisi'n paka, sekyi'i sikiwali'yi'i siupa jitis iyo, lapakawo ti asajme 'esie. 11Ja 'nakayeyi pet siunie imosik ja ke kaskajli ka iyoki ni siunie je 'es iyotaja ka iyoki, jlam'ne kastant'ieje ni siunie jike' iyo.
Pablo je 'yakama ka iwo jlamtikie' yi'i japa Troas
12Ti ajoyeyi siujlieja isi' jle' iyo'ate Troas, ti jayo yamtikie' ti jajwil kiwa Sinia' jlamtis ti ijwil pa Sijwajieti, jlajmiliet ti ayeyi, sek a'yi ti poye ni awo ti sats'ilka ka isijme'n, ka iyo yamtikie'. 13Je 'esiji jla'am ti atankiunieyi'ni ja isiecha Tito, lapakawo ti awo ka 'wi'in. Sekyi'i ti isiowe jlampa iyoyets'i'ni, 'yina anijwejlam'ne japo Sinia' jilis sek ji'wet'e, sekyi'i ti akiep'an ti ata 'niji Macedóniaja.
Pak Sijwajieti ti iyo 'niayija' papo injlojwajnas
14Ijiatayijia'm pa Sinia' ti kiak iyone pa Sijwajieti, ti itiete isia'm siunie jitiejiejwa ni inilane, naka'ne ni siunie ti awaki' jla'yi ti ajoki nak inwak. Sekyi'i isisiets'e pet napo i'nio' ti a'wenkinaja ka intant'iejesi pet ni Sinia', ni siunie iyo ti itiant'iejesi pi Sinia' itijwits'i niwa ajnatis yi' ape'e 'ni ajnat, iyoye'ate siunie jini inkajk'i. 15Nak awok'iate ni incienso ti Sijwajieti yikiajle pi Sinia', siunie jini inkajk'i, jak je iyoyiji siunapo ijioyi ni jijwajieti siu'neje napo ijioyi pet jana 'najlati, iliatk'i nak jini. 16Siunapo ijioyi jana 'najlati, yiji jana 'najlati jini. Jlampet siunapo ijioyi ni jijwajieti, ji'wasankiye pet nak jini. ¿'Yina tempa 'yakajli nak inkijmaye ti kia'iyo? 17'Yina je pini' napo iyo ka wikiniet'aj in'yakane, siuti yameje'n niwa Sinia' jlamtis, kajeyepa ti ijwi'il niwaka ti iyo jikijmayeja'. Jlampet ti sa'am je kiak awoki iyo jlamis, sa'am ti Sinia' ijliuyits'e'm siu'nie awoki, jla'yi ti Sijwajieti jikawosts'e'm, jak je iyoyiji ti awokieta samtikie' ti ajwela niwa Sinia' jlamtis, 'yina je k'iejliyi paka inejyi 'niwa sosikis ka je ijiatak'i jitieyi'i pi Sinia'.
Currently Selected:
2 Corintios 2: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.