2 Corintios 3
3
1Siuti ji'yena ki i'lij awone, ent'a jiwoye'ate, “Siunie Pablo iniwunit, siu'neje napo jla'yis, iyo ni siunie iniwonisiji'ni.” Ent'a jiwoye'yi 'ate, “Na Pablo siu'neje napo jla'yis je 'esiji ka poye paka imp'esinikie' ka jikio' jleliye ka in'wenkints'e'm, iyo napo ti kia' iyoyetaja, ti jantajle napo si'lijwas, ja 'nakayeyijna'a ti ja kasts'ajane ti jlam je iyoyisi ti napoka ti Sinia' jikawos, sek jane'yi jasimajape ilia'm.” Jlampet ti atajlayeta'ase'm, ¿ent'a jiwoyeyi ka 'yejlayi'ase'm paka imp'esinikie' ka sikio' jleliye, ja 'nakayeyipe siunapo i'nio' ti jajioki, ti jayoki samtikie' niwa Sinia' jlamtis, ja ke kaskakiu ti sa'am ti Sinia' jikawosts'e'm, sek jane'yi ka inkimape selia'm?
2'Yejne'n, jayo'ate ti asa'am ti sikio' jlele'ase'm ti yiji niwa sosikis, lajk'ipa jikiechaye impesinikie', 'yina wikie'eyi napo i'nio' kas'we'en, jla'yi ti itiant'iejts'e. 3'Yina je istie', ti paka Sijwajieti ti 'yiti' pak imp'esinik ti ijliuyets'e'm ka itiunieje napo i'nio'. Je imp'esinik jikie' t'e' paka inkiene ti 'yiti', siojona Sinia' jikimet ti laj jlaja janak isiene. Je janaka 'neje jana sisaj ka tena'a puwa ka inamtisie',#Ex 24.12 'yina tenaja ni i'nio' jlosik.#Jer 31.33; Ez 11.19; 36.26
4'Yina je kassots'ink'i ti kiak awoki, lapakawo ti sitiej awomaja pi Sinia' ti po' pet siunie iyot'iyipi pa Sijwajieti. 5Ijiate ti lajata sijweyeja', kant'eminape ka ikajlaja pa sikijmaye ti kia'iyo. 6'Yina ti jla'am pa Sinia' ti kasts'eyasa'n, kajeyepa ti iyo ka iwo jiwosats'e'm siuniwa jlamtis, ti iyo ink'ieye siunie iyot'iyipi.#Jer 31.33 Siuniwa jlamtis siupa iyot'iyipi ti iwiets'ilati, je ka inkio' jilisanikie' ka ne'yi paka imp'esinikie', 'yina 'wenajliyi siunie iyo ni jikijmaye jana jikimet. Siuniwa Sinia' jlamtis 'neje ti yi'i ni inka'neyasajnaye, ti tena'a ni imp'esinik, ijioyiji pet jana 'najlati napo i'nio', jlampet siojona jikimet ti tajle ni Sinia' iyo ji'wasankiyeja' napo i'nio'.
Siunie Sinia' jikimet ti ink'ie' jla'm ijiate ti 'esi
7Siuti Sinia' yikiajlat'iyipi pa Moisés siupa jika'neyasajnaye, ti tip'esina ape'e japa sisaj, 'yina siupa jla'al pa Sinia' itie jitiokio'we pa Moisés, 'yakajlitieje ti ijliasata'ni isia'm ti 'yomataja'm. Siupapo Israel jika kia'lis jitiej je ijwiyits'i'ni, ka ijiatayiji ka jitiej je inla'ne pa Moisés, lapakawo ti ijiate ti 'esi pi jla'al.#Ex 34.29-35 'Nakayi pet pak inka'neyasajnaye ti itione japa 'najlati napo.
