Libitiku 14
14
Ti Paglumpiyu sa Tawu Inmayad sa Dilikadu pag Sakit sa Lukub
1-2Inda ti manga surundanun pagsabihun Panginuun sa kan Muysis tungkul sa paglumpiyu sa tawu inmayad sa dilikadu pag sakit sa lukub:#14:1-2 dilikadu pag sakit sa lukub: Bantayi ti footnote sa 13:2.
Pagkatapus mitultul sa manughandug ti tungkul sa sakit usa ka tawu, 3manluwas sa kampu ti manughandug ag himaldan niya kay bilug tunda pag tawu. Nu inmayad yi kay sakit, 4manpabuul ti manughandug duwa ka malumpiyu#14:4 malumpiyu: Kay ibug sabihun, mahimu inda kan-un ngatay ihandug sa Panginuun. pag manuk buhi, bag-u usa ka pulud kayu sidru, hanggan maragang pag panhigut, ag usa ka bugkus isupu. 5Bag-u ipaiyaw manughandug ti usa ka manuk sa babaw anglit may danum ginan sa bulbugan. 6Bul-un waya niya ti usa ka buhi pag manuk, hanggan ti kayu sidru, ti maragang pag higut, ag ti isupu, bag-u kay isugmaw tunda tanan sa danum may dugu manuk iniyaw. 7Ag ti danum may dugu iwidwisik niya makapitu ka ulit sa tawu inmayad sa dilikadu pag sakit sa lukub, bag-u ipaalam niya kuntay malumpiyu yi tunda pag tawu. Bag-u palpasan manughandug ti buhi pag manuk sa bantud.
8Dapat bag-u siya kilalan-un malumpiyu, pipian dapu niya kay rutay, kidkidun niya ti tanan buhuk hanggan bulbul, ag marigus siya. Mahimu yi siya makasulud sa kampu dapat unman siya mahimu umuli sa kay turda sa sulud pitu ka sirang. 9Sa ikapitu pag sirang, kidkidun maan niya kay buhuk sa ulu hanggan kay bungut, kay kidsun, hanggan ti tanan-tanan niya bulbul, bag-u pipian niya kay rutay bag-u marigus.
10Sa ikawalu pag sirang, kailangan magdara siya duwa ka lalaki anak karanidu ag usa ka timpu babayi karanidu, unman may alangan. Magdara diman siya unum ka kilu marinu pag kalasi arina may lakay lana bilang handug pasalamat. Ag magdara waya siya usa ka tasa lana. 11Bag-u darahun manughandug ti malumpiyu yi pag tawu dara kay manga handug sa atubangan Panginuun siyun sa arani sabian Turda Taragbuan.
12Bul-un manughandug ti usa ka lalaki karanidu hanggan ti usa ka tasa lana, ag ihandug niya tunda bilang handug bayad sa kasalanan. Bag-u ipaabwat niya tunda sa atubangan Panginuun bilang handug pag-ipaabwat. 13Iyawun niya ti karanidu sa banal pag rugar, ati sa iriyawan handug panlumpiyu sa kasalanan hanggan handug surunugun. Inda pag handug karanidu banal gid, ag tunda para yi sa manga manughandug, parihu diman sa handug panlumpiyu sa kasalanan. 14Bag-u bum-ul ti manughandug dugu karanidu ag ipayid niya tunda sa pararungpungan tuli tawu hanggan sa ina-ina niya sikun pag kamang ag lulud. 15Manbuul lana ti manughandug ag ipauli niya sa kay wala pag dalukap, 16ag kay usa niya ka ituturu sa sikun pag kamang isaw-saw sa lana ag iwidwisik makapitu ka ulit sa atubangan Panginuun. 17Ti nasawad pag lana sa kay dalukap ipayid niya sa manga bahagi bilug tawu pinayidan dugu: sa pararungpungan tuli tawu hanggan sa ina-ina niya sikun pag kamang ag lulud. 18-20Ti nasawad pag lana sa dalukap manughandug ipayid niya sa ulu tawu. Bag-u ihandug manughandug ti handug para sa paglumpiyu kasalanan. Pagkatapus tunda, iyawun manughandug ti handug surunugun ag ihandug niya tunda sa harandugan kaibahan ti handug pasalamat. Sa kainda pag buwat manughandug sa atubangan Panginuun, mab-ul ti kayagtingan tawu ag malumpiyu yi siya.
21Dapat nu pugri tunda pag tawu ag unman siya may kakayahan manhandug tunda pag manga handug, mandara lang siya usa ka lalaki karanidu ihandug niya bilang bayad sa kasalanan. Ipaabwat manughandug tunda pag handug sa Panginuun hampay malukat siya sa kay kasalanan. Mandara diman siya duwa ka kilu marinu pag kalasi arina may lakay lana ulibu bilang handug pasalamat. Ag mandara waya gid siya usa ka tasa lana. 22Angay sa kay makayahan, mandara siya duwa ka kalampati ngatay duwa ka kurkuru; kay usa handug niya bilang paglumpiyu kasalanan ag kay usa waya handug bilang pagsunugun.
