Pag-ighit 21

Ti Pagpalpas sa manga Panawuhun

(Diyut. 15:12-18)

1Magkun ti Panginuun sa kan Muysis, “Inda ti manga surundanun kanmu ipatupad sa manga Israilita:

2“Nu manbili kamu panawuhun Hibriyu, manirbi siya sa kanyu sa sulud unum ka timpu. Dapat sa ikapitu pag timpu, makakalpas yi siya sa pagkapanawuhun unman may bayadan. 3Nu binili niyu siya unman may asawa dapat igu dugay nakaasawa, siya lang ti makakalpas sa ikapitu pag timpu. Dapat nu may asawa yi siya sa kanyu nagbili makakalpas diman kay asawa kaibahan niya. 4Nu pinakan-an siya niya amu arasawan-un ag nagkaanak sida, makakalpas di siya sa ikapitu pag timpu, dapat kay asawa hanggan kay manga anak matayak di sa kay amu.

5“Dapat nu sabihun panawuhun pagmahalun niya kay amu, kay asawa ag kay manga anak, ag balaw magkaibug makakalpas, 6daran-un siya niya amu sa atubangan Diyus.#21:6 Diyus: ngatay, manga takinan. Ag ati sa may sabian ngatay bakalan pag tuhuan niya amu kay tuli, bag-u suruguun yi siya niya amu sa buu niya buhi.

7“Nu ipabili usa ka tawu kay anak babayi hampay buwatun panawuhun, unman siya makakalpas sa ikapitu pag timpu parihu sa manga panawuhun lalaki. 8Nu balaw magkaangayan siya niya amu imaw ti nagbili sa kanya, mahimu di siya lukatun niya magtal-anakan. Dapat unman mahimu ipabili niya amu sa manga day-uhan, dahil kay amu ti nagdayu sa kanya. 9Nu ipakaun amu inda pag panawuhun sa kay anak bilang asawa, kailangan pag ga kay anak diman babayi kay magkilala sa kanya. 10Nu kay inasawa gid ti panawuhun, ag nangasawa waya siya sa iba pag babayi, kailangan iparargu di niya ti pagpakaun sa kanya manga karan-unun ag rutay, hanggan ti pag-ulid sa kanya. 11Nu balaw niya masunud inda pag tulu ka kalasi, mahimu yi umighit ti babayi unman may bayadan.

Kasuguan tungkul sa Magbuwat Daut

12“Una si unu ti manakit ag makamatay tawu kailangan diman matyun. 13Dapat nu balaw niya inda tinikis ag pinasnuan niku inda mangyari, makapalagiw siya sa buwatun niku darangpan pag rugar. 14Dapat nu tinikis niya ag ginayak ti pagmatay, matyun niyu siya una pumakarani waya siya sa kang harandugan.

15“Una si unu ti manakit#21:15 manakit: ngatay, manmatay. sa kay ama ngatay ina kailangan matyun.

16“Una si unu ti magtagu sa usa ka tawu kailangan matyun, una ipinabili yi niya inda ngatay unman waya.

17“Una si unu ti magsaad sa kay ama ngatay ina kailangan matyun.

18“Nangus nan-arawayan ti duwa ka tawu, ag sinuntuk usa ngatay binintuk batu kay kalaban ag unman yi inda makabangun dapat balaw namatay, 19nu sa uryan baliwa makabangun di siya ag makalakaw, una magsugkud lang, ti tawu nakasakit sa kanya balaw parusahan. Dapat kailangan bayadan siya tawu nakasakit sa kanya para sa panahun nauyang dahil sa kay pagkabalda, ag kailangan alagaan siya niya tugka sa umayad.

20“Nu pinulpug usa ka tawu kay panawuhun, lalaki ngatay babayi, ag kadaka inda namatay, kailangan siya parusahan. 21Dapat nu unman namatay ti panawuhun ag nakabangun di tunda pagkalawuy usa ngatay duwa ka sirang, balaw siya parusahan dahil siya ti may apu sa panawuhun.

22“Nu may mag-arawayan ag may nasaktan usa ka buduyin, bag-u nanganak balaw sa kay udas,#21:22 nanganak balaw sa kay udas: ngatay, naagasan. dapat unman may daut nangyari sa kanya, pabayadun ti nakasakit sa halaga hagadun asawa babayi angay sa kagustuhan manughusay. 23Dapat nu masyadu ti nangyari sa babayi, parusahan ti nakabuwat inda parihu sa nangyari sa babayi. Nu namatay ti babayi, matyun diman siya. 24Nu nabuta ti babayi, butaun diman siya. Nu napuil ti ngipun babayi, puilun diman ti ngipun niya. Nu nabari ti kamang ngatay lulud, bariun diman ti kamang ngatay lulud niya. 25Nu napali, paliun diman siya. Nu nabiyagan, biyagan diman siya. Nu nagarusan, garusun diman siya.

26“Nu sinuntuk amu kay panawuhun lalaki ngatay babayi sa kay mata ag nabuta inda, palpasan niya siya sa kay pagkapanawuhun bilang kabaydanan sa mata kay binuta. 27Nu napuil niya ti ngipun niya panawuhun lalaki ngatay babayi, palpasan diman niya siya sa pagkapanawuhun bilang bayad sa ngipun napuil niya.

28“Nu ti tudu baka nakasungay tawu, lalaki ngatay babayi, ag namatay inda pag tawu, kailangan bintukun ti tudu tugka sa mamatay, ag balaw mahimu kan-un kay taguban, dapat unman may saragtun ti may apu tudu. 29Dapat nu naanad yi magpanungay tawu ti tudu ag pinakan-an yi pasandam kay may apu tungkul siti, dapat pinabay-anan lang niya ti tudu, bag-u nakamatay inda tawu, kailangan bintukun inda tugka sa mamatay ag matyun diman kay may apu. 30Dapat nu pabayadun ti may apu hampay balaw mamatay, kailangan bayadan niya nu pira kay paghagadun sa kanya. 31Kainda diman ti surundanun nu nakasungay anak ti tudu, una lalaki ngatay babayi. 32Nu nakasungay panawuhun ti tudu, lalaki ngatay babayi, kailangan bumayad ti may apu 30 ka pulud pilak sa amu panawuhun, ag kailangan bintukun ti tudu baka tugka sa mamatay.

33“Nu may tawu nagbuul taklub bubun ag unman niya inda tinakluban, bag-u may nalagpak baka ngatay asnu ati sa bubun, 34kailangan magbayad ti may apu bubun sa may apu hayup, ag kanya yi ti namatay pag hayup.

35“Nu ti tudu baka usa ka tawu nakamatay tudu iba, ipabili duwa ka may apu ti buhi pag tudu ag tungaun nida kay kabaydanan. Tungaun diman nida kay taguban ti namatay pag tudu. 36Nu naanad yi magpanungay ti tudu nakamatay bag-u pinabay-anan lang inda may apu, kailangan bumayad ti may apu usa ka tudu kabalyu sa namatay, ag kanya yi ti namatay pag tudu.

Currently Selected:

Pag-ighit 21: HNN

Highlight

Copy

Compare