2 Timoteo 2
2
Sijwajieti Jesús jika ijiawo
1A'm yas, kima ni Sijwajieti Jesús jikap'ijliuskiye ni yits'e, woye ajweyeja'. 2Siuniwa jipe'yape ti ene jitieyi'i japo i'nio' ti 'loj, ti ajwe'la'm, nak jajwejla'm pet siunapo ti je tikiwitaja, ti ji'we'en ti 'yakajli ti iyoyi, 'nakayijna'a pet ka 'neyasajne'n napo ijia.
3Ti a'm ti Sijwajieti Jesús jika tokists'ia'm, 'esiji ka anilayiti pet siunie awet'ia. 4Ji'we'en siunie tokis ti its'iuye ni jika anechiyas, nak it'imina ti je iyo ka'ye'en niwa wask'i'nelaja iyo napo ti je tokis. 5Siunie i'nio' inito'm, je 'yakajli siunie tena ajnat'e siuti jant'osijyin'ni jiwekie'e. 6Jlampet siunie inkijmayewo, kia'iyojliyi lajk'ipa ka intomik'i'ni ti iyo ka intojw siupuwa jla' puwa jiwomki, kajeyepa ti nak it'imina ti ini'net ti isijme'n. 7Ataj na'yina'a siu'nie awoyi, Saka'niona jlam ti janoye'a'm 'nakayijna'a ti jantant'iek'i wikie'eyi 'niwaka.
8Ataj enayijpe 'ate ti Sijwajieti Jesús iniu kisie'e ti tajli pi a'no', jla'yi ti jla'am ti tajla'm papo David jilist'ipi. 'Naka'ne siu'nie ti awoyi'ni yamtikie', 9'yina nak it'imina ti anilayiti siu'nie iwit'ia iyoyi ti silie'nitieje 'niwa wikijnies 'yiniyi ni i'nio' kalankijieta. Jlampet niwa Sinia' jlamtis je iyo'ate awoyi ka t'aka poye. 10Lapakawo ti 'esiji wek ni iyo ni anilayiti, 'yina ti je aniwone wek. Napoka jla'am ti ja 'esieyi, napoka napo Sinia' isi'mik'i ti ini'nopijieteje pi Sijwajieti Jesús kan'we'n pet siojona jijwajieti ti jlonitieyi po' ti laj jlaja.
11Jlam je iyo ni inamtik ti iyo'ate:
Siuti siliaye iniuyi wita'm pa Sijwajieti ti 'ya'al,
kiak jayoki'ijyi pet siuti 'wasa'n ja kas'wasajne'n pet.#Rom 6.8
12Siuti kia'iyo anokieje siunie iyo ti inilayiti,
kiak jawo je ijiat ka je iwiekiap yi'i pi ji'wet ti iyo anechiyasa'.#1 P 5.1
Jlampet ti jayok'iate, “Je sitiant'ieje”,
kiak iwoyeyinie'e pet 'ate, “Je sitiant'ieje napoka”.#Mt 10.33; Lc 12.9
13Jlampet ti je ijiatk'i siunie awoki,
jlam je paj kanleyi siunie iyo, ni'ne ka jikiecha 'noti siunie iyoyi,
kajeyepa je ti'wena ka kiak iwo ka inilaki ka aniwojwa'n sintiye.
