Gimpuunan 43

Nagbalik sa Ihiptu kay manga Patar-ari ni Husi

1Nag-amat ti lun-us sa Kanaan. 2Natabu yi magtal-anakan ni Hakub ti binili nida pag karan-unun sa Ihiptu. Nakan magkun si Hakub sa kay manga anak, “Pagbalik kamu ati sa Ihiptu ag pagbili una pira lang ka karan-unun.”

3Dapat nagsagut si Huda sa kanya, “Sinabihan duy kami gubirnadur danga yi kami magpakakit sa kanya nu unman nimi kaibahan kanmi patar-ari si Binhamin. 4Nu ipakuyug bay nimu siya sa kanmi bumalik di kami ati hampay manbili karan-unun. 5Dapat nu unman, balaw duy kami manbalik atag, dahil magkun ti gubirnadur danga kami magpakakit sa kanya nu unman nimi kaibahan kanmi patar-ari.”

6Magkun si Hakub,#43:6 Hakub: sa Hibriyu, Israil. “Hayga pinakan-an niyu aku daka pag kaaburiduhan? Hayga lugud kanyu waya sinabi sa gubirnadur kuntay may usa waya kamu ka patar-ari?” 7Nagsagut sida, “Kabitay ngani pagpaingan-un niya kami mayad-mayad tungkul sa magtal-anakan nita. Nagpaingana siya nu buhi waya kanmi ama ag nu may iba waya kami ka patar-ari. Nakan sinagut duy nimi siya. Balaw duy nimi pagsarigan kuntay sumabi siya sa kanmi daran-a nimi sa kanya kanmi kap-usan pag patar-ari.”

8Nakan magkun si Huda sa kanda ama, “Amang, pasnui yi duy nimu kami ikuyug nimi si Binhamin hampay makaginan yi duy kami ag makabili karan-unun agud balaw kita mamatay tanan sa lun-us. 9Ibuhis niku kang buhi para sa kan Binhamin. Sukta aku nu hintay man ti mangyari sa kanya. Nu unman siya makabalik buhi sa kanmu, sisiha duy nimu aku tugka aban. 10Nu balaw kita nag-uyang udas, duwa ginan yi mana kami nakabalik.”

11Magkun kanda ama, “Nu katida, pagdara kamu pinakamarinu pag kalakal atay ginan sa kanta rugar ag paulian sa kanyu sukadan para ipakaun sa gubirnadur Ihiptu: manga bulung, daykut, panlakay, pamanglu, hanggan manga burak pistasyu ag almindru. 12Dubliha niyu kanyu dara kuwarta dahil kailangan niyu iuli ti ibinalik pag kuwarta sa kanyu manga saku. Barang nagsalan lang sida sitay. 13Kuyugan niyu kanyu patar-ari si Binhamin ag pagbalik kamu rargu sa gubirnadur Ihiptu. 14Mana tandugun Makamaskihan pag Diyus ti tagipusuun gubirnadur hampay maawa siya sa kanyu ag iuli niya sa kanyu si Simyun ag si Binhamin. Dapat nu unman sida makabalik, tanggapun yi lang niku maluag sa kang tagipusuun.”

15Nakan nagdara ngani ti magtar-arian manga pamakaun ag dinubli diman nida kanda dara kuwarta. Bag-u ginminan sida atabug sa Ihiptu kaibahan si Binhamin, ag napasampak sa kan Husi. 16Pagka nakitan ni Husi kaibahan nida si Binhamin, sinugu niya ti manugpamahala pag suruguun, “Daraha nimu inda pag manga tawu sa balay. Pag-iyaw kawu hayup ag pagtama karan-unun, dahil manyabas sida kaibahan niku.”

