Libitiku 13
13
Ti manga Surundanun sa Durungugun sa Lukub
1Inda pag manga surundanun ipinakaun Panginuun sa kan Muysis hanggan sa kan Aarun:
2Nu ti lukub usa ka tawu magkabaga, maglimutyug ngatay maglagti tanda dilikadu pag sakit sa lukub,#13:2 dilikadu pag sakit sa lukub: Sa iba pag salin Bibliya, kitung. Sa Hibriyu pag pamagaw inda paggamitun sa tuhay-tuhay pag kalasi sakit sa lukub pagbaliwun mayagting angay sa Lib. 13. kailangan daran-un tunda pag tawu sa kan Aarun ngatay sa usa ka manughandug lahi ni Aarun. 3Himaldan manughandug tunda kay lukub, bag-u nu makitan niya maglagti kay bulbul ag nu nag-abasad, may dilikadu siya pag sakit sa lukub. Ag kailangan ipaalam manughandug kuntay mauring inda pag tawu. 4Nu magpanlagti kay manga lukub balaw tuduk sa nayi hanggan unman maglagti kay bulbul, ipablag siya manughandug sa manga tawu sa sulud pitu ka sirang. 5Sa ikapitu pag sirang, himaldan maan siya manughandug. Ag nu kumun diman kay lukub unman inda mag-amat, ipasaman di maan siya manughandug sa manga tawu sa sulud pitu ka sirang. 6Sa ikapitu pag sirang, himaldan maan siya manughandug. Nu linmatu yi kay garis sa kay lukub ag unman yi inmamat, ipaalam manughandug kuntay malumpiyu yi siya dahil garis wata tunda. Siyun ginan, kailangan niya pipian kay rutay,#13:6 pipian kay rutay: Bantayi ti usa sa manga footnote sa 11:24-28. ag malumpiyu yi siya. 7Dapat nu inmamat ti manga garis sa kay lukub siyun ginan sa kay nagpahimalad sa manughandug ag ipinaalam manughandug kuntay malumpiyu siya, kailangan manpahimalad maan siya sa manughandug. 8Nu ungud tutuu nan-amat kay garis, ipaalam maan manughandug kuntay mauring siya dahil may imaw siya magmaliw pag sakit sa lukub.
9Una si unu ti may palatandaan may dilikadu pag sakit sa lukub kailangan darahun sa manughandug. 10Nu sa maghimalad manughandug magpanlagti ti baga sa lukub ag makitan niya imaw kay dahilan nakan maglagti ti manga bulbul, ag mag-akitan yi ti nayi, 11usa tunda ka dilikadu pag sakit sa lukub magpabalik-balik. Ag ipaalam manughandug kuntay mauring siya. Balaw yi kailangan ipasaman waya siya hampay himaldan dahil pihu mauring siya.
12Nu sa maghimalad manughandug inmamat kay sakit sa buu bilug tawu, 13kailangan himaldan waya gid niya kaayad tunda pag tawu. Ag nu ungud ngani inmamat kay sakit sa buu bilug niya hanggan nu nanlagti kay tanan lukub, ipaalam manughandug kuntay malumpiyu siya.#13:13 Usa inda ka kalasi durungugun manga Israilita balaw pag-ibilang mauring dahil unman waydi may garis ngatay bukul ngatay magnana nu unman pagparawun lang niya ti daan pag kulay tawu. 14-15Dapat nu sa maghimalad manughandug mag-akitan yi ti nayi, ipaalam niya kuntay mauring tunda pag tawu dahil may dilikadu siya pag sakit sa lukub. Inda pag magluwang nayi pagkilalan-un mayagting. 16Dapat nu kinmugan ti nayi ag linmagti kay naglatuan, manpahimalad maan siya sa manughandug. 17Nu tutuu ngani nag-ayad inda, ipaalam manughandug kuntay malumpiyu yi siya.
18Nu ti usa ka tawu may baga naayadan di, 19dapat pagka dugay nanlagti di maan aw ngatay naragang, kailangan ipahimalad niya tunda sa manughandug. 20Nu nag-abasad ti kurubyu ag linmagti ti bulbul, ipaalam manughandug kuntay mauring siya pag tawu, dahil may dilikadu siya pag sakit sa lukub ginan sa baga. 21Dapat nu sa maghimalad manughandug unman maglagti kay bulbul hanggan unman diman mag-abasad kay kurubyu, bilang maglatu yi, ipablag siya manughandug sa manga tawu sa sulud pitu ka sirang. 22Nu inmamat tunda sa iba pag bahagi lukub, ipaalam manughandug kuntay mauring siya, dahil tanda tunda dilikadu pag sakit sa lukub. 23Dapat nu unman waydi mag-amat, naglatuan lang tunda baga, ipaalam manughandug kuntay malumpiyu yi siya.
24Nu ti usa ka tawu napali ag nagkaimaw kurubyu bag-u linmagti tunda ngatay naragang, 25kailangan ipahimalad tunda sa manughandug. Nu linmagti kay bulbul ag nagkaimaw kurubyu, may imaw siya dilikadu pag sakit sa lukub nag-umpisa sa pali apuy. Ipaalam manughandug kuntay mauring siya. 26Dapat nu sa maghimalad manughandug unman maglagti ti bulbul hanggan unman diman mag-abasad ti kurubyu, ag nu bilang maglatu yi, ipablag siya manughandug sa manga tawu sa sulud pitu ka sirang. 27Sa ikapitu pag sirang, himaldan maan siya manughandug. Nu inmamat tunda sa iba bahagi lukub, ipaalam manughandug mauring siya, dahil tanda tunda dilikadu pag sakit sa lukub. 28Dapat nu unman mag-amat ag linmatu yi, usa lang tunda ka baga nag-umpisa sa pali apuy. Bag-u ipaalam manughandug kuntay malumpiyu yi siya.