Inkijmayewo ti Sinia' inka'a
14'Niwaka ti ja ayiji k'iye napo i'nio', jla'yi ti ja 'ejie'ne ka leyi siunie iniwonisi ti iniewitis'ni, ya'am ene jitieyi'i pi Sinia'. Je ikajliji paka 'esie, 'wenajliyi ti ikajyi'n siunapo its'iuye, yiyi ts'iji ti je ikaja paka ji'niayi inwoneje. 15Ká ajlasat isia'm siunie jiniwone, 'nakayijna'a ti ja lajak'ipa ti jawoyi 'ajwejliye jitieyi'i ni Sinia'. 'Wenajliyi ti ja inkaja'a'm, kajeyepa ti jan'we'en ti jawoyi naka atankiujnieye ti tijnajyi ti jiwoyi niwa jlamtis ti ijiatk'i. 16Lesaniji siuniwa amtis jiwone, ja ke niwakaye siuniwa jlele pet 'ni ajnat, ti laj lajaye. 'Yina je int'ayiji'ni siunapo i'nio' ti jlamtis kia'iyo jlam yamjlijia'm ni siunie je 'es ti iyoyi. 17Siunie jika'neyasajnaye iyo'ate siunie inlaye siunie ti laj jikieye ti yajme'n. Kiak jiwet'ia iyo ja Himeneo,#1 Ti 1.20 siu'neje ja Fileto. 18Ijlie'en siunie ijiatk'i, ti ijwilis ka pajak'i ka inek 'nijiye siunie sinijijwiye iyo ti janiukk'i kisie'e ti atajlaja'm ni a'no'. Tempi it'imina ti je 'yaka paka inwo siunapo Sinia' jilis, kajeyepa ti je 'yakakiuyis. 19'Yina jlam'ne siunie Sinia' 'yite'e ape'e siunie ilisane je k'ajts'e; siuniwa inamtis yi' ape'e iyo'ate, “Saka'niona itiant'ieje siunapo jika kia'lis”,#Núm 16.5; Jn 10.14; 1 Co 8.3 siu'neje ti, “Wikie'eyi siunapo yite'n ni Saka'niona, 'esiji ka inleyi ni siunie je 'es”.
20Ji'we'en siojona 'wuk ti wuj, 'loj niwa inkijmatis yi kiajwe. Je niwakata wikinie maja ti 'najli, wikiniet'aj jana yi kiajwe, 'yina po 'neje niwa ijia inkijmatis, niwaka a'la' t'ejes ijia niwa isat. Siuniwa isis tejeye pet siunie ti je iniliak siu'neje ti tisiayejamk'i, jlampet siuniwa je isis tejeye pet siuniwa jlele jiniliaja'n. 21'Yina kia'iyo ni i'nio' iyojonk'iye ka inkijmape'n ni Saka'niona, ti jla'am pa Sinia' itiejieta ka kia'iwo ti ilisa'n. 'Esiji ka initoskijiete ni siuniwa wask'i'nelaja ti je isis. 'Nakaye pet ti ja titiejieta niwa isis ka iwoyi jikijmayeja'.
22Jak je iyo ti kiak awo, joskiye ti a'm ti jwemik'ia'm siunie yiji napo ijia jwemik. Majk'i ni siunie tijnajyi. Ke ekiejiet ni atankiujnieye ti 'es, siunie emijnaye kia'iyojliyi, siunie jiwo ti jikama. Wikie'eyi, a'm siu'neje napo ti je iliyi ti yite'n ni Sinia', siunapo jlosikis 'najleje'n. 23Ká ak'iuk'i'ni siuniwa inamtis jiniliaja, 'yina 'najane ti je 'es paka intajle, 'wenajliyi ti itiejietk'i wita'm napo i'nio'. 24Siunie Saka'niona jikawo je 'yu'we ka inilanejen'ni napo ijia. 'Esiji ka wujwa ka inemi'n napo ijia. Ja'naja'n 'nakayi ti ja'neyasajne'n pet napo ijia, jla'yi ti 'esiji ka nakaye siunie ti janilayiti ti k'iejlitieje pa iyo napo i'nio'. 25Ja ke initonit ni i'nio', ti iyoyeta jlosikie' siunapo teje'yi ilia'm. Janejejwijyi'n pet k'iye ka Sinia' inoyeje ka wo 'niayija napoka kawoyis jlosikis ink'iejyisa', jla'yi ka intant'ieje ni siunie ti ijiatk'i, 26'yiniye ka jiwekie'eja ka int'ok'ijyi'n, ka ini'yakajni ti yiji jana jikatsala ni imosik ti iyotaja paka iwone, siupi iyo kawone.
Currently Selected:
2 Timoteo 2: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.