Pag-ighit 36
36
1“Sida ni Bisalil, ni Ahulyab hanggan ti iba waya pinakan-an Panginuun kadunungan ag kakayahan sa tuhay-tuhay pag buruwatun imaw ti mamuwat banal pag Turda Tiripnan angay sa sugu Panginuun.”
2Nakan pinatawag ni Muysis sida ni Bisalil, ni Ahulyab ag ti iba waya pinakan-an Panginuun kadunungan ag kakayahan sa tuhay-tuhay pag buruwatun hanggan ti magkaibug gid mangawat sa pagtarabahu. 3Ipinakaun ni Muysis sa kanda ti tanan ipinakaun manga Israilita para sa pagpatindug Turda. Ag parargu di gid magdara ti manga tawu kanda buluntad pag manga handug kada surip. 4Nakan inmatag sa kan Muysis ti manga manugtarabahu sa Turda ag magkun, 5“Subra yi sa pagkailanganun ti pagdaran-un manga tawu para sa buruwatun isinugu Panginuun.”
6Nakan nagpadara sugu si Muysis sa buu kampu magkumun: “Danga yi kamu magpakaun para sa pagpatindug banal pag Turda Tiripnan.” Nakan inmapas yi ti manga tawu sa pagdara manga handug nida, 7dahil subra-subra yi ti ipinakaun nida para sa tanan buruwatun sa Turda.
Ti Pagpatindug Turda Tiripnan
(Pag. 26:1-37)
8Ti tanan gid antigu magtarabahu imaw ti nagbuwat Turda Tiripnan. Kanda ginamit sa pagbuwat siyun sampulu ka pulud pisahan linu binurdahan bunang malatuy, dungun ag marara. Bag-u binurdahan tunda anad pag manugburda histuda kirubin. 9Ti kada pisahan kay aba 28 ka luk-an siku, kay lapad 4 ka luk-an siku. 10Dinugpak nida inda sa tig-lima; bali duwa ka tig-lima. 11Bag-u binuwatan nida talinga pisahan malatuy kay saruy sa pudpud baliwa kada dinugpak manga pisahan; 12tig 50 ka talinga ti ipinauli sa kada saruy ag mag-aratubangan tunda. 13Namuwat diman sida 50 ka kaw-it gintu hampay midugpak ti duwa ka manga pisahan sa panab-anan inda pag manga talinga. Sa panab-anan siyun nabwat ti Turda Tiripnan.
14Bag-u namuwat sida panaklub sa Turda. Sampulu may usa ka pulud pisahan kanda ginamit ginan sa bulbul kambing. 15Kay aba kada pisahan 30 ka luk-an siku ag may lapad 4 ka luk-an siku. 16Dinugpak-dugpak nida ti lima ka pisahan, ag katida diman ti binwat nida sa unum ka nasawad. 17Pinaulian nida 50 ka talinga ti kada pudpud dinugpak pisahan, 18bag-u isinab-it nida inda sa 50 ka kaw-it galang.
19Kay babaw inda pag taklub tinakluban lukub lalaki karanidu tinagum marara, ag tinungbawan waya marinu pag kalasi lukub.#36:19 marinu pag kalasi lukub: Mahimu kay ibug sabihun inda sa Hibriyu, lukub dulpin.
20Bag-u nagbuwat sida kamhanan Turda. Ti ginamit nida tabla akasya. 21Kay aba ti kada tabla 10 ka luk-an siku ag 1 ka luk-an siku may tunga kay lapad. 22Ti kada tabla linahaban duwa ka pansugdung agud misugdung sa usa ka tabla. Katunda kanda binwat sa kada tabla. 23Ti 20 sa inda pag manga tabla ginamit nida panlingub sa salatan baliwa Turda. 24Inda pag manga tabla isinul-ud nida sa 40 ka paratukawan pilak — duwa ka paratukawan kada tabla. 25Ti kanaway baliwa Turda ginamitan diman 20 ka tabla. 26Isinul-ud diman sa 40 ka paratukawan pilak — duwa ka paratukawan kada tabla. 27Ti isalpan pag bahagi Turda, imaw ti sa dayuan tunda, liningban nida unum ka tabla, 28ag duwa ka tabla diman sa manga suuk inda. 29Ti manga tabla sa suuk isinad-ang kaayad ginan sa sirung tugka sa tungud sa panab-anan usa ka talinga. Kainda diman ti binwat nida sa duwa ka tabla sa manga suuk. 30Nakan may walu ka tabla sa inda pag bahagi Turda, ag nakasul-ud inda sa 16 ka paratukawan pilak — duwa ka paratukawan sa kada tabla.
31Namuwat diman sida manga tabla akasya para sa lingub — lima baliwa sa kanaway Turda, 32lima diman baliwa sa salatan, lima diman baliwa sa isalpan, sa dayu Turda. 33Ti pangagad sa karaw-an lingub kanda ipinauli ginan sa pudpud Turda atabug sa baliw pudpud. 34Sinaputan nida gintu ti manga tabla ag pinaulian talinga gintu imaw ti pasulungan pangagad sinaput diman gintu.
35Namuwat diman sida limbun linu binurdahan bunang malatuy, dungun ag marara. Binurdahan inda mayad histuda kirubin. 36Namuwat diman sida upat ka tulduk akasya may manga kaw-it gintu, isinad-ang nida ati ti limbun. Ti upat ka tulduk nakasul-ud sa upat ka paratukawan pilak. 37Namuwat sida usa waya ka limbun para sa sabian Turda Tiripnan. Ti ginamit nida pisahan linu binurdahan bunang malatuy, dungun ag marara. Ag marinu gid kay nagburda inda. 38Namuwat diman sida lima ka tulduk may manga kaw-it, isinad-ang nida siyun ti limbun. Ti manga tulduk sinaput gintu hanggan kay manga ulu ag kay bantuyan inda, nakasul-ud inda sa lima ka paratukawan galang.
Currently Selected:
Pag-ighit 36: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
