Gimpuunan 42

Nag-ati sa Ihiptu kay manga Patar-ari ni Husi

1Pagka naalaman ni Hakub may pag-ipabili karan-unun#42:1 karan-unun: sa Hibriyu, butir. Katunda diman sa sunud pag manga talata. sa Ihiptu, magkun siya sa kay manga anak lalaki, “Unu waya kanyu pag-alagdun? 2Nabaritaan niku may pag-ipabili karan-unun sa Ihiptu, nakan pag-ati kamu ag pagbili hampay balaw kita mamatay sa lun-us.”

3Nakan linmakaw ngani ti sampulu ka patar-ari ni Husi tabug sa Ihiptu hampay manbili karan-unun. 4Dapat balaw ipinakuyug ni Hakub si Binhamin kay ari ni Husi dahil magkadala siya barang may mangyari balaw mayad.

5Nakan nag-ati ngani kay manga anak ni Hakub#42:5 Hakub: sa Hibriyu, Israil. sa Ihiptu kaibahan ti manga taga iba pag rugar hampay manbili karan-unun, dahil lantap yi ti taglun-us sa buu Kanaan. 6Bilang gubirnadur Ihiptu, katungdanan ni Husi ti magpabili karan-unun sa tanan tawu. Nakan igu rinmas-ug kay manga patar-ari, nagyuk-ub sida sa kan Husi bilang paggalang sa kanya. 7-9Pagka nakitan ni Husi sida, nakilala rargu niya sida, dapat siya unman nida nakilala. Balaw lang siya napahalata kuntay siya si Husi. Nagpaingana siya sa kanda nu taga naan sida. Nagsagut sida, “Taga Kanaan duy kami, nag-ataytag kami hampay manbili karan-unun.” Naalaala rargu ni Husi kay tagin-up tungkul sa kanda imaw kay dahilan nu hayga sida nagalit sa kanya. Nakan nagbagaw siya marasakit sa kanda, “Manga manugtiid kamu! Nag-atay kamu hampay bantayan kanmi nasyun nu naan baliwa ti may mahina pag palalan-iban.”

10Nagsagut sida, “Balaw duy! Balaw kami manugtiid. Nag-atay kami hampay manbili karan-unun. 11Magtar-ari duy kami tanan usa lang kanmi ama, magsabi gid kami kay tutuu. Balaw duy kami manugtiid.” 12Dapat magkun si Husi, “Unman aku magpaniwala! Nag-atay kamu hampay bantayan kanmi nasyun nu naan baliwa ti may mahina pag palalan-iban.” 13Nagsagut sida, “Kami 12 ka magtar-ari, ag usa lang duy kanmi ama ati taynguna sa Kanaan. Kay kap-usan duy nimi natayak sa kanya. Kay usa nimi ka patar-ari udyi.”

14Magkun si Husi, “Parihu sa kang sinabi, manga manugtiid ungud kamu! 15Dapat subukan niku kamu nu ungud tutuu kanyu pagsabihun. Pag-isumpa niku sa ngaran hari Ihiptu balaw kamu makaighit sitay ginan tugka sa unman niyu pag-ikuyug ataytag kanyu kap-usan pag patar-ari. 16Pag-uli ti usa sa kanyu hampay bul-un kanyu patar-ari. Ti manga matayak ipirisu tugka sa mapatutuuhanan niyu kanyu pagsabihun, dahil nu unman, pag-isumpa niku sa ngaran hari Ihiptu, pihu gid manga manugtiid kamu!” 17Ag ipinapirisu niya sida sa sulud tulu ka sirang.

18Sa ikatlu pag sirang, magkun si Husi sa kanda, “Maggalang aku sa Diyus, nakan pakan-an niku kamu panahun hampay mabuhi nu sundun niyu kang pag-isugu sa kanyu. 19Nu ungud magsabi kamu tutuu, usa wadi sa kanyu ti ipirisu, bag-u kay iba makauli di ag mandara karan-unun para sa magkalun-us niyu pag magtal-anakan. 20Pagkatapus, daran-a niyu ataytag kanyu kap-usan pag patar-ari agud mapatutuuhanan kanyu pagsabihun ag hampay balaw niku kamu ipamatay.” Ag nagpasnu ngani sida.

