Pag-ighit 39
39
Ti manga Rutay manga Manug-asiwa
(Pag. 28:1-14)
1Nantahi diman sida ni Bisalil marinu pag manga panrutayun para sa manga manughandug sa Banal pag Sulud-sulud angay sa pag-isugu Panginuun sa kan Muysis. Ti ginamit nida pag pisahan malatuy, dungun ag marara. Inda diman pag pisahan ti ginamit nida sa pagtahi banal pag rutay ni Aarun.
Ti Panulung manga Manug-asiwa
(Pag. 28:6-14)
2Nantahi diman sida ipud. Ti ginamit nida pisahan linu binurdahan bunang malatuy, dungun ag marara. 3Namuwat sida bunang gintu sa panab-anan pagpilpig sa gintu ag tinabas maranipis. Bag-u ibinurda nida inda sa pisahan linu, kaibahan ti bunang malatuy, dungun ag marara. Marinu gid kay nagburda inda. 4May duwa ka bahagi inda pag rutay, kay dayu ag kay sarangwan, pagsugdungun duwa ka sinulapid sa labay. 5Ti huragkus binwat diman sa linu binurdahan bunang kulay gintu, malatuy, dungun ag marara. Inda tanan binuwat nida angay sa isinugu Panginuun sa kan Muysis.
6Ipinauli nida ti manga batu uniks sa gintu pag palaulian. Linahaban nida inda ngaran manga anak ni Hakub#39:6 Hakub: sa Hibriyu, Israil. parihu sa kay pagkalahab sa panmarka. 7Ipinauli nida inda sa manga sinulapid pag higut ipud bilang alaala pag manga batu para sa kay manga anak ni Israil. Inda tanan binuwat nida angay sa isinugu Panginuun sa kan Muysis.
Ti Bursa sa Dubdub
(Pag. 28:15-30)
8Namuwat diman sida bursa sa dubdub ag marinu gid kay pagkabuwat inda. Kay pisahan inda parihu diman sa pisahan ipud: linu binurdahan bunang kulay gintu, malatuy, dungun ag marara. 9Ti bursa sa dubdub duwa ka tipluk kudradu — 1 ka dangaw kay aba ag 1 ka dangaw hanggan kay lapad. 10Isinad-ang nida sitay ti upat ka hatay mahalaga pag manga batu. Sa un-an hatay nakapauli ti rubi, tupasyu, birilyu; 11sa ikadwa pag hatay, ismiralda, sapiru, ag diyamanti; 12sa ikatlu pag hatay, hasintu, agata, amatista; 13sa ikap-at pag hatay, kirisulitu, uniks, haspi. Ipinauli nida inda sa gintu pag palaulian. 14Ti kada batu may usa ka ngaran manga anak ni Hakub bilang pinagkabilug sa 12 ka lahi Israil. Kay naglahab pangaran parihu sa kay naglahab sa panmarka. 15Pinaulian nida tarikada buwat sa lunsay pag gintu ti bursa sa dubdub. 16Namuwat diman sida duwa ka gintu pag palaulian ag duwa ka talinga gintu pag isad-ang nida sa tungud manga suuk bursa sa dubdub. 17Ipinasulung nida sa duwa ka talinga bursa sa dubdub ti duwa ka tarikada buwat sa gintu. 18Ti duwa ka pudpud tarikada isinulung nida sa duwa ka palaulian gintu maulian sa sinulapid higut ipud.
19Namuwat diman sida duwa waya ka talinga gintu ag itinakud sa sirung suuk bursa sa dubdub, mauniban sa ipud. 20Namuwat waya sida duwa ka talinga gintu ag isinulung nida inda sa ipud baliwa sa may huragkus. 21Bag-u hinigtan nida malatuy pag higut kay sirung manga talinga bursa sa dubdub hanggan ti manga talinga ipud. Sa panab-anan inda, miunib mayad ti bursa sa ipud. Inda tanan binuwat nida angay sa isinugu Panginuun sa kan Muysis.
