Pag-ighit 16
16
Ti Mana pag Karan-unun hanggan manga Pugu
1Ginan sa Ilim, naparargu sa paglakaw ti manga Israilita tugka sa nakaras-ug sida sa pangawakawaan Sin, sa karaw-an Ilim ag Sinai. Nakaras-ug sida ati sa ika-15 pag sirang sa ikadwa pag bulan ginan sa nakalwas sida sa Ihiptu. 2Ati sa pangawakawaan, nagriklamu ti buu nasakupan Israil sa kanda ni Muysis ag ni Aarun. 3Magkun sida, “Mayad waya minatay yi lang kami Panginuun sa Ihiptu! Ati una kabitay makakaun kami taguban hanggan tanan nimi pagkaibgan pag karan-unun. Dapat taynguna dinara niyu kami sitay sa pangawakawaan hampay mamatay sa lun-us.”
4Magkun ti Panginuun sa kan Muysis, “Pagpatingi kawu! Pumauran aku karan-unun ginan sa langit para sa kanyu. Kada sirang, mamunpun ti manga Israilita kanda karan-unun sa tunda lang pag sirang. Siyun pag makitan niku nu sundun nida ngatay unman kang manga sugu. 5Sabihun nimu sa kanda dublihun nida ti bul-un pag karan-unun sa kada ikan-um pag sirang kada duminggu.”
6Nakan sinabi nida ni Muysis ni Aarun sa tanan Israilita, “Taynguna pag yabi, maalaman niyu ti Panginuun ti nagpalwas sa kanyu sa Ihiptu, 7ag aldaw pag surip, makitan niyu ti kadayawan Panginuun. Dahil nadnugan niya kanyu manga riklamu. Si unu gid kami hampay manriklamu kamu sa kanmi? Kay tutuu, ti Panginuun kanyu pagriklamuhan.” 8Magkun waya si Muysis, “Pakan-an kamu Panginuun taguban kanyu kan-un nu yabi ag busugun niya kamu tinapay sa surip, dahil nadnugan niya kanyu manga riklamu sa kanya. Balaw kamu sa kanmi pag magriklamu nu unman sa Panginuun. Si unu gid kami hampay kanyu riklamuhan?”
9Magkun si Muysis sa kan Aarun, “Sabiha nimu sa buu nasakupan Israil pagpakarani sida sa atubangan Panginuun dahil nadnugan niya kanda manga riklamu.”
10Habang magbagaw si Aarun sa buu nasakupan Israil, namantay sida sa pangawakawaan, nakitan nida ti kadayawan Panginuun sa rurum. 11Magkun ti Panginuun sa kan Muysis, 12“Nadnugan niku ti manga riklamu manga Israilita. Sabiha nimu sa kanda kada yabi makakaun sida taguban ag kada surip pagpakabusug sida tinapay. Sa katida maalaman niyu aku ti Panginuun niyu Diyus.”
13Pagka maghugut marukirum yi, nagrugpu ti mayamu pag pugu ag harus matabunan ti buu kampu. Igu surip, nabasa tun-ug ti buu kampu. 14Pagka namara ti tun-ug, may nakitan sida maranipis pag bagay malagti gid sa daga. 15Unman nida alam nu hintay tida, nakan namaraingan-an sida, “Hintay nguna tunda?” Magkun si Muysis sa kanda, “Tunda ti karan-unun kay ipinakaun Panginuun sa kanyu hampay kanyu kan-un. 16Magkun ti Panginuun ti kada usa sa kanyu pagpunpun angay sa kanyu kailangan: usa ka gantang kada tawu.”
17Nakan namunpun karan-unun ti manga Israilita; mayamu ti napunpun iba habang ti iba waydi pira-pira lang. 18Pagka kanda tinakal inda, usa ka gantang ti kada tawu. Unman nagsubra ti nakapunpun mayamu ag unman diman kinurang ti nakapunpun pira-pira. Kang-ud kang-ud lang ti napunpun kada usa.
