Libitiku 7
7
Dugang pag manga Surundanun tungkul sa Handug Bayad sa Kasalanan
1Inda ti manga surundanun tungkul sa handug bayad sa kasalanan. Banal gid inda pag handug.
2Ti handug bayad sa kasalanan ati pag iyawun sa iriyawan handug pagsunugun. Kay dugu iwidwisik sa sangput harandugan. 3Pag-ihandug ti tanan taba: ti matabul pag ikug, ti manga taba sa sulud bilug, 4ag kay duwa ka batu kaibahan kay taba, hanggan ti diit pag bahagi atay. 5Inda tanan sunugun manughandug sa harandugan handug sa panab-anan apuy#7:5 handug sa panab-anan apuy: Bantayi ti footnote sa 1:9. para sa Panginuun. Inda pag handug imaw ngani ti bayad sa kasalanan. 6Tanan lalaki sa magtal-anakan manga manughandug mahimu kumaun nagsawadan handug, dapat kailangan kan-un nida inda ati sa banal pag rugar, dahil banal gid inda. 7Parihu lang kay surundanun tungkul sa handug sa paglumpiyu kasalanan hanggan sa handug bayad sa kasalanan: inda pag manga handug taguban para yi sa manughandug. 8Kay manga paknul waydi hayup ihinandug bilang handug pagsunugun para yi waydi ngapu sa manughandug. 9Para diman sa manughandug ti una hintay pag handug bilang pasalamat sa Panginuun, ti tinama sa pugun, sa kawali, ngatay sa sartin. 10Ti tanan handug pasalamat, may lakay lana aw ngatay unman, inda tanan para yi sa manga manughandug lahi ni Aarun ag ayaw-ayawun nida inda pari-parihu.
Dugang pag manga Surundanun tungkul sa Handug para sa Mayad pag Pakiusa
11Inda ti manga surundanun tungkul sa handug para sa mayad pag pakiusa pag-ihandug sa Panginuun:
12Nu ti hayup handug sa mayad pag pakiusa ihandug tawu bilang pasalamat sa Panginuun, kailangan pag may kaibahan tinapay. Mandara siya tinapay unman may pamadaka — ti madamul pag tinapay may lakay lana, una ti manipis pag tinapay pinayidan lana hanggan ti tinapay binwat ginan sa marinu pag kalasi arina may lakay diman lana. 13Bukud siyun, mandara diman siya tinapay may pamadaka. 14Manhandug diman siya ginan sa kada kalasi sa inda pag manga tinapay bilang bukudtangi pag pasalamat sa Panginuun. Inda pag manga ihinandug tinapay para yi waydi sa manughandug magwisik dugu handug para sa mayad pag pakiusa. 15Nu ti handug para sa mayad pag pakiusa kay ihandug bilang pasalamat sa Panginuun, tunda pag taguban kailangan kan-un manughandug hanggan niya magtal-anakan ag manga manughandug sa tunda diman pag sirang paghandug; kailangan balaw yi umaput surip.
16Dapat nu ti handug para sa mayad pag pakiusa ihandug niya bilang handug pagtupad sa taratu ngatay buluntad pag handug, ti taguban mahimu kan-un sa tunda pag sirang ag kay masawad mahimu waya kan-un sa aldaw pag sirang. 17Nu may masawad waya gid taguban tugka sa ikatlu pag sirang, kailangan sunugun yi tunda. 18Nu may mangaun waya sa taguban sa ikatlu pag sirang, balaw yi tanggapun Panginuun tunda pag handug ag unman yi may pulus kay ihinandug. Kilalan-un mayagting ti handug ag magkaimaw waya saragtun ti makakaun. 19Nu nisaghid ti taguban sa una hintay pag manga bagay mayagting sa magbantay, danga yi pagkan-a kailangan sunugun yi lang. Tungkul waydi sa handug taguban mahimu kan-un, ti malumpiyu#7:19 malumpiyu: Kay ibug sabihun, mahimu makapakiusa sa manga buruwatun sa kanda rilihiyun. lang pag tawu ti mahimu kumaun tunda. 20Dapat una si unu ti balaw malumpiyu#7:20 balaw malumpiyu: Kay ibug sabihun, balaw mahimu makapakiusa sa manga buruwatun sa kanda rilihiyun. nu kumaun tunda pag handug taguban para sa Panginuun, tunda pag tawu danga yi pagkilalan-a nasakupan niyu. 21Nu may nakaigpil manga mayagting sa magbantay, parihu sa yagting gin sa bilug tawu, una sa hayup aw ngatay sa una hintay pag manga mayagting pag bagay tawu, ag nu makakaun siya inda pag handug taguban para sa Panginuun, inda pag tawu danga yi pagkilalan-a nasakupan niyu.
