Kabagawan 2
2
Ti Kahalagahan Kadunungan
1Anak, tanggapa ag dahani sa kanmu tagipusuun kang manga pag-itudlu hanggan pag-isugu sa kanmu. 2Patingihi nimu nu hintay ti makapakaun kadunungan hanggan pan-intindi sa kanmu. 3Hingabta gid magkaimaw kawu pan-intindi, 4parihu ga maghanap kawu pilak ngatay itinagu pag kayamanan. 5Nu buwatun nimu inda, maalaman nimu nu kabitay ti maggalang sa Panginuun, ag masalman nimu ti tungkul sa kanya. 6Dahil ti Panginuun imaw ti magpakaun kadunungan. Sa kanya diman ginan ti kaalaman hanggan pan-intindi. 7-8Pag-alagaan niya ti magkabuhi matadlung hanggan matinupadun. Pagpakan-an diman niya sida kapanaluhan.#2:7-8 kapanaluhan: ngatay, kang-ud pag kadunungan.
9Nu mamatingi kawu sa kangku, maalaman nimu nu hintay ti mayad buwatun: ti tama, ti matadlung, hanggan ti maangay. 10Nakan lalu di dumunung kawu, ag makapakaun inda kasulungan sa kanmu. 11Nu makaintindi kawu ag madunung magpasya sa hustu, makadahan inda sa kanmu. 12Ipakarayu kawu kadunungan sa daut pag ugali hanggan sa manga tawu magbagaw daut. 13Tunda pag manga tawu nagbugya sa mayad pag ugali ag nagsunud sa ugali kadudulman. 14Magbaya sida sa pagbuwat daut. Magkabayaan sida sa kanda daut pagbuwatun. 15Balaw mayad kanda pag-ugaliun; balaw matadlung kanda paglakawan.
16Ti kadunungan makapakarayu diman sa kanmu sa daut pag babayi maggarya sa panab-anan niya marinu pag manga baragawun. 17Tunda pag babayi nagtayak sa inasawa niya pag lalaki katpung kalay-awan; kinalimtan niya kay taratu sa Diyus katpung ipinaasawa siya. 18Sa tutuu, nu umatag kawu sa kay balay ga atabug diman kawu sa kamatayan. Dahil tunda ti dalan atabug sa rugar manga namatay. 19Una si unu ti umatag sa kanya unman yi umuli; malimtan yi niya ti dalan sa rugar manga buhi. 20Nakan huwada ti pagpangabuhi mayad pag manga tawu; pagkabuhi kawu matadlung. 21Dahil ti tawu magkabuhi sa hustu ag unman may ikasabi parargu mangulian sitay sa kalibutan. 22Dapat ti manga daut pag tawu ag maradaya palayasun. Pangayitun sida parihu sa manga ilamnun.
Copyright © 2023 by OMF International, Philippines