Pag-ighit 37
37
Ti Pagbuwat Kaban Kasunduan
(Pag. 25:12-22)
1Binwat ni Bisalil ti Kaban Kasunduan. Kayu akasya kay ginamit — 2 ka luk-an siku may tunga kay aba Kaban, 1 ka luk-an siku may tunga kay lapad ag 1 ka luk-an siku kay abwat inda. 2Sinaput inda lunsay gintu sa sulud hanggan sa luwas, ag pinaulian hinulma gintu kay manga giriw inda. 3Binuwatan diman niya inda upat ka talinga gintu ag isinad-ang sa upat ka tulduk Kaban. 4Bag-u namuwat siya yayungan akasya sinaputan gintu. 5Ipinasulung niya ti manga yayungan sa manga talinga sa kada saruy Kaban agud mayayung ti Kaban.
6Binuwatan diman niya taklub ti Kaban (ti Ulian Pangaawa) lunsay gintu. May 2 ka luk-an siku may tunga kay aba ag 1 ka luk-an siku may tunga kay lapad. 7-8Namuwat diman siya duwa ka gintu kirubin sa kada pudpud taklub Kaban. 9Mabukladan kay manga pakpak manga kirubin sa tungud taklub, ti Ulian Pangaawa, hampay mahamuyan inda nida. Mag-aratubangan ti duwa ka kirubin magbantay sa taklub.
Ti Pagbuwat Lamisa Burugtangan Tinapay
(Pag. 25:23-30)
10Namuwat diman siya lamisa akasya 2 ka luk-an siku kay aba, 1 ka luk-an siku kay lapad, ag 1 ka luk-an siku may tunga kay abwat. 11Sinaput inda lunsay gintu ag pinaulian hinulma gintu kay manga giriw. 12Pinaulian niya sanipa ti kada giriw, manga upat ka purgada kay lapad ag pinaulian diman niya hinulma gintu ti sanipa. 13Bag-u nagbuwat siya upat ka talinga gintu ag isinad-ang inda sa upat ka lulud lamisa, 14arani sa sanipa. Siyun pag-isinulung ti manga yayungan pamas-an sa lamisa. 15Human sa akasya ti manga yayungan ag sinaputan gintu. 16Namuwat diman siya manga garamitun lunsay gintu para sa lamisa: manga taya, manga ungut,#37:16 ungut: Balaw malinaw kay ibug sabihun sa Hibriyu inda. manga malukung, ag manga banga garamitun para sa handug irinmun.
Ti Pagbuwat Palaulian Sulu
(Pag. 25:31-40)
17Namuwat diman siya palaulian sulu lunsay gintu kay lulud, kay bilug, hanggan kay pamarinu histuda busang kayu kay iba um-um di waya ag ti iba waydi mabukladan yi. Ti pamarinu kinamhan kaibahan kay bilug palaulian sulu pagka inda binwat. 18Ti palaulian sulu unum ka sanga, tigutlu sa kada giriw. 19Ti kada sanga may tulu ka pamarinu busang kayu kay histuda ga almindru, kay iba um-um waya kay iba mabukladan yi. 20Ti bilug palaulian sulu may upat diman ka pamarinu busang kayu kay histuda ga almindru, kay iba um-um waya kay iba waydi mabukladan yi. 21May histuda busang kayu sa sirung kada magtimbangan sanga. 22Ti manga pamarinu hanggan ti manga sanga kinamhan kaibahan sa pagbuwat kay bilug palaulian sulu.
23Namuwat diman siya pitu ka sulu, manga pangilpit, manga panalud sa ayum mitsa. Lunsay gintu tanan inda. 24Manga 35 ka kilu lunsay gintu ti nagamit sa pagbuwat palaulian sulu hanggan ti tanan kagamitan siyun.
Ti Pagbuwat Harandugan Pagsunugan Kamangyan
(Pag. 30:1-5)
25Namuwat diman siya harandugan akasya surunugan kamangyan. Kudradu inda, 1 ka luk-an siku kay aba, 1 ka luk-an siku kay lapad, ag 2 ka luk-an siku kay abwat. May ga sungay inda sa manga suuk kinamhan kaibahan harandugan pagka inda binuwat. 26Sinaput niya lunsay gintu kay babaw, kay upat ka giriw, hanggan kay manga sungay sa kada suuk, bag-u hinulmahan gintu kay sangput. 27Pinaulian niya duwa ka talinga gintu kay sirung hinulma gintu baliw-baliw giriw harandugan, hampay pasulungan siyun manga yayungan paras-anan. 28Ti yayungan binwat sa kayu akasya ag sinaput inda gintu. 29Namuwat diman siya banal pag lana pamayid hanggan lunsay kamangyan mabanglu gid.
Currently Selected:
Pag-ighit 37: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