23Sa ikawalu pag sirang, darahun niya inda tanan pag handug sa atubangan Panginuun ati sa arani sabian Turda Taragbuan, ag ipakaun niya tunda sa manughandug. 24Bul-un manughandug ti karanidu handug bayad sa kasalanan hanggan ti usa ka tasa lana ag ipaabwat niya tunda sa atubangan Panginuun bilang handug pag-ipaabwat. 25Bag-u iyawun niya ti karanidu ag bum-ul siya dugu siyun ginan bag-u ipayid niya sa pararungpungan tuli tawu hanggan sa ina-ina niya sikun pag kamang ag lulud. 26Bag-u paulian manughandug lana kay kamang sa wala pag dalukap, 27ag lakaw sa kay ituturu sikun pag kamang, iwidwisik niya ti lana ulibu makapitu ka ulit ati sa atubangan Panginuun. 28Ti nasawad pag lana sa kay dalukap ipayid niya sa manga bahagi bilug tawu pinayidan dugu: ipayid niya tunda sa sikun pararungpungan tuli tawu hanggan sa ina-ina niya sikun pag kamang ag lulud. 29-31Ti nasawad pag lana sa dalukap manughandug ipayid niya sa ulu tawu. Bag-u ihandug manughandug ti duwa ka kalampati ngatay ti duwa ka kurkuru; kay usa handug panlumpiyu sa kasalanan ag kay usa handug pagsunugun. Ihandug diman niya ti handug pasalamat. Katunda ngani ti buwatun manughandug sa atubangan Panginuun, hampay malukat ti tawu sa kay kasalanan. 32Tunda ngani ti manga surundanun tungkul sa paglumpiyu kasalanan tawu may imaw dilikadu pag sakit sa lukub ag nu kabitay niya buwatun nu balaw niya makayahan ti pag kailanganun sa handug para sa paglumpiyu.
Ti manga Surundanun tungkul sa manga Kalmu Magtubu sa Balay
33Inda ti sinabi Panginuun sa kan Muysis hanggan sa kan Aarun 34tungkul sa dapat nida buwatun nu patubuun Panginuun ti kalmu#14:34 kalmu: sa Inglis, mold. Inda pag kalasi kalmu magtubu sa manga bahagi balay balaw pirmi mag-akitan sitay sa Pilipinas. Bantayi diman ti footnote sa 13:2. sa kanda manga balay nu ati yi sida sa Kanaan, ti rugar ipakaun Panginuun sa kanda bilang maranahun nida:
35Nu ti may apu usa ka balay nakakit may imaw kalmu kay balay, kailangan sabihan niya ti manughandug. 36Kailangan bag-u sumaka ti manughandug sa tunda pag balay hampay bantayan ti kalmu, sumugu dap siya kuntay palwasan ti tanan kasiyunan ati ginan, dahil barang una tunda hanggan miminsan sa mauring. Nu matapus tida sumulud yi ti manughandug sa balay 37ag bantayan niya ti kalmu sa lingub. Bag-u nu makitan niya malatuy aw ngatay marara mag-uhup tugka sa basad lingub, 38lumuwas siya sa balay bag-u talakpan niya inda sa sulud pitu ka sirang. 39Sa ikapitu pag sirang, bantayan maan niya inda. Bag-u nu ti kalmu laun kay nagmaliw sa iba bahagi lingub, 40ipatingkab niya ti manga batu may imaw kalmu sa bahagi lingub ag iyamut sa luwas tag banwa, ati sa rugar rayamtan manga mauring pag bagay. 41Ag silsilun niya inda tanan pag manga bahagi lingub sa sulud balay bag-u ti tanan sinilsil ipayamut niya sa luwas tag banwa, ati sa rugar rayamtan manga mauring pag bagay. 42Bag-u ilisan niya ti manga daan batu tiningkab sa bahagi lingub ag pakputan pamalitis.
43Dapat nu pagkalawuy tida kinalmu maan ti balay, 44atagun maan inda manughandug ag bantayan. Nu magmaliw ti kalmu, ibilang tunda pag balay sa mauring, dahil inda pag kalasi kalmu pabalik-balik. 45Nakan ngani dautun tunda pag balay bag-u kay manga kalap iyamut sa luwas tag banwa, ati sa rugar rayamtan manga mauring pag bagay.
46Una si unu ti sumaka siyun pag balay tinalakpan yi, iminsan diman sa mauring tugka sa yabi. 47Una si unu ti maturug ngatay mangaun sa siyun pag balay kailangan gid pipian niya kay rutay.#14:47 Bantayi ti footnote sa 11:24-28.
48Dapat nu balaw yi binmalik ti kalmu sa paghimalad manughandug sa balay igu pinakputan pamalitis ti bahagi manga lingub kinalmu, ipaalam manughandug kuntay malumpiyu yi ti balay dahil nadura yi kay kalmu. 49Hampay miminsan sa malumpiyu ti balay, bumuul ti manughandug duwa ka manuk, ag kayu sidru, bag-u higut maragang hanggan isupu. 50Iyawun niya ti usa ka manuk sa babaw anglit may danum ginan sa bulbugan. 51Bag-u bul-un niya ti kayu sidru, ti maragang pag higut, ti isupu, hanggan ti buhi pag manuk, ag isugmaw niya inda tanan sa danum may imaw dugu manuk iniyaw. Bag-u ti danum may imaw dugu iwidwisik niya makapitu ka ulit sa balay. 52Nakan sa panab-anan dugu manuk, hanggan danum ginan sa bulbugan, ag buhi pag manuk, bag-u kayu sidru, ag isupu, hanggan marara pag higut, malumpiyu manughandug ti balay. 53Bag-u palpasan niya ti buhi pag manuk ati sa luwas banwa. Sa panab-anan tunda pag binwat manughandug, madura ti kayagtingan sa balay ag bumaliw malumpiyu yi tunda.
54-57Tunda ngani ti manga surundanun tungkul sa manga dilikadu pag sakit magatul sa lukub, una sa magkabaga, aw ngatay magkalupgas, una sa magnaknak, ag tungkul sa kalmu sa rutay hanggan kalmu sa balay. Nakan lakaw sa inda pag manga surundanun, maalaman niyu nu naan ti malumpiyu ag ti mauring.
Currently Selected:
Libitiku 14: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
