Galatiye 1
1
Wunakaha dɨ haka Bulus
1Dɨ hake hɨn Bulus kpa-lagbe hɨnə dɨ dorownə shinə, aa ɓwaare, a ama mgban lyanari, shezə Yesu Ma Həmɨnpwa a Yaɓwarən nə a Həmɨnpwa Baatə a maddən gə taane.
2Hɨn ka mbiɗitɨ ji-kottɨnə na gə kaarən ganə kat wunakəwnə hwun ji-kotte a njiya Galatiya. 3Maa wuladəha ka ɗolte dɨ haka Həmɨnpwa Baagəm ka Həmɨmiye Yesu Ma Həmɨnpwa a Yaɓwarən, a nza ɓwaa kəwnə. 4A ndi Yesu ma vədə nəngɨn gələ səhase dam, gə nda dɨmaadəm gə kɨsawnə səhasa nə a vɨratɨnə hɨm a gəmdə ɓəgəng, dɨ ha kanata Həmɨnpwa Baagəm. 5Fukatə kat hɨnggə Həmɨnpwa nə kaaru-kaaru. Amin.
Ləmə feme nə hiɗə kal-kal
6Le ɓwe kəwnə ka ite atɨ tee gbyel ɗəng hwuna ɗaka Həmɨnpwa ma warəwnə dɨ ha wuladəha da Yesu Ma Həmɨnpwa a Yaɓwarən, a mɨna nggur a tɨfə som atɨ sɨnə ləmə feme da Həmɨnpwa, 7shezə aa sɨnə ləmə feməngɨn. Gə imi nə də dɨ tukuttəwnə dɨ viriwownə də diyalə ləmə fema a nə Ma Həmɨnpwa a Yaɓwarən. 8Nagi nda hinə, naasə mgban a malyenə dɨma dɨ pwa, dɨ hiwawnə ka a ləmə femə som ka anə hina boyownə kɨnɨnɨng, maa Həmɨnpwa a ɓashiyə mangɨn! 9Ɓətɨya hina boyo, sə mgban na dɨ mɨna səwnə, na ama nə də dɨ boyownə a ləmə femə som ka anə hwuna luwo kɨnɨnɨng, maa Həmɨnpwa a ɓashiyə mangɨn! 10Hɨnə dɨ səwnə, hɨn taawa ɓəri gə ɓwaare a mwake. Na dɨ ɗa nagi ndo sə gə haa nɨngə Həmɨnpwa ke. Anda gə le da ɓwaare na dɨ pɨrə humwa a dɨ ɓərə gə na ɗɨkə haa nɨngərən ke, taa dɨ nda gəə kɨsa da Ma Həmɨnpwa a Yaɓwarən nə.
Kpa-lagbəwne da Bulus ka gəte Həmɨnpwa a vən
11Ji-nuwo, a hwun myee dɨ koɗə Həmɨnpwa, mwoshinə hwuna lee sate atɨ ləmə fema nə na dɨ hiwa kan aa sa ɓwaara a ɗarən nə. 12Hɨn taa luu ləmə feməngɨn dɨ haka ama, aa ama kəni mgban. Shezə dɨ haka Yesu Ma Həmɨnpwa a Yaɓwarən na luwo, ndi ma bɨli ləngɨn bwang. 13Gə hwun ka nənəngəwnə hwun kɨl wule nzate na nza kɨnɨnɨng a tɨfə kwale da Yawude ka wule tənəte na tənədə ji-kottə. Hɨn ɓərə kɨr-kɨr gə na kɨɗa lyenta Həmɨnpwa. 14A vor hakpanə Yawude kat hɨnə pɨrgə ndeyi ka koddə kwale denə. Na ɗɨkdə na a koɗə kwale da yə sɨnggi. 15Ka mwota Həmɨnpwa, nda nggɨlti a kəpdi ite myaa nda mwasari, nda wari dɨ ha wuladəha dan gəkɨlə na ɗan lyentə. 16Nda bɨli Nzəngɨn bwang gəkɨlə na boyə myee aa Yawude le a nəngɨn. Hɨn taa shalale ka ndəng ma, 17taa pɨrə vor Urshelima mgban gə na ɗɨm naa i kpe-lagbe da Yesu 'ye a humwangi, shezə na pɨrə-pɨrə dɨ njiya Arabiya na ɓə shea mɨna a vɨra Damaska.
18Beetɨ kyawatə mwaakɨn na ɓə shea mɨna a Urshelima gə na ɗɨm naa Bitrus, də na nza hakan a ɗa bətə bəw a mbiɗi-tuf ɓəmbə. 19A vor bətɨngɨn kat, Yakubu mufə Həmɨmiye, sɨnə ma na peyə kan, taa peyi ka ama dɨ vor mbiɗitɨ kpe-lagbe. 20Hɨnə dɨ boyownə wakashi ka Həmɨnpwa, ləməginə na dɨ boyownə taa byelə ɓayə də. 21Beetɨ angɨn na zə njiya Siriya ka njiya Silisiya. 22Itɨngɨn ji-kotte mwaka Ma Həmɨnpwa a Yaɓwarən 'ye a vor njiya Yawudiya aa ndaga peyə ke. 23Kɨlə təna dɨ kɨlə dɨ haka imi atɨ, “Ma dɨ tənədə ji-kottə kɨnɨnɨng, ɓəgəng ɓə ndɨlə dɨ hiwa ɓwaare a nə ɗate tən ɓa ɗa təna mwaka ləmə fema nda dɨ kɨɗan kɨnɨnɨng.” 24Təna ɓondi Həmɨnpwa gələ sa nda ɗa dɨ hake.
Currently Selected:
Galatiye 1: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