Siupa ti kiak iyoyi pak ti itione jana 'najlati napo i'nio', ti je jlase' pi jla'al, 8jla'm ijiatayi jla'am siupa jla'al iyo pet pak Sinia' jikimet ti ink'ie' 'yotate, 'yaka'm ape'e siupa iyot'iyipi ti 'nelanjie'e, Sinia' jikimet ti itione napo jana in'wasankiye. 9Jayo'ate, ti jet'i jiniliakpe pa k'iejliyi pak inka'neyasajnaye t'ipi, ti 'yakajanit pi jitis iyo pa i'nio', 'yina siupa k'iejliyi pet puwak Sinia' jlamtis ti initiajnat pi jitis iyo pa i'nio' ti ip'ilisi'n, jla'm ijiatayi jla'am ti 'yaka'm ape'e, ti ijiate ti 'es. 10Kajeyepa siupa k'iejlit'iyijpe pet siupa inia'an 'yojma'm, 'yina siunie ink'ie' je itieje wita'm, 'yaka'm ape'e ni k'iejliyi. 11Ijwilt'ipi ka kia'iwo ka 'esie paka siupa ji'niayi je itio'yi, jlam'ne pet naka ti je paj ka netia'n, jla'm ijiatayi jla'am ti 'es.
12Siuti kia'iyo ti sinijijwiye po', it'imina pet ti je kast'a'ni ti awok samtikie'. 13'Yina je awok'iate siupa iyot'iyipi pak Moisés, ti ip'ione jitiokio'we pa lotakiniewa, ti je iyo ka siupapo Israel jika kia'lis in'wenis ti kia' iyoyetaja ti 'yomatak'i siupa jla'al iyo pa Sinia' ti itie'e pa Moisés jitiokio'. 14Kajeyepa siupa ajnatiok itij'w ape'e siupa jlosik papo i'nio' t'ipi, it'imint'iyijpe ti je itijnisisie siupa iyot'iyipi. Yamjliyi ti kia'iyo siupapo jilis t'ipi papoka, 'wanjliyi kan'yenis niwa Sinia' jlamtis ti yi'i ni paj imp'esinik, 'yina je itiant'iejesi siunie yi'i, kajeyepa ti 'yiniye ka poye pa ka imp'o'n ape'e siunie jlosik. 'Yina naka'ne ni siunie tomk'iye, paka 'najanisi paka iwonisi, 'yina lajk'iji pa ka ilank'i ape'e siunie yi' ape'e ni jitiokio', ijwienjli jla'am pa Sijwajieti ti i'nio' 'esi ti kia'iyo. 15'Wanjliyi 'nakayi ti kia'iyo ti po' siunie ip'ionk'i ape'e ni jlosik, siuti yamtijienatajas ni Moisés jika'neyasajnaye. 16Jlampet ti po' ni i'nio' ti ininekial, kajeyepa ti itienkiuni pa Saka'niona, 'yina paka'ne ti ijiale paka siupa ip'io'n ape'e pa jitiokio'. 17Kajeyepa siupa Saka'niona jla'am ti siojona Sinia' jikimet, jlajmiliet siupa ajnat yi'i japak Saka'niona jikimet, sekyi'i pet napoka i'nio' ti lajk'ipa ka intomk'iye.
18Jak je iyoyiji pet ti sa'am je awokie 'ate ti pajk'i ti po' ki ip'ionk'i ape'e 'niwa sitiokiolis ti kaswikie'eyi. Awok'iate siojona ti'yenaja, jlampet siunie Saka'niona jla'al itie siwa'm. Jak je iyoyiji jlam yamjli, yamjli siunie jla'al ti kaswats'ilati, siunie iyo ni jipel jla'am#Rom 8.29; Gl 4.19; Fil 3.10. Lapakawo ti siunie jla'al ti je tal sajap, 'yina ti Saka'niona jla'am ti siojona Sinia' jikimet, it'imina ti kiak iyo naka.
Currently Selected:
2 Corintios 3: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.