Kabagawan 3
3
Dugang pag Kaayadan Kadunungan
1Anak, danga gid pagkalimti ti itinudlu niku sa kanmu; dahani sa kanmu tagipusuun kang manga pag-isugu sa kanmu, 2dahil inda ti pumalawig hanggan ti pumaabunda sa kanmu buhi. 3Pagmayad ag matapat kawu; danga inda pagduraa nu unman ituduk gid nimu sa kanmu tagipusuun. 4Nu buwatun nimu inda, makabaya sa kanmu ti Diyus hanggan ti manga tawu, ag bumaliw mayad kanda magbantay sa kanmu.
5Pagsarig kawu sa Panginuun sa buu nimu tagipusuun, danga sa kanmu sadili kadunungan. 6Alalahana ti Panginuun sa tanan nimu pagbuwatun, ag giyahan niya kawu sa matadlung pag dalan. 7Danga nimu isipun madunung yi gid kawu nu unman paggalang kawu sa Panginuun, ag danga kawu magbuwat daut. 8Dahil ikaayad ag ikabisug inda nimu bilug. 9Dayawa ti Panginuun sa panab-anan pagsagda kanmu manga kasiyunan sa kanya, hanggan pagsagda un-an pag bahagi sa tanan nimu ani. 10Nu buwatun nimu inda, mapnu manga ani kanmu manga balay haramnuan hanggan ti manga irinmun ubas umawas sa kanmu manga sukadan.
11Anak, danga pagkadat-i ti pagtamyaw Panginuun sa kanmu. Danga magkadaut kanmu buut nu pag-itadlung niya kawu. 12Dahil pagtamyawun Panginuun kay manga pagmahalun parihu sa pagbuwatun usa ka ama sa kay pagbayaun pag anak.
13Mapalad ti tawu may kadunungan hanggan pan-intindi. 14Dahil subra waya inda kaysa pilak ag gintu, 15ag mas mahalaga waya kaysa manga mahalaga pag manga batu. Unman gid may una hintay pag bagay ti mahimu pumarihu siyun. 16Makapalawig inda sa kanmu buhi, ag makapakaun diman kadayawan sa kanmu. 17Makaawat gid inda sa kanmu buhi ag ikaayad nimu kahamtangan. 18Mapalad ti tawu may kadunungan; ti kadunungan ikaayad ag ikalawig niya buhi.#3:18 ikaayad ... buhi: sa Hibriyu, kayu makapakaun buhi.
19-20Sa panab-anan kadunungan hanggan kaalaman, linalang Panginuun ti kalibutan hanggan ti kalangitan, bag-u nagkarabukasan ti manga bulbugan, ti manga rurum nagpakaun uran.
21Anak, dahani gid kanmu kadunungan hanggan kaalaman sa pagpasya tama. Danga pagpabay-ani madura inda sa kanmu. 22Dahil makapakaun inda sa kanmu malawig ag mayad pag buhi. 23Ag mangabuhi kawu ribri sa kadamhakan ag balaw kawu maunu. 24Maturug kawu hamuuk, unman may pagkadalaan. 25Nakan balaw dapat kawu madala nu kadaka rumas-ug ti maradala pag manga mangyari, ngatay nu rurisun yi ti manga magbuwat daut, 26nakan magsarig gid kawu bantayan Panginuun; ipakarayu niya kawu sa kadamhakan.
27Awati ti manga dapat awatan nu makayahan lang diman waydi nimu. 28Danga yi pagpaaldawan ti pag-awat sa kanmu kaparihu nu maawatan lang diman waydi nimu siya kainda.
29Danga kawu maggayak daut laban sa kanmu kaparihu magsarig sa kanmu bilang kanmu kamalay.
30Danga kawu mag-away sa kanmu kaparihu sa unman may dahilan, nu unman waydi siya may nabwat daut sa kanmu.
31Danga kawu maghirak sa maisug pag tawu ngatay maghuwad sa kay manga pagbuwatun. 32Dahil pagkadat-an Panginuun ti manga malinabagun, dapat magpiyar siya sa magpangabuhi sa matadlung.
33Pagsaadan Panginuun ti magtal-anakan manga daut, dapat kay pagpapaladan ti manga matadlung pag magtal-anakan.
34Pagpuyaan niya ti magpuya, dapat pagkaawaan niya ti mapinakumbabaun.
35Ti manga madunung pag pahalgaan, dapat ti manga kurang sa intindi pakay-ahun.
Copyright © 2023 by OMF International, Philippines