Ti Tuhay waya pag Panulungun Rutay manga Manug-asiwa
(Pag. 28:31-43)
22Nanahi diman sida rutay panluwas manga manughandug. Inda pag rutay magkauniban ipud. Pisahan lunsay malatuy kanda ginamit pantahi sa rutay panluwas. 23Inda pag rutay liniugan may tipluk sangput liug agud balaw magisi. 24Pinaulian nida pamarinu histuda burak kayu pumigranata ti sangput paraway rutay binwat sa linu binurdahan bunang malatuy, dungun ag marara. 25-26Pinaulian nida manga gintu gurung-gurung ti paraway rutay sa tab-anan pamarinu histuda pumigranata. Inda pag rutay ti isulung ni Aarun nu magsirbi yi siya sa Panginuun. Inda tanan binuwat nida angay sa isinugu Panginuun sa kan Muysis. 27Namuwat diman sida pansulud pag rutay para sa kan Aarun hanggan sa kay manga anak lalaki. Linu kanda ginamit pag pisahan. 28Kainda diman pag pisahan ti ginamit nida sa pagbuwat pantaung, manga kalu, ag pansulud pag rutay. 29Ti manga huragkus binwat diman sa linu binurdahan bunang malatuy, dungun ag marara. Ag marinu gid kay nagburda inda. Inda tanan binuwat nida angay sa isinugu Panginuun sa kan Muysis.
30Namuwat sida banal pag midalya lunsay gintu ag iriniruk nida inda pag bagaw, “Ipinablag para sa Panginuun!” parihu kay naglahab sa panmarka. 31Isinab-it nida inda sa atubangan pantaung ni Aarun sa panab-anan malatuy pag panhigut. Inda tanan binuwat nida angay sa isinugu Panginuun sa kan Muysis.
Inusisa ni Muysis ti Natapus pag Buruwatun
(Pag. 35:10-19)
32Natapus ti tanan buruwatun sa Turda Tiripnan pag-ingarnan diman Turda Taragbuan. Binuwat manga Israilita ti tanan isinugu Panginuun sa kan Muysis. 33Ipinakakit nida sa kan Muysis ti Turda Tiripnan hanggan ti tanan kagamitan siyun: ti manga kaw-it, manga kamhanan, manga pangagad, manga tulduk, manga paratukawan; 34ti panaklub buwat sa lukub lalaki karanidu tinagum marara, ti panaklub buwat sa marinu pag kalasi lukub,#39:34 marinu pag kalasi lukub: Mahimu kay ibug sabihun sa Hibriyu, lukub dulpin. ti manga limbun; 35ti Kaban Kasunduan, hanggan kay yayungan ag kay taklub, imaw ti Ulian Pangaawa; 36ti lamisa hanggan ti tanan kagamitan siyun; ti tinapay handug sa atubangan Diyus; 37ti palaulian sulu lunsay gintu ag ti manga mahatayan sulu ag kay kagamitan siyun; ti lana para sa sulu; 38ti gintu pag harandugan; ti lana ulibu pamayid; ti mabanglu pag kamangyan; ti limbun sa sabian Turda; 39ti galang pag harandugan hanggan ti inalawat galang; ti pamas-an ag ti tanan kagamitan siyun; ti palanggana hanggan kay turungbawan; 40ti manga limbun sa sangput sugkadan, ti manga tulduk hanggan kay manga paratukawan; ti limbun sa sabian sugkadan; ti manga higut ag manga patuk para sa limbun sugkadan; ti tanan kagamitan Turda Tiripnan, pag-ingarnan diman Turda Taragbuan; 41hanggan ti marinu ag banal pag manga rutay pansulung ni Aarun hanggan niya manga anak nu magsirbi yi sida bilang manga manughandug sa Banal pag Sulud-sulud.
42Binuwat manga Israilita ti tanan kailangan buwatun angay sa isinugu Panginuun sa kan Muysis. 43Binantayan ni Muysis kanda tarabahu, ag nakitan niya binuwat nida tunda tanan angay sa isinugu Panginuun. Nakan pinapaladan sida ni Muysis.
Currently Selected:
Pag-ighit 39: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
