Pag-ighit 40

Ti Pagpatindug Turda Tiripnan

1Magkun ti Panginuun sa kan Muysis, 2“Ipatindug nimu ti Turda Tiripnan pag-ingarnan diman Turda Taragbuan sa un-an sirang sa un-an pag bulan. 3Ipaslud nimu ati sa sulud ti Kaban Kasunduan, ag patakipan nimu inda limbun. 4Ipaslud diman nimu ati ti lamisa ag paulian ti manga kagamitan siyun. Ipaslud diman nimu ati ti palaulian sulu ag paulian kay manga sulu. 5Ipauli nimu ti gintu harandugan pagsunugan kamangyan sa atubangan Kaban Kasunduan, bag-u sab-itan diman ti limbun sa sabian Turda Tiripnan.

6“Ipauli nimu ti harandugan pagsunugan manga handug sa atubangan sabian Turda Tiripnan. 7Ipauli ti palanggana sa tab-anan Turda ag harandugan, bag-u paulii inda danum. 8Isad-ang ti manga limbun sugkadan, masangputan sa Turda, hanggan ti limbun sa sabian sugkadan.

9“Bag-u bul-a nimu ti lana ag wisiki ti Turda hanggan ti tanan kagamitan bilang pagtalaga sa kangku, ag bumaliw inda banal. 10Wisiki diman nimu ti harandugan pagsunugan manga handug ag ti tanan kagamitan bilang pagtalaga sa kangku, ag bumaliw gid inda banal. 11Wisiki diman nimu ti palanggana hanggan kay turungbawan bilang pagtalaga sa kangku.

12“Daran-a nimu si Aarun hanggan kay manga anak lalaki sa sabian Turda Taragbuan ag parigsun nimu sida ati. 13Ipasulung nimu sa kan Aarun ti banal pag manga rutay ag itigana siya sa kangku sa panab-anan pagpayid sa kanya lana ulibu hampay makasirbi siya sa kangku bilang manughandug. 14Daran-a diman nimu kay manga anak bag-u pasulungan kanda pansulud pag rutay. 15Payidan diman nimu sida lana ulibu parihu sa binuwat nimu sa kanda ama, hampay makasirbi diman sida sa kangku bilang manga manughandug tugka aban.” 16Binuwat ni Muysis ti tanan isinugu Panginuun sa kanya.

17Nakan ipinatindug ti Turda Tiripnan katpung un-an sirang sa un-an pag bulan. Ikadwa pag timpu ati ginan sa linmuwas sida sa Ihiptu. 18Kaindaay kay nagpatindug ni Muysis sa Turda: Ipinauli niya ti manga paratukawan, ti manga kamhanan, ti manga pangagad, ag ti manga tulduk. 19Bag-u linadlad niya ti Turda, ag tinungbawan waya gid niya panabun. Binuwat niya inda tanan angay sa isinugu Panginuun sa kanya. 20Bag-u ipinaslud niya sa Kaban ti malapad pag batu sinuratan Kasunduan, ag isinulung niya sa talinga Kaban ti manga yayungan pamas-an, ag tinakluban inda Ulian Pangawa. 21Ipinaslud niya ti Kaban sa sulud Turda Tiripnan, ag isinab-it ti limbun hampay matakipan ti Kaban Kasunduan angay sa isinugu Panginuun sa kanya.

22Ipinauli niya ti lamisa sa sulud Turda, baliwa sa kanaway, sa luwas limbun. 23Ipinauli niya sa lamisa ti tinapay handug sa atubangan Panginuun. Binuwat niya inda tanan angay sa isinugu Panginuun sa kanya.

24Ipinauli diman niya ti palaulian sulu sa sulud Turda, sa atubangan lamisa, baliwa sa salatan. 25Ipinauli niya inda pag manga sulu sa atubangan Panginuun. Binwat niya inda tanan angay sa isinugu Panginuun sa kanya.

26Ipinauli diman niya ti gintu harandugan sa sulud Turda, sa atubangan limbun. 27Nagsunug siya mabanglu kamangyan sa harandugan. Binuwat niya inda tanan angay sa isinugu Panginuun sa kanya.

28Isinad-ang diman niya ti limbun sa sabian Turda, 29bag-u ipinauli niya ati sa arani sabian ti harandugan handug pagsunugun. Bag-u naghandug siya sa inda pag harandugan manga handug pagsunugun hanggan manga handug pasalamat#40:29 handug pasalamat: Bantayi ti Listahan manga Bagaw sa dayu. sa Panginuun. Binuwat niya inda tanan angay sa isinugu Panginuun sa kanya.

30Ipinauli diman niya ti palanggana sa tab-anan Turda ag harandugan. Pinaulian niya inda danum hampay urugasan. 31Ati pag mag-ugas sida ni Muysis, ni Aarun hanggan ti manga anak niya lalaki, kanda manga kamang ag lulud. 32Mag-ugas sida nu magsulud sa Turda ngatay nu pumakarani sa harandugan. Inda tanan binuwat nida angay sa isinugu Panginuun sa kan Muysis.

33Bag-u ipinauli ni Muysis ti manga limbun sa sugkadan, masangputan sa Turda ag sa harandugan, hanggan ti limbun sa sabian sugkadan. Ag natapus gid ni Muysis ti tanan buruwatun.

Ti Makamaskihan pag Kadayawan Panginuun

(Bil. 9:15-23)

34Igu namhan inda tanan, ti Turda Taragbuan sinaput kadayawan Panginuun sa histuda rurum. 35Unman makaslud si Muysis sa Turda dahil nasaput inda kadayawan Panginuun sa histuda rurum.

36Nu mag-atag tungud ti rurum ginan sa Turda, umighit diman ti manga Israilita sa kanda pagkampuhan. 37Dapat nu unman, balaw diman sida mag-ighit. 38Ti rurum pinagkatanda sa kadayawan Panginuun ati sa tungud Turda nu sirang, ag nu sa yabi maglabdab inda hampay makitan tanan Israilita habang maglakaw sida.

Currently Selected:

Pag-ighit 40: HNN

Highlight

Copy

Compare