Pag-ighit 22

Manga Kasuguan tungkul sa manga Kasiyunan

1“Nu ti usa ka tawu nanakaw baka ngatay karanidu, bag-u iniyaw niya inda ngatay ipinabili, kailangan magbayad siya. Sa usa ka baka kay tinakaw, bumayad siya lima ka baka. Ag sa usa ka karanidu kay tinakaw, bumayad siya upat ka karanidu.

2“Nu nanakaw siya sa yabi ag nadakup sa aktu, bag-u minatay siya, unman may saragtun ti nakamatay sa kanya. 3Dapat nu nangyari inda sa sirang, ti nakamatay sa mananakaw may saragtun.

“Ti mananakaw nadakup kailangan bumayad sa kay tinakaw. Nu unman siya may ibayad, ipabili siya bilang panawuhun ag kay kabilyanan ti ibayad sa kay tinakaw. 4Nu baka una asnu ngatay karanidu ti tinakaw niya ag naalaman asan waya sa kanya ag buhi waya, bayadan niya inda dubli.

5“Nu ti hayup usa ka tawu pinabay-anan makaharab tanum kaparihu, kailangan bayadan may apu hayup ti hinarab pag tanum ginan sa pinakamayad pag tubas niya tanman ngatay niya ubasan.

6“Nu may nanutud ag nanlamay ti apuy sa marikut tugka sa taranuman iba tawu, kailangan bayadan nanutud ti manga tanum nadaut.

7“Nu namahamnu ti usa ka tawu kuwarta ngatay una hintay pag bagay sa balay niya kamalay ag tinakaw inda, kailangan bumayad dubli ti tawu nanakaw nu siya nadakup. 8Dapat nu balaw nadakup ti tawu nanakaw, umatubang sa atubangan Diyus#22:8 Diyus: ngatay, manga takinan. ti piniyaran nanhamnu hampay maalaman nu bin-ul niya ngatay unman ti ipinahamnu sa kanya.

9“Nu may tawu mag-aratwan nu si unu sa kanda ti may apu usa ka kasiyunan parihu sa baka, asnu, karanidu, rutay ngatay una hintay pag bagay, kailangan daran-un nida kanda kasu sa atubangan Diyus.#22:9 atubangan Diyus: ngatay, manga takinan. Ti tawu nagsalan angay sa pasya Diyus manbayad dubli sa tutuu may apu.

10“Nu ipinaalaga usa ka tawu kay asnu, baka, karanidu, ngatay una hintay pag hayup sa kay kamalay, ag namatay inda, ngatay nabiyagan ngatay nadura unman may nakakit, 11kailangan umatag ti nag-alaga sa atubangan Panginuun ag manumpa unman siya may alam tungkul sa nangyari. Kailangan inda paniwalaan may apu, ag balaw siya pabayadun. 12Dapat nu tinakaw ti hayup, kailangan bumayad sa kay may apu ti nag-alaga. 13Nu ti hayup minatay usa ka maisug pag hayup, kailangan daran-un ti nasawad pag bahagi hayup bilang patutuu, ag unman yi niya inda kailangan bayadan.

14“Nu may nangudam hayup sa kay kamalay ag nabiyagan inda ngatay namatay, ag balaw siyun kay may apu pagka nangyari inda, kailangan inda bayadan nangudam. 15Dapat nu siyun kay may apu pagka nangyari inda, unman manbayad ti nangudam. Nu inupahan ti hayup, ti ibinayad pag kuwarta imaw ti kabaydanan sa nabiyagan ngatay namatay pag hayup.

Ti Tuhay waya pag manga Kasuguan

16“Nu dinaya usa ka lalaki ti daraga unman waya ikinasal, ag kay inulid, kailangan bayadan lalaki ti magtal-anakan daraga, angay sa hagadun pag halaga, ag kay yi asawahun ti daraga. 17Nu unman gid magpasnu ti ama daraga ipakaun kay anak hampay kay yi asawa tida pag lalaki, bumayad maan ti lalaki angay sa kanda hagadun pag halaga.

18“Ti panhirian kailangan matyun.

19“Una si unu ti man-garaw sa hayup kailangan matyun.

20“Una si unu ti manhandug sa tuhay pag diyus purya sa kangku kailangan matyun.#22:20 kailangan matyun: Sa bagaw Hibriyu, kay ibug sabihun manga ipinakaun sa Panginuun sa panab-anan paghandug ngatay pagpadamhak siyun.

21“Danga niyu paghigpiti ti manga day-uhan#22:21 manga day-uhan: Kay ibug sabihun, manga balaw Israilita mag-ulian sa Israil. dahil manga day-uhan diman kamu kaybi sa Ihiptu.

22“Danga pag-apiha ti manga buranday babayi hanggan ti manga ilu. 23Nu buwatun niyu inda, ag manhagad sida awat sa kangku, pihu awatan niku sida. 24Mangisug gid aku sa kanyu ag matyun niku kamu sa girahan.#22:24 girahan: sa Hibriyu, baladaw. Maburanday kanyu manga asawa ag maulila kanyu manga anak.

25“Nu mamaudam kamu kuwarta una sa kantapu pag nasakupan niku pugri, danga niyu pagpatubui parihu sa pagbuwatun manugpaudam kuwarta. 26Nu bul-un niyu ti kulimpay niyu kaparihu bilang garantiya kuntay manbayad siya sa kay utang sa kanmu, iuli nimu inda sa kanya bag-u misalup ti init. 27Dahil inda lang kay pangumut sa kay bilug nu magkaturug siya sa yabi. Nu manhagad siya awat sa kangku, awatan niku siya dahil maawaun aku.

28“Danga paglabaga niyu ti Diyus, danga pagsaadi kanyu takinan.

29“Danga niyu pagkalimti magpakaun manga handug sa kangku ginan sa kanyu manga patubas, pin-gis ubas, ag lana ulibu.

“Ipakaun niyu sa kangku kanyu panganay pag manga anak lalaki, 30katunda diman ti panganay pag manga baka ag karanidu. Kailangan matayak sa kay ina ti bag-u lusad pag baka hanggan karanidu sa sulud pitu ka sirang. Sa ikawalu pag sirang, mahimu yi inda ihandug sa kangku.

31“Kamu ti ipinablag pag manga nasakupan niku, nakan danga kamu magkaun taguban una hintay pag hayup minatay maisug hayup. Pakan-an niyu tunda sa idu.

Currently Selected:

Pag-ighit 22: HNN

Highlight

Copy

Compare