Balaw Mahimu Kan-un ti Dugu ag Taba
22Nagsugu ti Panginuun sa kan Muysis 23kuntay tultulan inda sa manga Israilita:
Danga kamu magkaun taba baka, karanidu, ngatay kambing. 24Ti taba manga hayup namatay ngatay minatay iba manga hayup mahimu niyu gamitun sa una hintay pag gustu niyu, dapat danga niyu inda pagkan-a. 25Una si unu ti kumaun taba ihinandug sa Panginuun sa panab-anan apuy, inda pag tawu danga yi pagkilalan-a nasakupan niyu. 26Una naan kamu pag mangulian, danga kamu magkaun dugu manuk hanggan dugu hayup. 27Una si unu ti makakaun dugu, inda pag tawu danga yi pagkilalan-a nasakupan niyu.
Ti manga Huray manga Manug-asiwa
28Nagsugu waya gid ti Panginuun sa kan Muysis 29kuntay tultulan inda sa manga Israilita:
Una si unu ti manhandug para sa mayad pag pakiusa, kailangan pumakaun siya huray para sa Panginuun imaw yi ngani inda pag huray ti miatag sa manga manughandug. 30Inda pag handug darahun manughandug atabug sa harandugan agud ihandug sa Panginuun bilang handug sa panab-anan apuy. Darahun niya ti taba hanggan ti dubdub hayup, ag ipaabwat niya ti dubdub tag sa atubangan Panginuun bilang handug pag-ipaabwat. 31Sunugun manughandug tagapanguna sa buruwatun ti taba sa harandugan, dapat ti dubdub para yi sa kan Aarun hanggan sa kay manga lahi. 32-33Kay sikun pag balangbang hayup ipakaun sa manughandug maghandug dugu hanggan taba. 34Dahil pag-ipakaun Panginuun ti dubdub hanggan ti balangbang niyu manga handug sa kan Aarun hanggan sa kay manga lahi. Imaw inda ti huray kanda tanggapun ginan sa kanyu hanggan waya aban.
35Imaw tunda ti huray ni Aarun hanggan niya manga anak ginan sa manga handug pagsunugun para sa Panginuun, ipinakaun katpung itinalaga sida bilang manugsirbi sa Panginuun bilang manga manughandug. 36Sa tunda pag sirang pagtalaga sa kanda, magkun ti Panginuun sa manga Israilita, “Pakan-an niyu sa kanda ti manga bahagi para sa manga manughandug hanggan aban, ag tupada nida inda tugka sa sunud pag manga sinulput tawu.”
37Tunda ti manga surundanun sa handug pagsunugun, handug pasalamat, handug sa paglumpiyu kasalanan, handug bayad sa kasalanan, handug para sa pagtalaga, ag handug para sa mayad pag pakiusa. 38Inda ngani ti manga surundanun ipinakaun Panginuun sa kan Muysis ati sa pangawakawaan sa Bantud Sinai, sa sirang katpung nagsugu siya sa manga Israilita paghandug sa kanya.
Currently Selected:
Libitiku 7: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
