Libitiku 8
8
Ti Pagtalaga sa kan Aarun hanggan sa Kay manga Anak Lalaki bilang Manug-asiwa
(Pag. 29:1-37)
1Sinabi Panginuun sa kan Muysis magkun, 2-3“Paatiha si Aarun hanggan kay manga anak lalaki sa may sabian Turda Taragbuan, ag tipuna ti buu nasakupan ati. Padaran-an ti manga rutay panmanughandug, ti lana ulibu panhaplas, ti tudu baka handug sa paglumpiyu kasalanan, ti duwa ka karanidu lalaki hanggan ti alat may sukad tinapay unman may pamadaka.”
4Tinupad ngani ni Muysis ti sugu Panginuun sa kanya, ag nagtipun ngani ti nasakupan ati sa sabian Turda Taragbuan. 5Taynguna, sinabihan ni Muysis sida kuntay inda kay buwatun angay sa isinugu Panginuun sa kanya. 6Dinara niya atag sa karaw-an si Aarun hanggan kay manga anak ag pinarigus niya sida. 7Bag-u ipinasulung niya sa kan Aarun ti rutay bilang pangulu manughandug: ti pansulud pag rutay, ti panhuragkus, ti panluwas pag rutay, ag ti ipud linapgung marinu pag panhuragkus hinabul. 8Ipinauli ni Muysis sa kan Aarun ti rutay may bursa sa dubdub bag-u kay ipinauli siti ti Urim ag Tumim.#8:8 Urim ag Tumim: Duwa ka bagay garamitun sa pag-alam sa kagustuhan Diyus. 9Bag-u ipinasulung niya ti pantaung sa ulu ni Aarun, ag isinab-it sa sarangwan pantaung ti midalya gintu tanda pagtalaga sa kan Aarun para sa Panginuun. Binwat inda tanan ni Muysis angay sa sugu Panginuun.
10Bag-u nagbuul si Muysis lana kay winisikan ti Turda Tiripnan hanggan ti tanan asan sa sulud. Katida ngani kay naghandug tunda pag manga bagay para sa Panginuun. 11Winidwisikan niya lana ti tanan kagamitan sa harandugan sa makapitu ka ulit, katunda diman ti palanggana hanggan kay paratungbawan. Binwat niya inda hampay ihandug ti manga garamitun sa Panginuun. 12Bag-u binuhusan niya lana kay ulu ni Aarun hampay italaga siya sa Panginuun. 13Ag tinaban niya sa karaw-an kay manga anak lalaki ni Aarun ag pinasulungan sida manga rutay panmanughandug bag-u hinuragkusan. Pinasulungan diman sida manga panaung sa ulu. Binwat inda ni Muysis angay sa sugu Panginuun sa kanya. 14Pagkatapus inda, ipinab-ul ni Muysis ti tudu baka handug sa paglumpiyu kasalanan. Bag-u itinungbaw ni Aarun hanggan niya manga anak kanda manga kamang sa ulu baka. 15Iniyaw ni Muysis ti baka ag namuul siya kay dugu. Kay isinawsaw kay ituturu sa dugu bag-u ipinayid niya sa manga sungay sa suuk harandugan hampay malumpiyu inda. Ti nasawad pag dugu kay yi inuyang sa sirung harandugan. Katida ngani kay nagtalaga harandugan para sa Panginuun hampay karapat-dapat handugan panlukat sa kasalanan. 16Bin-ul diman ni Muysis ti tanan taba ginan sa sulud bilug hayup, ti diit pag bahagi atay, ti duwa ka batu hanggan kay manga taba, bag-u sinunug niya tunda tanan sa harandugan. 17Ti manga nasawad pag bahagi baka tulad nayi, lukub, ag manga puna, sinunug niya sa luwas kampu. Binwat inda ni Muysis angay sa sugu Panginuun sa kanya. 18Siyun ginan, ipinab-ul ni Muysis ti usa ka karanidu lalaki bilang handug pagsunugun, bag-u itinungbaw ni Aarun hanggan niya manga anak kanda manga kamang sa ulu karanidu. 19Iniyaw ni Muysis ti karanidu ag iwinidwisik kay dugu sa sangput harandugan. 