Kanta 99
99
Kanta 99
Ti Panginuun Banal pag Hari
1Maghari ti Panginuun, matukawan sa tukawan hari sa karaw-an manga kirubin.
Nakan takigan sa kadalaan ti manga tawu ag matandug ti kalibutan.
2Makamaskihan ti Panginuun sa Siun;#99:2 Siun: ngatay, Hirusalim.
maghari siya sa tanan nasyun.
3Dumayaw ti manga tawu sa kanya dahil makamaskihan ag garalangun siya.
Banal siya!
4Makamaskihan siya pag Hari ag magkaibug sa katadlungan.
Matadlung kay maghari;
kang-ud kay pagbuwatun sa Israil.#99:4 Israil: sa Hibriyu, Hakub.
5Dayawa ti Panginuun kanta Diyus.
Sambaha siya sa kay Balay.#99:5 Balay: sa Hibriyu, tarat-an lulud.
Banal siya!
6Si Muysis ag si Aarun kabilang sa kay manga manughandug,
ag si Samwil ti usa sa manga magdarangin sa kanya.
Magtawag sida sa kanya ag sinagut niya sida.
7Maghampang siya sa kanda ginan sa rurum ga tulduk;
tinupad nida ti ipinakaun niya sa kanda pag manga patigayun hanggan surundanun.
8 Panginuun nimi Diyus, sinagut nimu ti darangin nimu manga nasakupan.#99:8 nimu manga nasakupan: sa Hibriyu, nida; mahimu diman sida ni Muysis, ni Aarun ag ni Samwil ti pagtukuyun parihu sa nakasurat sa talata 6. Ipinakakit nimu sa kanda kawu mapinatawadun pag Diyus una pinarusahan nimu sida sa kanda manga kasalanan.
9Dayawa ti Panginuun kanta Diyus.
Sambaha siya sa kay banal pag Bantud,
dahil banal ti Panginuun kanta Diyus.
Currently Selected:
Kanta 99: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