19Magkun si Muysis sa kanda, “Danga may magsawad inda para sa sunud pag sirang.” 20Dapat ti iba sa kanda unman nagpatingi sa kan Muysis, nagsawad sida para sa sunud pag sirang. Pagka nasurip, sinapatan inda ag namawu. Nakan nagalit si Muysis sa kanda.
21Kada surip, magpunpun sida angay sa kanda pangailangan. Nu mainit yi, magkatunas ti balaw nida napunpun pag karan-unun. 22Sa ikan-um pag sirang kanda pag punpunun — duwa ka gantang ti kada tawu. Nakan nag-atag ti manga takinan nasakupan Israil sa kan Muysis ag namaingana nu hayga dubli. 23Magkun si Muysis sa kanda, “Pag-isugu Panginuun pagpahari kamu aldaw dahil inda ti Sirang Pamahari, banal pag sirang para sa Panginuun. Nakan tamaa yi ti gustu niyu tamaun, ag gulaya ti gustu niyu gulayun. Ti masawad alistuhan para aldaw surip.”
24Nakan sinawadan nida inda para sa sunud pag sirang angay sa isinugu ni Muysis. Igu sa sunud pag sirang unman inda sinapatan ngatay namawu.
25Magkun si Muysis sa kanda, “Kan-un niyu kainda tunda, dahil taynguna ti Sirang Pamahari para sa Panginuun. Unman kamu may makitan tunda taynguna sa daga. 26Makab-ul kamu inda pag karan-unun sa sulud unum lang ka sirang, dapat sa ikapitu pag sirang pagpahari kamu. Sa tida pag sirang, unman kamu may mab-ul karan-unun.”
27May manga tawu waya gid linmuwas hampay mam-ul karan-unun sa ikapitu pag sirang, dapat unman sida may nakitan. 28Ag magkun ti Panginuun sa kan Muysis, “Tugka kapira waya inda pag nasakupan maglabag sa kang manga sugu hanggan manga tudlu? 29Alalahana niyu pinakan-an niku kamu Sirang Pamahari, nakan kada ikan-um pag sirang pagdublihun niku kanyu karan-unun. Kailangan pumirmaminti sa kay ulian ti kada usa sa ikapitu pag sirang. Unman may lumuwas hampay mam-ul karan-unun.” 30Nakan nagpahari ti manga tawu sa ikapitu pag sirang.
31Iningarnan manga Israilita ti karan-unun mana. Inda ga dariit ag malagti pag but-ul, ag matagsing parihu sa manipis pag tinapay may daykut. 32Magkun sa kanda si Muysis, “Pag-isugu Panginuun paghamnu kamu usa ka gantang mana para sa sunud pag manga sinulput tawu, hampay makitan nida ti karan-unun ipinakaun niya sa kanyu sa pangawakawaan pagka ipinalwas niya kamu sa Ihiptu.”
33Magkun si Muysis sa kan Aarun, “Pagbuul kawu sukadan ag sukadi nimu inda usa ka gantang mana. Pagkatapus, ipauli nimu inda sa atubangan Panginuun para sa sunud pag manga sinulput tawu.” 34Sinunud ngani inda ni Aarun angay sa sinabi Panginuun sa kan Muysis. Ipinauli ni Aarun ti mana sa Kaban Kasunduan#16:34 Kaban Kasunduan: Pag-ingarnan diman inda Kaban Kasuguan. Bantayi ti Listahan manga Bagaw sa dayu. agud itagu. 35Nagkaun mana ti manga Israilita sa sulud upatpulu ka timpu, tugka sa nakaaput sida sa kanda ulianan pag daga sa Kanaan. 36(Kada sirang ti kada usa sa kanda magtipun mana, manga usa ka gantang.)
Currently Selected:
Pag-ighit 16: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