20-21Linapa niya ti hayup ag sinunug kay ulu, hanggan kay taba ag ti iba waya pag bahagi bilug hayup. Inugasan niya ti manga bahagi sa sulud tiyan hanggan kay lulud. Bag-u sinunug niya sa harandugan ti tanan bahagi bilug hayup bilang handug pagsunugun. Kay hungaw tunda pag handug makapasulung gid sa Panginuun. Binwat inda ni Muysis angay sa sugu Panginuun sa kanya. 22Ipinab-ul diman ni Muysis ti ikadwa pag lalaki karanidu. Inda pag karanidu handug para sa pagtalaga. Itinungbaw ni Aarun hanggan niya manga anak kanda kamang sa ulu karanidu. 23Bag-u iniyaw ni Muysis ti karanidu, binmuul siya dugu ag ipinayid sa sikun baliwa pag pararungpungan tuli ni Aarun hanggan sa ina-ina niya sikun pag kamang ag lulud. 24Tinaban diman ni Muysis tag sa karaw-an kay manga anak lalaki ni Aarun ag pinayidan diman niya dugu kanda pararungpungan tuli sa sikun baliwa, hanggan kanda ina-ina sikun kamang ag lulud. Bag-u iwinidwisik niya ti dugu sa sangput harandugan. 25Nagbuul diman siya manga taba, ti matabul pag ikug, hanggan ti tanan taba sa sulud bilug, kaibahan diman ti diit pag bahagi atay, una ti manga batu kaibahan kay taba hanggan kay sikun pag lulud. 26-27Bag-u nagbuul si Muysis tigus-a ka tinapay ginan sa kada kalasi manga tinapay unman may pamadaka ginan sa basad alat, kay ihinandug sa Panginuun. Nagbuul siya madamul pag tinapay, tinapay may lakay lana, hanggan tinapay manipis. Ipinahiyaput niya tunda tanan sa kan Aarun hanggan sa kay manga anak kaibahan yi ti tanan pag taba ag ti sikun pag lulud karanidu, bag-u ipinaabwat nida tunda para sa Panginuun bilang handug pag-ipaabwat. 28Pagkatapus, bin-ul tunda ni Muysis ginan sa kanda kamang bag-u kay sinunug sa harandugan kaibahan ti handug pagsunugun. Handug tunda para sa pagtalaga sa kanda. Kay hungaw tunda pag handug sa panab-anan apuy makapasulung gid sa Panginuun. 29Bin-ul ni Muysis ti dubdub karanidu ag kay ipinaabwat tunda para sa Panginuun bilang handug pag-ipaabwat. Imaw tunda kay bahagi ginan sa handug pagtalaga. Inda tanan binwat ni Muysis angay sa sugu Panginuun sa kanya.
30Bag-u nagbuul si Muysis lana ulibu panhaplas hanggan dugu ginan sa harandugan ag winidwisikan niya si Aarun hanggan kay manga anak kaibahan kanda manga rutay. Sa katunda pag paraan pag ihinandug niya sida hanggan kanda manga rutay sa Panginuun. 31Magkun si Muysis sa kan Aarun hanggan sa kay manga anak, “Tamaa niyu ti taguban sa may sabian Turda Taragbuan, ag angay sa pag-isugu niku sa kanyu kan-a niyu tunda kaibahan ti manga tinapay sa alat ti ihinandug para sa pagtalaga. 32Kay sawad manga taguban hanggan tinapay sunuga yi niyu. 33Danga kamu mag-ighit siyun ginan sa sulud pitu ka sirang, tugka sa ud matapus ti pagtalaga sa kanyu. 34Ti Panginuun, ti nagsugu sa kanta hampay buwatun nita inda pag buruwatun taynguna pag sirang, agud malukat kamu ginan sa kanyu manga kasalanan. 35Kailangan siyun lang kamu sirang yabi sa sulud pitu ka sirang, bag-u buwatun gid niyu ti pag-isugu Panginuun hampay balaw kamu mamatay, dahil imaw inda ti pag-isugu Panginuun sa kangku ti buwatun niyu.” 36Nakan sinunud ni Aarun hanggan niya manga anak ti tanan isinugu Panginuun sa panab-anan ni Muysis.
Currently Selected:
Libitiku 8: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