17Sinunud manugpamahala pag suruguun ti isinugu sa kanya. Nakan dinara niya ti magtar-arian sa balay ni Husi. 18Nadala ti magtar-arian pagka dinara sida sa balay ni Husi dahil mag-isip sida, “Barang dinara kita sitay tag dahil sa ibinalik kuwarta sa kanta manga saku sitay sa kabag-u nita pag-ataytag. Barang dakpun nida kita, bag-u bul-un nida kanta manga asnu ag buwatun kita manga suruguun.”

19Nakan nagpakihampang sida sa manugpamahala pag suruguun habang ati di waya sida sa may sabian balay. 20Magkun sida, “Kalway duy, may sabihun lang kami sa kanmu. Nag-ataytag kami sitay hampay manbili karan-unun. 21Igu mag-uli yi duy kami, pagka magkayabi yi nagpahari kami sa usa ka rugar, bag-u binukasan nimi ati kanmi manga saku ag nakitan nimi sa sulud ti ibinayad nimi para sa karan-unun. Nakan indaay yi duy, pag-iuli yi nimi inda pag kuwarta. 22Nandara waya kami pandugang pag kuwarta hampay manbili maan karan-unun. Balaw nimi alam nu si unu ti nagpauli kuwarta sa kanmi manga saku.”

23Nagsagut ti manugpamahala pag suruguun, “Danga kamu magkaarimputu hanggan magkadala. Kanyu Diyus, ti Diyus diman niyu ama, ti nagpauli tunda pag kuwarta sa kanyu manga saku. Natanggap niku kanyu bayad sitay.” Pagkatapus, dinara niya si Simyun sa kanda.

24Pinasulud manugpamahala pag suruguun ti magtar-arian sa balay ni Husi bag-u pinakan-an danum hampay makaugas sida kanda manga lulud. Pinakan-an diman niya karan-unun kanda manga asnu. 25Iinalistu magtar-arian kanda manga pamakaun sa kan Husi habang pag-alagdun nida kay pagras-ug. Dahil nasaydan nida ati sida pag manyabas sa kay balay ni Husi.

26Pagras-ug ni Husi, ipinakaun nida kanda manga pamakaun ag nagyuk-ub sida sa kay atubangan bilang paggalang. 27Kinamusta sida ni Husi. Bag-u nagpaingana diman siya, “Kamusta kanyu ama gurangun yi, kanyu pagsabihun sitay sa kangku? Buhi waya aw siya?” 28Nagsagut sida, “Buhi waya duy si amang ag masulung di siya.” Bag-u nagyuk-ub maan sida sa kanya bilang paggalang.

29Pagka nakitan ni Husi kay patar-ari si Binhamin kay anak niya ina, nagpaingana siya, “Inda aw kanyu kap-usan pag patar-ari ti pag-itultul niyu sa kangku sitay?” Bag-u susun niya sinabi sa kan Binhamin, “Anak, papaladan kawu Diyus.” 30Pagkatapus, daldali nagluwas si Husi dahil magkalumi yi siya sa maghanap sa kay patar-ari. Napaslud siya sa kay sulud-sulud ag ati nanlumi.

31Pagkatapus, nangiram-us siya ag nanbalik sa kanda pagpigilun kay magkaramdaman. Bag-u nagsugu siya alistuhan yi ti karan-unun.

32Nangaun usa-usa si Husi, masamanan sa kay manga patar-ari, ag masamanan diman sa manga Ihipsiyu magyabas ati. Dahil ti manga Ihipsiyu balaw magkaun kasaru ti manga Hibriyu, dahil makakaray-a tunda sa kanda. 33Kaatubang ni Husi kay manga patar-ari darasnan kay matukawan angay sa kanda idad. Magbarantayan ti magtar-arian dahil magkadulaw sida surundan kanda matukawan ginan sa panganay tugka sa kap-usan. 34Hinayinan sida karan-unun ginan sa atubangan ni Husi, dapat ti ipinakaun sa kan Binhamin lima ka ulit kay kayamu kaysa iba. Nangaun sida ag nanginum kaibahan ni Husi.

Currently Selected:

Gimpuunan 43: HNN

Highlight

Copy

Compare