Libitiku 10
10
Ti Pagkamatay ni Nadab ag ni Abihu
1Ati katpung, si Nadab ag si Abihu kay manga anak ni Aarun nagbuul sida kanya-kanya paulian kamangyan. Pinaulian nida tunda baga apuy hanggan kamangyan ag ihinandug sa Panginuun. Dapat inda kanda binwat balaw gid angay sa sugu Panginuun, dahil kanda ginamit tuhay pag baga apuy balaw dapat nida gamitun.#10:1 Ti apuy balaw imaw ti dapat nida gamitun: Siguru kay ibug sabihun, balaw imaw pag pamanglu sa apuy. Katunda diman sa Bil. 3:4; 26:61. 2Nakan nagpadara apuy ti Panginuun ag inirub sida tugka sa namatay sa atubangan Panginuun ati sa Turda Taragbuan. 3Magkun si Muysis sa kan Aarun, “Tunda ngani kay ibug sabihun Panginuun katpung magkumun siya, ‘Kailangan kilalan-un manga manughandug kang kabanalan, ag kailangan dayawun aku sa atubangan tanan manga tawu.’ ”
Unman nakasagut si Aarun. 4Nakan ipinatawag ni Muysis si Misail ag si Ilsapan, kay manga anak lalaki ni Usyil kay bapa ni Aarun, ag sinabihan sida, “Dali, bul-a niyu ti manga bangkay niyu manga katawuhan ati sa Turda bag-u daran-a atag sa luwas kampu.” 5Nakan bin-ul ngani nida ti manga bangkay, dapat sa rutay lang sida pag naghiyaput, bag-u dinara nida sa luwas kampu angay sa isinugu ni Muysis.
6Bag-u magkun si Muysis sa kan Aarun hanggan sa kay manga anak, sa kan Iliyasar ag sa kan Itamar, “Danga niyu pagbarugaa kanyu buhuk ngatay paggisia kanyu manga rutay sa pagpakakit kuntay kamu magkaruku sa namatay. Nu buwatun niyu tunda, mamatay diman kamu ag magalit ti Panginuun sa buu banwa Israil. Kanyu manga katawuhan Israilita, imaw ti manruku sa kanda duwa inirub Panginuun. 7Danga dapu kamu mag-ighit ginan sa sabian Turda.#10:7 Siguru kay ibug sabihun, danga sida maghimanglaw sa namatay ngatay mag-ighit sa sabian Turda hampay makaparargu sida sa kanda buruwatun maghandug sa Panginuun bilang manga manughandug. Nu buwatun niyu inda, pihu mamatay kamu, dahil pinili kamu Panginuun bilang manughandug sa panab-anan pagbuhus lana sa kanyu.” Bag-u tinupad ngani nida kay pagsabihun ni Muysis.
8Sinabi Panginuun sa kan Aarun, 9“Kawu hanggan kanmu manga anak balaw mahimu magsulud sa Turda nu nakainum intus ngatay una hintay pag kalasi irinmun makalangu. Nu buwatun niyu tunda, pihu gid mamatay kamu. Inda pag manga surundanun kailangan gid niyu tupadun tugka sa sunud pag manga sinulput tawu. 10Kailangan niyu maalaman nu hintay ti para sa Panginuun ag ti para sa tanan, ti malumpiyu ag ti mauring.#10:10 Kay ibug sabihun, ti manga garamitun pag bagay mahimu ihandug sa Panginuun ag ti manga bagay unman mahimu ihandug. 11Ag kailangan tudluan niyu kanyu kaparihu manga Israilita sa tanan surundanun ipinakaun niku sa kanyu sa panab-anan ni Muysis.”
12Sinabi ni Muysis sa kan Aarun hanggan sa kay duwa ka anak nasawad, si Iliyasar ag si Itamar, “Bul-a niyu ti nasawad pag handug pasalamat ginan sa manga handug sa panab-anan apuy#10:12 handug sa panab-anan apuy: Bantayi ti footnote sa 1:9. ihinandug sa Panginuun. Tamaa niyu inda balaw may lakay pamadaka ag kan-a niyu sa may arani harandugan dahil banal gid inda pag handug. 13Kan-a niyu inda sa may arani lang banal pag rugar, dahil imaw inda kanyu bahagi ginan sa manga handug sa panab-anan apuy. Imaw inda ti isinugu Panginuun sa kangku.
14“Kan-un niyu kaibahan kanyu magtal-anakan ti dubdub hanggan ti balangbang hayup ipinaabwat ag ihinandug sa Panginuun. Kan-un niyu inda sa manga rugar pag-isipun malumpiyu. Ipinakaun inda sa kanyu bilang kanyu pag bahagi ginan sa manga handug manga Israilita para sa mayad pag pakiusa. 15Nu manhandug ti manga Israilita, ihandug nida kay dubdub hanggan kay balangbang hayup kaibahan ti manga taba pag-ihandug nida bilang handug sa panab-anan apuy. Ti dubdub hanggan ti balangbang ipaabwat nida sa atubangan Panginuun bilang handug pag ipaabwat. Imaw inda kanyu bahagi hanggan niyu manga lahi tugka aban, angay sa sugu Panginuun.”
16Pagka nangusisa si Muysis tungkul sa kambing handug sa paglumpiyu kasalanan,#10:16 Bantayi ti 9:15. nakitan niya nasunug yi inda tanan.#10:16 Angay sa paraan paghandug makitan sa 6:25-30, ti taguban manga hayup sa inda pag handug kailangan kan-un manga manughandug. Inisugan gid niya si Iliyasar hanggan si Itamar, ag binagawan#10:16 binagawan: sa iba ka bagaw, inisugan. niya sida. 17Magkun siya, “Hayga balaw niyu kinaun ti handug sa paglumpiyu kasalanan sa banal pag rugar? Inda pag handug banal gid ag ipinakaun inda Panginuun sa kanyu hampay malukat ti nasakupan Israil sa kanda manga kasalanan sa atubangan Panginuun. 18Dahil kay dugu tunda unman dinara sa sulud Banal pag Sulud-sulud, nakan ngani mana kinaun niyu tunda ati sa Turda, angay sa kang pag-ibilin sa kanyu.”
19Nagsagut si Aarun sa kan Muysis, “Kis-ab naghandug kang manga anak sa harandugan para sa paglumpiyu kasalanan hanggan kanda handug surunugun,#10:19 Naghandug si Aarun hanggan kay manga anak tunda pag manga handug katpung kay udwaya namatay kay duwa ka manga anak. (Bantayi ti 9:8-16). dapat namatay ti duwa sa kanda. Sa inda pag nangyari makabaya aw nguna ti Panginuun nu kinaun niku ti handug sa paglumpiyu kasalanan taynguna pag sirang?” 20Nagpasnu si Muysis sa kay sagut ni Aarun.
Currently Selected:
Libitiku 10: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
