Pag-ighit 19
19
Ti manga Israilita sa Bantud Sinai
1-2Nighit ti manga Israilita sa Ripidim ag nag-ati sa pangawakawaan Sinai. Ati sa atubangan bantud sida pag nagkampu. Ikatlu tunda pag bulan ginan sa kanda pag-ighit sa Ihiptu.
3Tinmukad si Muysis sa bantud hampay manpasampak sa Diyus. Tinawagan siya Panginuun ati sa bantud ag sinabi, “Inda ti sabihun nimu sa manga Israilita sa kay linahi ni Hakub: 4‘Nakitan gid niyu nu hintay kang binwat sa manga Ihipsiyu, ag nu kabitay kamu niku dinara sitay tag sa kangku, parihu sa pagdara agila sa kay manga pispis sa panab-anan niya manga pakpak. 5Nu lubus niyu aku sundun ag tupadun kang kasunduan, piliun niku kamu sa tanan pag nasyun. Buwatun niku kamu kang mahalaga pag manga nasakupan. Kangku ti buu kalibutan, 6dapat piliun niku kamu hampay kang yi manga nasakupan, ag bumaliw kamu usa ka kaharian magsirbi sa kangku bilang manga manughandug.’ Inda ti sabihun nimu sa manga Israilita.”
7Nakan linmus-ug si Muysis ginan sa bantud ag ipinatawag niya ti manga paggurangunun manga Israilita bag-u sinabi sa kanda ti sinabi Panginuun. 8Ag durungan sinmagut ti tanan tawu, “Sundun nimi ti tanan pagsabihun Panginuun.” Bag-u sinabi ni Muysis sa Panginuun ti sagut manga tawu.
9Magkun ti Panginuun sa kan Muysis, “Asantag aku sa kanmu sa panab-anan madamul pag rurum hampay madnugan manga tawu kang maghampang sa kanmu, ag hampay pirmi sida magsarig sa kanmu.”
Bag-u igu nasabi ni Muysis sa Panginuun ti sagut manga tawu, 10magkun waya ti Panginuun sa kanya, “Atiha nimu ti manga tawu ag sabiha sa kanda lumpiyuha kanda sadili#19:10 lumpiyuha kanda sadili: Kay ibug sabihun, buwatun nida ti buruwatun sa paglumpiyu. taynguna hanggan aldaw. Kailangan pipian nida kanda manga rutay. 11Pihua alistu sida sa ikatlu pag sirang, dahil sa ati pag sirang, aku, ti Panginuun, dumugsun sa Bantud Sinai sa mag-akitan tanan tawu. 12Pagpauli kawu tanda sa sangput bantud nu naan lang tugka pag tumindug ti manga tawu. Sabihun nimu sa kanda danga sida magtukad ngatay pumakarani sa bantud. Matyun gid una si unu ti pumakarani sa bantud, 13tawu man ngatay hayup. Bintukun gid siya ngatay panaun; balaw diman may umigpil sa kanya. Makatukad lang ti manga tawu sa bantud nu ipatunug yi dugay ti budyung.”
14Naglus-ug si Muysis sa bantud ag sinugu niya ti manga tawu lumpiyuha kanda sadili. Bag-u pinipian manga tawu kanda manga rutay. 15Magkun si Muysis sa kanda, “Ialistu niyu kanyu manga sadili sa ikatlu pag sirang; danga dapu kamu mag-ulid sa kanyu asawa.”
16Pagka nasurip ikatlu pag sirang, nanlinti ag kinmilat, bag-u may madamul pag rurum sinmaput sa bantud ag nadnugan ti matnug pag tunug budyung. Tinakigan sa dala ti tanan tawu sa kampu. 17Bag-u dinara ni Muysis ti manga tawu sa luwas kampu hampay pumasampak sa Diyus, tinmindug sida sa sugkad bantud. 18Nasaput anus ti Bantud Sinai dahil dinmugsun ati ti Panginuun sa histuda apuy. Napatungud ti anus parihu sa anus ginan sa pugun ag natandug mabisug ti bantud,#19:18 natandug mabisug ti bantud: Sa iba pag kupya sa Hibriyu hanggan sa Septuagint, nangirkirug gid ti tanan tawu. 19ag lalu waya nagmatnug ti tunug budyung. Nagbagaw si Muysis ag sinagut siya Diyus sa panab-anan linti.#19:19 sa panab-anan linti: ngatay, sa matnug pag busis.
20Dinmugsun ti Panginuun sa babaw Bantud Sinai, ag sinabi niya sa kan Muysis pagtukad sa babaw bantud. Nakan tinmukad ngani si Muysis, 21bag-u magkun sa kanya ti Panginuun, “Paglus-ug kawu sa lawud ag pasandami nimu ti manga tawu danga maglampas sa ipinauli katugkaan sa sangput bantud agud bantayan aku, dahil nu buwatun nida inda, mayamu sa kanda ti mamatay. 22Una ti manga manughandug pirmi magpakarani sa atubangan niku kailangan paglumpiyu kanda sadili dahil nu unman, parusahan diman niku sida.”
23Magkun si Muysis sa Panginuun, “Unman duy makatukad ti manga tawu sa bantud dahil kawu yi ti nagpasandam sa kanmi kuntay paulii tanda ti palibut bantud nu naan lang tugka kami pag tumindug. Kilalan-un nimi banal ti bantud.”
24Magkun sa kanya ti Panginuun, “Paglus-ug kawu ag daran-a sitay si Aarun. Dapat ti manga manughandug hanggan ti manga tawu unman kailangan umataytag sa kangku, dahil nu umataytag parusahan gid niku sida.”
25Nakan linmus-ug si Muysis ag sinabihan ti manga tawu.
Currently Selected:
Pag-ighit 19: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