29Nu ti usa ka tawu#13:29 tawu: sa Hibriyu, lalaki ngatay babayi. Imaw diman sa talata 38. may tanda dilikadu pag sakit sa lukub sa kay ulu una timid, 30kailangan ipahimalad niya inda sa manughandug. Nu inmabasad ti kurubyu ag kay manga buhuk ngatay kay bungut maggatul hanggan magkaunut, kailangan ipaalam manughandug kuntay mauring inda pag tawu, dahil may dilikadu siya pag sakit magatul sa ulu ngatay sa timid. 31Nu sa maghimalad manughandug unman inmabasad ti kurubyu dapat unman yi inda may imaw mabiru pag buhuk ngatay bungut, ipablag siya manughandug ginan sa manga tawu sa sulud pitu ka sirang. 32Sa ikapitu pag sirang, himaldan maan manughandug ti tawu may sakit magatul. Nu unman yi tunda mag-amat ag unman mag-abasad kay kurubyu hanggan unman diman magkaunut kay buhuk ngatay bungut, 33kailangan kalbuhun niya kay buhuk ngatay uguyan kay bungut dapat balaw niya iminsan ti bahagi may magatul. Bag-u ipablag maan siya manughandug sa sulud pitu ka sirang. 34Sa ikapitu pag sirang, himaldan maan manughandug kay may magatul. Nu unman tunda mag-amat hanggan mag-abasad kay kurubyu sa garis, ipaalam manughandug kuntay malumpiyu yi siya. Bag-u pipian tawu kay rutay, ag kilalan-un yi siya malumpiyu. 35Dapat nu inmamat kay magatul sa kay lukub matapus maipaalam manughandug kuntay malumpiyu yi siya, 36himaldan maan siya manughandug. Nu inmamat ti magatul sa kay lukub, balaw yi kailangan himaldan manughandug nu may buhuk ngatay bungut magkaunut dahil pihu mauring siya. 37Dapat nu sa maghimalad manughandug unman mag-amat hanggan unman may mabiru buhuk ngatay bungut magtubu, tunda duy inmayad yi ngap. Ag ipaalam manughandug kuntay malumpiyu yi siya.
38Nu may maglagti sa lukub usa ka tawu, 39kailangan ipahimalad niya tunda sa manughandug. Ag nu manga malapsi pag magpanlagti, tunda manga bulhug lang magtubu sa lukub. Tunda pag tawu malumpiyu di.
40-41Nu ti usa ka tawu nakalbu sa may bangas arani ngatay sa kay aripudwan, malinis di siya. 42-44Dapat nu may baga magkaragang sa kay kalbu, kailangan ipahimalad niya tunda sa manughandug. Ag nu tunda pag magkaragang pag baga usa ka dilikadu pag sakit sa lukub, ipaalam manughandug kuntay mauring siya.
45Ti tawu may dilikadu pag sakit sa lukub kailangan magsulung gitas pag rutay, barugaun niya kay buhuk, bag-u tabunan niya kay sirung pag bahagi niya uyahun. Bag-u manringgit siya, “Mauring aku! Mauring aku!” 46Ibilang siya sa mauring habang udwaya mag-ayad kay sakit. Kailangan ipauli siya sa luwas kampu balaw may kaibahan.
Ti manga Surundanun tungkul sa Kalmu
47-50Nu kalmuhun ti rutay buwat sa dilana ag rutay linu ngatay ti una hintay pag kalasi binwat ginan sa paknul, kailangan pag ipahimalad tunda sa manughandug. Igu mahimaldan manughandug ti rutay ngatay ti paknul, kailangan ipablag niya tunda sa sulud pitu ka sirang. 51-52Sa ikapitu pag sirang, himaldan maan tunda manughandug. Nu inmamat ti kalmu, tunda pag rutay ngatay pag paknul ibilang sa mauring, ag kailangan sunugun tunda sa apuy dahil mag-amat tunda pag kalmu. 53Dapat nu sa maghimalad manughandug unman mag-amat ti kalmu, 54sumugu siya kuntay pipii tunda pag rutay ngatay tunda pag panulung paknul, bag-u ipablag niya tunda sa sulud pitu waya gid ka sirang. 55Siyun ginan, himaldan maan manughandug. Ag nu ti kalmu unman magkauman, tunda pag rutay ngatay paknul pag panulung iminsan sa mauring una balaw inmamat kay kalmu. Kailangan sunugun tunda una sa luwas ngatay sa sulud panulung kay kalmu. 56Dapat nu sa paghimalad manughandug magpusyaw ti kalmu, gisia yi lang niya ti may kalmu pag bahagi rutay ngatay paknul. 57Dapat nu magbalik maan ti kalmu ag mag-amat, kailangan sunugun yi tunda pag rutay ngatay pag paknul. 58Nu nadura yi ti kalmu pagka napipian ti rutay ngatay ti paknul, pipian maan inda uman ag bumaliw yi inda malumpiyu. 59Imaw tunda ti manga surundanun nu kabitay maalaman kuntay malumpiyu ngatay mauring ti rutay buwat sa bulbul ngatay linu hanggan ti una hintay pag bagay ti binwat ginan sa paknul nagkaimaw kalmu.
Currently Selected:
Libitiku 13: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
