Libitiku 11
11
Ti manga Hayup Malumpiyu ag Mayagting
(Diyut. 14:3-21)
1-3Sinugu Panginuun si Muysis hanggan si Aarun hampay sabihun inda sa manga Israilita:
Mahimu niyu kan-un una hintay pag manga hayup magkabuhi sa daga tunda may buka kanda manga kuku hanggan magtalta uman kanda kinaun.#11:1-3 magtalta uman kanda kinaun: parihu sa baka, kambing, karanidu, ag karasyaw. 4-8Dapat danga niyu pagkan-a ti manga hayup magtalta uman kanda kinaun una unman buka kanda kuku, parihu sa kamilyu, badyir#11:4-8 badyir: Inda pag hayup parihu kay ka daka sa kunihu mag-uli sa kabatuhan. ag kunihu. Danga niyu pagkan-a ti babuy, dahil una may buka kay kuku unman waydi tunda magtalta uman kay kinaun. Kilalan-un niyu mauring tunda pag manga hayup. Danga kamu magkaun ngatay mag-igpil tunda pag manga hayup namatay.
9-12Mahimu kanyu kan-un ti una hintay pag hayup magkabuhi sa danum may manga tadak#11:9-12 tadak: sa iba ka bagaw, payapay. hanggan manga siksik. Dapat danga gid niyu pagkan-a ti unman may tadak hanggan manga siksik, danga diman niyu pag-igpili ti bilug manga hayup namatay. Kilalan-un niyu mayagting tunda pag manga hayup.
13-19Danga gid niyu pagkan-a ti manga hayup maglayang#11:13-19 Ti iba pag manga hayup sitay angay sa isinurat sa Hibriyu makuri kilalan-un dahil kay iba unman sitay sa Pilipinas. parihu sa manga agila, manga uwak, manga manuk magkaun sa bangkay tawu ngatay hayup, manga buyaw, manga bukaw, manga andurugmun, manga manuk manga magdagit sa manga isda, manga talabung, manga tagwak, ag manga banug. Kilalan-un niyu mayagting tunda pag manga hayup.
20-23Mahimu niyu kan-un ti manga iyay maglayang ag magyapang may daraka manga lulud panlupsik, parihu sa manga apan, manga laylayu, hanggan manga tipung. Dapat danga gid niyu pagkan-a ti iba ka manga iyay maglayang ag magyapang. Kilalan-un niyu mayagting tunda pag manga hayup.
24-28Danga niyu pag-igpili ti bilug namatay hayup balaw buka kay kuku hanggan unman mag-uman magtalta kanda kinaun. Danga diman niyu pag-igpili ti namatay pag manga bilug hayup upat kay lulud may manga kuku pan-garus.#11:24-28 hayup ... pan-garus: Parihu sa kuti, idu, ag liyun. Kilalan-un niyu mayagting tunda pag manga hayup. Una si unu ti makaigpil sa namatay bilug hayup, kailangan pipian niya kay rutay,#11:24-28 pipian niya kay rutay: Usa inda ka surundanun pagbuwatun manga Israilita hampay malumpiyu sida ag karapat-dapat pumakiusa sa manga buruwatun sa kanda rilihiyun. dapat mauring waya siya#11:24-28 mauring waya siya: Kay ibug sabihun, unman waya siya mahimu pumakiusa sa kanda buruwatun sa kanda rilihiyun. tugka sa mag-isalup init.
29-31Kilalan-un niyu mayagting tunda pag manga hayup magyapang parihu sa manga angbu, manga bayukbuk angbu, manga suksuk, manga tiki, manga bayawak, manga buaya, manga akang, hanggan manga timbakalan.#11:29-31 Ti iba pag manga hayup sitay angay sa isinurat sa Hibriyu makuri kilalan-un ag ti iba unman sitay sa Pilipinas. Una si unu ti makaigpil sa namatay bilug hayup kilalan-un mauring tugka sa pag-isalup init. 32Una hintay pag bagay ti malagpakan bilug namatay tunda mauring yi gid, una bagay buwat sa kayu, una pisahan, una paknul, ngatay saku, hanggan una naan inda paggamitun. Kailangan ugasan tunda sa danum,#11:32 ugasan tunda sa danum: Usa inda ka surundanun sa paglumpiyu sa usa ka bagay hampay mahimu yi gamitun. dapat kilalan-un waya inda mauring tugka sa mag-isalup init, makalawuy tunda, malumpiyu yi. 33Nu malagpakan bilug namatay ti tapayan,#11:33 tapayan: ngatay, siburan. tanan kay sukad tapayan mauring yi, ag kailangan basagun tunda. 34Una hintay pag karan-unun ti sinabakanan danum ginan sa tunda pag tapayan mayagting yi ngap waydi. Mayagting yi waydi ngapu una hintay pag irinmun ginan sa tunda pag tapayan. 35Una hintay ti malagpakan kanda bilug namatay mayagting yi ngap waydi. Nu pugun ti nalagpakan ngatay anglit, mayagting diman tunda ag kailangan diman basagun. 36Ti bulbugan ngatay ti bubun nu malagpakan namatay bilug hayup masabi di tunda malumpiyu,#11:36 malumpiyu: Kay ibug sabihun, mahimu di gamitun inda sa una hintay pag buruwatun sa kanda rilihiyun. dapat ti makaigpil sa tunda pag namatay hayup bumaliw mayagting. 37Una hintay pag binhi ti malagpakan tunda malumpiyu di, 38dapat nu mahuruman sa danum pag binhi mayagting yi tunda.
39Nu namatay yi ti usa ka hayup pagkan-un, una si unu ti makaigpil kilalan-un siya mayagting tugka sa mag-isalup ti init. 40Una si unu ti bum-ul ngatay kumaun sa tunda pag bilug hayup kailangan pipian niya kay rutay, dapat baliwun siya mayagting tugka sa mag-isalup init.
41-42Danga niyu pagkan-a ti una hintay pag hayup magyapang dahil mayagting tunda: una hintay pag magyapang sa panab-anan niya tiyan ngatay upat aw ngatay mayamu kay karamay. 43-44Danga niyu pag-uringi kanyu sadili sa magkaun tunda pag manga hayup, dahil aku, ti Panginuun, kanyu Diyus. Ipakaun niyu kanyu sadili para sa kangku ag pagpangabuhi kamu may kabanalan dahil banal aku. 45Aku ti Panginuun imaw ti nagpalwas sa kanyu sa Ihiptu agud aku kanyu Diyus. Nakan ngani kailangan pagpangabuhi kamu may kabanalan dahil banal aku.
46Sa panab-anan inda pag manga surundanun tungkul sa tanan kalasi hayup: ti manga hayup magkabuhi sa daga, ti manga hayup magkabuhi sa danum, ti manga hayup maglayang, ti manga hayup magyapang. 47Maalaman niyu nu naan ti malumpiyu ag ti mauring, ti mahimu kan-un ag ti unman mahimu kan-un.
Currently Selected:
Libitiku 11: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
