Pag-ighit 18
18
Sinabang ni Hitru si Muysis
1Nabaritaan ni Hitru, manughandug sa Midyan ag manugang ni Muysis, ti tanan binwat Diyus sa kan Muysis hanggan sa kay nasakupan Israilita. Nabaritaan niya nu kabitay ipinalwas Panginuun ti manga Israilita sa Ihiptu.
2-3Ati katpung pinauli ni Muysis kay asawa si Sipura hanggan kay duwa ka anak lalaki tabug sa kay manugang sa kan Hitru. Kay ngaran niya usa ka anak si Girsum,#18:2-3 Girsum: Kay ibug sabihun sa Hibriyu, day-uhan ati. dahil pagka inanak siya, magkun si Muysis, “Day-uhan aku sa iba daga.” 4Kay pangadwa si Iliyisir,#18:4 Iliyisir: Kay ibug sabihun sa Hibriyu, Ti Diyus ti mag-awat. dahil pagka inanak siya, magkun si Muysis, “Ti Diyus niku ama#18:4 ama: ngatay, ginurang. ti mag-awat sa kangku. Irinibri niya aku sa baladaw hari Ihiptu.”
5Taynguna, nag-atag si Hitru hanggan kay asawa ni Muysis ag ti duwa nida ka anak sa pagkampuhan ni Muysis sa pangawakawaan, arani sa bantud Diyus. 6Nagpaalam yi si Hitru sa kan Muysis kuntay rumas-ug siya kaibahan si Sipura hanggan kay duwa ka anak.
7Nakan sinulang ni Muysis kay manugang, yinmuk-ub siya ag nangaruk bilang paggalang sa kanya. Nangaramustahan sida bag-u sinmulud yi sa turda. 8Itinultul ni Muysis sa kan Hitru ti tanan binwat Panginuun sa hari Ihiptu hanggan sa manga Ihipsiyu para sa manga Israilita. Itinultul diman niya ti tanan nida nalakawan pag kakurian sa kanda maglakaw ag nu kabitay sida irinibri Panginuun.
9Magbaya gid si Hitru sa tanan binwat kaayadan Panginuun sa manga Israilita pagka irinibri niya sida sa kamang manga Ihipsiyu. 10Magkun si Hitru, “Dayawun ti Panginuun, ti nagribri sa kanyu sa kamang manga Ihipsiyu ag sa hari nida. 11Naalaman niku taynguna mas makamaskihan ti Panginuun sa tanan diyus, dahil irinibri niya ti manga Israilita sa manga Ihipsiyu mag-api sa kanda.” 12Bag-u nagpakaun si Hitru manga handug pagsunugun ag tuhay waya pag manga handug sa Diyus. Pagka pagbuwatun niya inda, rinmas-ug si Aarun hanggan ti tanan manugpamahala sa Israil. Sinmaru sida sa kan Hitru hampay mangaun sa atubangan Diyus.
Nagpili si Muysis manga Manughusay
(Diyut. 1:9-18)
13Pagka nasurip, tinmukaw si Muysis bilang manughusay hampay patingihan ti kasu manga tawu. Mahanayan ti manga tawu sa kay atubangan ginan surip tugka sa yabi. 14Pagka nakitan inda ni Hitru, magkun siya sa kan Muysis, “Hayga pagbuwatun nimu inda para sa manga tawu? Mahanayan ti manga tawu sa kanmu atubangan ginan surip tugka sa yabi.”
15Sinmagut si Muysis, “Pagbuwatun niku inda dahil magpakarani ti manga tawu sa kangku hampay maalaman ti kagustuhan Diyus. 16Nu mag-aratwan ti manga tawu, pagdaran-un nida inda sa kangku, ag aku ti maghusay nu si unu sa kanda ti hustu. Bag-u pagtudluan niku sida manga surundanun hanggan manga sugu Diyus.”
17Magkun si Hitru, “Balaw duy kang-ud inda kanmu palakaw. 18Subra nimu pagpakurianan kanmu sadili hanggan ti manga tawu. Mabuyat inda para sa kanmu; unman nimu inda mabuwat kawu lang usa. 19Pagpatingi kawu sa kangku, patigayunun kawu niku, mana ibahan kawu Diyus. Iparargu nimu kanmu pagbuwatun magpakarani sa Diyus para sa manga tawu. Daran-a nimu kanda kasu sa kanya. 20Iparargu diman nimu ti pagtudlu manga surundanun hanggan manga sugu Diyus sa kanda. Tudlui nimu sida nu kabitay mangabuhi ag nu hintay kanda buwatun. 21Dapat pagpili kawu manga tawu makaawat sa kanmu. Kailangan may imaw sida kakayahan maghusay, may dala sa Diyus, makatiwalaan, ag unman magtanggap suhul. Buwatun nimu sida tagahusay sa kada gurupu sa tig 1,000, 100, 50 ag 10 ka tawu. 22Manirbi sida bilang manga manughusay sa tanan pag udas. Sida ti maghusay sa maragaan pag kasu, dapat daran-un nida sa kanmu ti marabuyat pag kasu. Sa kainda pag palakaw, gumaan ti buruwatun nimu dahil maawatan kawu nida. 23Alam niku inda ti gustu Diyus kanmu buwatun, nu sundun nimu inda, udyi kawu makurian. Ag makauli inda pag manga tawu may kahusayan.”
24Sinunud ni Muysis ti patigayun sa kanya niya manugang. 25Pinmili siya sa manga Israilita manga tawu may kakayahan maghusay, ag binwat niya sida manga manughusay manga gurupu sa tig 1,000, 100, 50 ag 10 ka tawu. 26Nagsirbi sida sa manga tawu bilang manga manughusay sa tanan pag udas. Sida ti maghusay sa maragaan pag kasu, dapat nu marabuyat pagdaran-un nida inda sa kan Muysis.
27Bag-u pinasnuan ni Muysis kay manugang bumalik sa kay sadili nasyun.
Currently Selected:
Pag-ighit 18: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