21Habang udwaya sida mag-ighit, magkun sida sa usa kag usa, “Magbayad yi kita taynguna sa kanta binwat sa kanta patar-ari. Nakitan nita kay kabuyatan katpung magpaawa-awa siya sa kanta, dapat unman nita siya kinaawaan. Nakan ngani inda kay dahilan nu hayga nagras-ug sa kanta inda pag manga kakurian.”

22Magkun si Rubin, “Kabay pagsabihun yi niku sa kanyu kaybi danga niyu siya pag-unha? Dapat unman kamu nagpatingi sa kangku! Nakan taynguna pagsuktun yi kita sa kay pagkamatay.” 23Unman nida alam magkaintindihan diman ni Husi kanda harampangan dahil habang maghampang siya sa kanda may imaw manugpaliwanag siya.

24Napakarayu dapu si Husi sa kanda bag-u nanlumi. Dapat balaw dugay, nagbalik di siya ag nanhampang sa kanda. Ibinukud niya si Simyun ag ipinagapus sa kanda atubangan.

Nagbalik sa Kanaan kay manga Patar-ari ni Husi

25Nagpasugu si Husi kuntay pun-a karan-unun kanda manga saku ag ulian sa kanya-kanya manga saku kanda bayad, bag-u pabaluni sida kanda manga kailangan sa kanda maglakaw. Nasunud tanan kay isinugu ni Husi. 26Rargu isinakay magtar-arian kanda manga saku sa kanda asnu ag nighit.

27Pagka magkayabi yi nagpat-ung sida sa usa ka rugar hampay ati pag manpahari, ti usa sa kanda nagbukas kay saku hampay pakaunun kay asnu. Pagbukas niya, nakitan niya ati ti ibinayad niya pag kuwarta. 28Nagringgit siya sa kay manga patar-ari, “Inuli kang ibinayad! Inda sa kang saku.” Nanlumuy sida tanan ag kinulbaan.#42:28 Kinulbaan sida dahil barang bangdanan sida kanda itinagu ti kuwarta ag balaw sida nagbayad. Nagparaingan-an sida, “Hintay nguna inda ti binwat Diyus sa kanta?”

29Pagras-ug nida sa Kanaan, itinultul nida sa kanda ama sa kan Hakub ti tanan nangyari sa kanda. 30Magkun sida sa kan Hakub, “Binagawan duy kami marasakit gubirnadur Ihiptu ag binangdanan kami kunu manga manugtiid. 31Dapat sinagut duy nimi siya kami balaw manugtiid ag magsabi kami tutuu. 32Magkun diman kami 12 kami magtar-ari ag usa lang kanmi ama. Magkun waya kami kanmi usa ka patar-ari namatay yi ag kanmi kap-usan kaibahan nimu atay sa Kanaan.

33“Dapat indaay duy kay sinabi sa kanmi, ‘Subukan niku kamu nu tutuu kanyu pagsabihun. Pagpatayak sitay ti usa sa kanyu ag pag-uli kamu may dara karan-unun para sa manga magkalun-us niyu pag magtal-anakan. 34Dapat daraha niyu ataytag kanyu kap-usan patar-ari hampay maalaman niku manga tapat kamu pag tawu ag balaw kamu manugtiid. Bag-u iuli niku sa kanyu si Simyun kanyu patar-ari, ag pasnuan niku kamu pumabalik-balik ataytag sa Ihiptu.’ ”

35Pagka ibinuhus yi nida ti sukad nida manga saku, nakitan nida ati sa kanda manga saku ti ibinayad nida pag kuwarta. Igu nakitan nida inda hanggan nida ama, kinulbaan gid sida tanan.

36Magkun si Hakub sa kanda, “Magkaibug aw lugud kamu maduraan aku manga anak? Udyi si Husi, udyi si Simyun ag taynguna pagkaibgan waya niyu bul-un si Binhamin. Pagpakurianan niyu kang tagipusuun.”

37Magkun si Rubin, “Amang, aku duy ti bahala sa kanya. Matya duy nimu kang duwa ka anak lalaki nu unman niku siya maibalik sa kanmu.”

38Dapat nagsagut si Hakub, “Balaw aku magpasnu kanyu ikuyug kang anak. Namatay yi kay patar-ari ag siya wadi ti nasawad. Barang may daut waya mangyari sa kanya sa dalan, ag sa inda pag kagurangun niku, ikamatay gid niku ti masyadu pag karukuan.”

Currently Selected:

Gimpuunan 42: HNN

Highlight

Copy

Compare