Pag-ighit 15
15
Ti Kanta ni Muysis
1Kinmanta si Muysis hanggan ti manga Israilita inda pag kanta sa Panginuun:
“Kantahan niku ti Panginuun dahil lubus siya magpanalu.
Iyinamut niya sa dagat ti manga kabayu hanggan ti manga masakyan siyun.
2Ti Panginuun ti magpakaun sa kangku bisug,
ag siya kang pagkantahun.
Siya ti nagribri sa kangku.
Siya kang Diyus, dayawun niku siya.
Siya ti Diyus niku ama,#15:2 ama: ngatay, ginurang. pag-ipaabwat niku siya.
3 Panginuun kay ngaran, usa siya ka manuggira.
4Iyinamut niya sa dagat ti manga kalisa hanggan ti manga sundalu hari Ihiptu.
Nalimus ti pinakamadunung pag manga takinan hari Ihiptu sa Dagat Marara.
5Nalimus sida sa abasad pag danum;
nitalnud sida sa kaabasad-basadan parihu sa usa ka batu.
6 Panginuun, lubus gid kanmu kamaskihan;
sa panab-anan inda, rinunut nimu ti manga kalaban.
7Sa kanmu kamaskihan rinuris nimu ti maglaban sa kanmu.
Pag-iparanas nimu sa kanda kanmu pangagalit, parihu sida sa uhut magkasunug.
8Sa usa lang ka uyup nimu, naayaw ti danum.
Ti magpaywas danum napinpin ag tinmindug ga alad batu;
namara ti abasad pag dagat.
9Magkun ti kalaban magpayabang,
‘Lagsun niku sida ag dakpun;
ayaw-ayawun niku kanda kayamanan ag pasawaan niku kang sadili.
Gabutun niku kang baladaw ag rurisun sida.’
10Dapat sa usa lang nimu ka uyup, nalimus sida sa dagat.
Nitalnud sida sa kaabasad-basadan parihu sa timga.
11 Panginuun, si unu waya pag diyus ti parihu sa kanmu?
Unman kawu may kaparihu sa kabanalan ag kamaskihan.
Kawu lang ti Diyus ti magbuwat makadululaw pag bagay!
12Sa panab-anan nimu kamaskihan,#15:12 Sa panab-anan nimu kamaskihan: sa Hibriyu, Inantay nimu kanmu sikun pag kamang. kinaun daga kanmi manga kalaban.
13Sa panab-anan nimu parargu pag pagmahal, ibahan nimu kanmu irinibri pag nasakupan.
Sa panab-anan nimu bisug, ibahan nimu sida sa banal nimu pag ulian.
14Madnugan inda manga nasyun ag takigan sida sa dala.
Dalaun gid masyadu ti manga Pilistiyu.
15Ti manga takinan Idum ag Muab takigan sa dala,
ag ti manga takinan#15:15 takinan: ngatay, nasakupan. Kanaan himatayun sa dala.
16Tutuu, dalaun gid sida.
Sa panab-anan nimu bantug pag kamaskihan, bumaliw sida ga batu unman makatandug,
tugka sa makalawuy kanmu irinibri pag nasakupan, Panginuun.
17Daran-un nimu kanmu nasakupan sa kanmu daga,
bag-u ipatahan nimu sida sa magkaapu nimu pag bantud —
ti binwat nimu ulian pag rugar, Panginuun,
ti Balay Diyus kawu gid ngap ti nagbuwat.
18Humari kawu, Panginuun, hanggan waya aban.”
19Tinakbunan Panginuun danum ti manga kabayu, manga kalisa hanggan ti manga manugkabayu hari Ihiptu igu nakadipay ti manga Israilita sa mamara pag daga sa karaw-an dagat.
20Si Miryam usa ka purupita kay patar-ari ni Aarun, nam-ul pamakaransing ag pinangunahan niya ti manga babayi magpatunug pamakaransing hanggan magsayaw. 21Kinanta ni Miryam inda pag kanta sa kanda:
“Pagkanta kamu sa Panginuun dahil lubus siya magpanalu.
Iyinamut niya sa dagat ti manga kabayu hanggan ti manga masakyan siyun.”
Ti Mapait pag Danum
22Ginan sa Dagat Marara, dinara ni Muysis ti manga Israilita sa pangawakawaan Sur. Sa sulud tulu ka sirang, naglakaw sida sa pangawakawaan ag unman may nakitan danum. 23Pagka nakaras-ug sida sa Mara, nakakit sida danum, dapat unman nida mainum dahil mapait ti danum. (Inda ti dahilan nu hayga Mara#15:23 Mara: Kay ibug sabihun, mapait. kay ngaran pag rugar.) 24Dahil siyun, nagriklamu ti manga Israilita sa kan Muysis, “Hintay wadi kanta inmun?”
25Nakan nanhagad awat si Muysis sa Panginuun, ag ipinakakit Panginuun sa kanya ti usa ka pulud kayu. Iyinamut inda ni Muysis sa danum ag nab-ul kay pait danum.
Ati pag-ipinakaun Panginuun ti surundanun hanggan ti kasuguan hampay subukan kanda magtupad sa kanya: 26“Nu buu tagipusuun kamu sumunud sa kangku, ti Panginuun niyu Diyus, ag bumuwat mayad sa kang magbantay, ag sundun kang manga kasuguan hanggan surundanun, unman kamu padaran-an niku manga panakitun parihu sa ipinadara niku sa Ihiptu. Aku ti Panginuun kanyu manugbulung.”
27Rinmas-ug sida sa Ilim, nu naan may 12 ka bulbugan ag 70 ka puun palma, ag kinmampu sida arani sa danum.
Currently Selected:
Pag-ighit 15: HNN
Highlight
Copy
Compare
Share
Want to have your highlights saved across all your devices? Sign up or sign in
Copyright © 2023 by OMF International, Philippines
