Kanta 98
98
Kanta 98
Dayawa ti Diyus Manugsintinsiya
Usa ka Kanta.
1Manganta kita bag-u pag kanta sa Panginuun,
dahil nagbuwat siya makadululaw pag manga bagay!
Sa panab-anan niya sadili kamaskihan ag kabisugan tinalu niya kanta manga kalaban.
2Ipinakakit Panginuun sa manga nasyun kay inawatan kita ag ipinanalu.
3Balaw niya kinalimtan kay pagmahal ag pagkamatinupadun sa kanta, sa nasakupan Israil.
Nakitan tanan tawu sa buu kalibutan#98:3 buu kalibutan: sa Hibriyu, pinakasuru kalibutan. nu kabitay kita ipinanalu nita Diyus.
4Kamu pag manga nasakupan sa buu kalibutan, paghuyaw kamu sa Panginuun dahil sa kabayaan.
Pagkanta kamu may kabayaan sa pagdayaw sa kanya.
5-6Pagkanta kamu manga pagdayaw sa Panginuun habang pagpatunugan manga pamatunug,
ag paghuyaw kamu sa kabayaan sa atubangan Panginuun kanta Hari.
7Pagbaya ti kalibutan hanggan ti tanan mag-uli asan,
hanggan yi ti dagat ag ti tanan asan.
8Pagpalakpak ti manga sapa ag pagdurungan pagkanta sa kabayaan ti manga bantud.
9Pagmasulung sida sa atubangan Panginuun
dahil rumas-ug siya agud sintinsiyahan ti manga tawu sa kalibutan.
Sintinsiyahan niya sida may katadlungan, balaw siya may pagkampihan.
Currently Selected:
Kanta 98: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
