2 Timoteo 3
3
Siuniwa jlomas yi' jlaja kiak janwo siunie iyo ni Pablo yamtiyi
1Jla'yi ti 'esiji ka'najane paka wone siuniwa jlomas yi' jlaja, ti sam ti awoki niwa Sinia' jlamtis wuj ti jansta' ni si'niayi jawoyi. 2'Yina japoye napo ti ja jlamayis jla'am ti janinemijne'n; ja najataja ti ja'noyits'i ti jajwesieyiji'n k'iye jana wikiniet'aj; wuj ti janitoniti'n; ti janjwelis ka anechiyasisa'. Jikalakijnieye jane'ne napo ijia; ja ke ink'iuye napo jiniewot, ti iyotaja'ni jlosikisie'; ja ke iwo'ate napo ijia ti iyo'ni jiwek jinikanitieyeja' ape'e pi ti k'iejliyi, jla'am jajeye; jankakiuyis niwa Sinia' jlamtis; 3ja laja jlemijnayeja'; ja laja jikap'ijliuskiyeja'; jankamtijniejne'n ti jitiej jajnot'ni; ja ke inilayiti siuniwa je isis ti janwoyi ti janen kisie'e; jajwesisa'; wuj ti janta'yi ilia'm ni 'es; 4janlaki napo ijia; ti jank'emijietk'i; ja laja t'ajwejliye ti k'iejliyeyi pi janwoyi; janitoniti'n; janwoyi jla'am siupi itilia kanwoyi, jatojwayeyina'a ts'iji ni Sinia' kaneminis; 5jawoyeyinie'e siunie jawoyi, ti janjwelis ka iwoyisi niwa Sinia' jlamtis, 'yina siunie jikijmaye iyonisi nak ja'nakanit'i ape'e ti jlajma iwo ka ijiatayi ka nakaye jijweye iyo niwa Sinia' jlamtis.
Joskiye napoka i'nio', 'esiji ka anitonitiape'n. 6Napoka tajle siunapo ti 'yuyits'i'ni napo asejnia siunapo lajk'ipa kawoyi ti je to'm ilia'm ti ik'emijietk'i, ti kia'iyo iyoyi ni jike' ti je 'ye'n ilia'm. 7Asejnia siunapo ti je iliyi ti ini'neyasajne'n, 'yina je paj ka ijiatayiji ka intant'ieje ni siunie ijio'we ni ijiatk'i. 8I'nio' siunapo ajwel'ni napoka napo ti netia'n ni jlosik iyo ti 'es, je ika paka iwo, teje'yi ilia'm ni siunie ijiate ti 'es iyoye'ate siupapo i'nio' t'ipi aye'wu'l Janes, siu'neje pa Jambres, ti teje'yi ilia'm pa Moisés t'ipi.#Ex 7.11 9'Yina ji'niayi ja ke into'yi napoka, kajeyepa ti ja wikie'eyeyi napo i'nio' ti ja 'najane pa jawone, jla'yi ti jantant'ieje, ti ja lajak'i pa paka woyi, 'yina ti ne'lias, iyoye'ate papoka aye'wu'l ti times siupapo ajwel'ni.
Siunie ti pajk'i ti jini'neyasane, nak ja aki
10'Esiji ti 'wena je t'iasap'e siunie 'yaka'neyasajnaye iyo, jla'yi siunie awone, siu'neje ni ajalas ka iyoyi, siunie iyo ni itienkiujnieye ti 'es, jla'yi ni awo ti akama, siu'neje ti yimijnaye po', jla'yi ni ijwiye iyo ti ato'm ilia'm ni iyo napo i'nio' ti teje'yi ijyilia'm, siu'neje ti anilayiti ni ijliak'ali iyo. 11Mejla'a ka je 'najane ki iwit'ia iyo ti ape Antioquíaja,#Hch 13.13-52 siu'neje ti a Icóniojo,#Hch 14.1-7 siu'neje ti a Lístraja.#Hch 14.8-20 Wuj ti a'tisk'iji'n siukiwa iyonk'iji japo i'nio', 'yina Saka'niona sijwajiete jakayi.
12Ijiate wikie'eyi siunapo ti jawo ka nekk'i ni Sijwajieti ji'niayi ti tijnajyi, napoka ti wuj ti janilayiti siunie jawone napo i'nio' ti jiwak jane'ne. 13Napoka siunapo ti je isis, siu'neje napo wuj ti iliaki napo ijia, jlam yamjliyi pet ti iyoyi siunie jiwet'ia ti wuj ti je 'es ni tijnats'i. Ijiate janlaki napo ijia, jlam'ne kiak jawoyi siunie jawoyi ti initonisi ni jiwet'ia.
14Wikie'eyi siuniwa jini'neyasanejpe niwaka ti ja ke paja ka leyi ti ja aki, siunie ti ijiate ti je jikakiuni, jla'yi ti intant'ieje, 'yina 'najane pi jiwone siupapo 'neyasant'iyijpe. 15Ataj wunitk'i, ti jiwo kia'leja' ta'a ti 'najane pi jiwone niwa inamtis ti isis, niwaka ti i'neyasane ti je kakiu ni Saka'niona Jesús ti Sijwajieti, jla'yi ti jijwa'a. 16Wikie'eyi niwa Sinia' jlamtis ti t'otataja, ti yi'i ni ji'wet, tajle ni jiyel pi Sinia'. 'Es ka tiwoki inka'neyasajnayeja', jla'yi ka tiwok jlosikie' pa', jla'yi ti 'esi siunie ti je ijyiwiteje siunie ji'niayi ti 'es, jla'yi ti 'yiyasane napo i'nio' ka 'najane siunie 'es ka woyi, 17jla'yi ti iyo jlosikie' ni i'nio' Sinia' jikawo, jla'yi ti 'yiyasa'n, 'yina wakal je tejeyiji'ni ka woyi siuniwa isis ti iyoyi.
Currently Selected:
2 Timoteo 3: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.