Afise 1
1
1Hɨnə Bulus kpa-lagbe da Yesu Ma Həmɨnpwa a Yaɓwarən dɨ ha kanata Həmɨnpwa.
Hɨnə dɨ wunakəwnə hwun myee Həmɨnpwa a vomiyərən a vor vɨra Afisus,#1.1 I dorshi aa sa atɨ Afisus. a hwun myee dɨ koddə Yesu Ma Həmɨnpwa a Yaɓwarən ka tikɨstə.
2Maa wuladəha ka ɗolte dɨ haka Həmɨnpwa Baagəm ka Həmɨmiye Yesu Ma Həmɨnpwa a Yaɓwarən, a nza ɓwaa kəwnə.
Shi-pepeye mya dɨ ɗɨməm dɨ haka Ma Həmɨnpwa a Yaɓwarən
3Ɓondiyəm Həmɨnpwa ndi Baagə Yesu Həmɨmiye dam Ma Həmɨnpwa a Yaɓwarən. Sɨnə wulakam ka wule pepete a vor pwa ka nagi ndawula pepeti a vor pitə dɨ haka Ma Həmɨnpwa a Yaɓwarən. 4Həmɨnpwa nə nggɨltəm ite myaa nda kwak vɨratə gə hɨm a gəm hiɗə ka Ma Həmɨnpwa a Yaɓwarən, nda nam shet-shet a humwasən taa mgbaalə səhasə kam. Gə mwoha dan, 5kɨnɨnɨng nda nggutəm a gəədəm jingɨn nə dɨ haka Yesu Ma Həmɨnpwa a Yaɓwarən, angɨn kanatɨ dan nə, hanɨngsən nə mgban. 6Həmɨnpwa a ɗaasə gə mya humwan a ndukodən gə fukatə ka wuladəha dan a nda wulakam kan dɨ haka Ma nda dɨ mworən. 7Gələ hɨm nə ɓwaa kan, Həmɨnpwa a dɨmdəm gə kɨsawne dɨ ha zaambəngɨn, a nggurəmgə səhase dam dɨ ha gbaktɨ wuladəha dan, 8nda mɨna pukamdə lele ka leetə kat. 9Hanɨngsən nə nda bɨləm kpəshi kanatɨ dan. Kanasən nə nda ɗaasə dɨ haka Ma Həmɨnpwa a Yaɓwarən. 10Gə fəre kana kənə nda ɗadə shee a paya dərən a pukə Ma Həmɨnpwa a Yaɓwarən a wule shirə gaarə a pwa ka inə ganə a njiya.
11Həmɨnpwa a ɗa shee kat ɓətɨ nda mwo a kanatɨ dan. Gəkɨlə Yesu nda nggɨltəm#1.11 Mɨndəm hɨm nə ɓa mɨn shee dan. hɨm nə mingɨn 'ye nda leerəm kɨnɨnɨng ite myaa nda sɨra vɨratə. 12Nda ɗaasə gə hin Yawude humwan, a hin myee tiya bədə myensenə a haka Ma Həmɨnpwa a Yaɓwarən, hin ɓondi fukatɨ dan. 13Hwun mgban Afise a hwun myee aa hwun Yawude, ite hwuna kɨl ləmə feme da Həmɨnpwa a mwadiyale kan, a ləmə femə mbəha, mya ɗɨkəwnə ɗuwo Pitɨ Ɗəmɗəmtə ite Həmɨnpwa a boyownə le a nəngrə a nzadən sə. 14Pitɨ Ɗəmɗəmtɨngɨn nə kwamətɨ sa Həmɨnpwa a bɨləm atɨ mbak-mbak hɨm ɓa mɨnəmə mbiɗitɨ shee kat a fəra ndi ɓa vəm ɗɨmne də a kpawtə, hɨm myee hɨnggə Həmɨnpwa nə kɨnɨnɨng. Shinə kat gə ɓondiha ka fukasən nə.
Hiwta Bulus gə le da ji-kottə
15Gə-angɨn, ite na kɨl le a nə mwadiyala hwuna gə kan a nə Həmɨmiye Yesu, ka wule mwoha hwuna dɨ bɨlə myee Həmɨnpwa a vomiyərən, 16mba-dɨ-mba na dɨ ɗa Həmɨnpwa usəkətə gə le dəwnə, myenshi aawa nggurgəwnə a vor hiwtɨ de. 17Mba-dɨ-mba na dɨ nyisə Baagə Həmɨmiye dam Yesu Ma Həmɨnpwa a Yaɓwarən, a Baate ka fukatə kan. Hiwtɨ de nə atɨ nda vəwnə pitɨ lele, a wunəwnə diya gə hwuna leerən. 18Hiwtɨ de mgban nə atɨ nda wuna kwa-hubosəwnə gə hwuna lee mgbaalə bəə myente nda warəwnə a vorsə ka fukatɨ gɨnətɨ shee hwun ɓa mɨnərən ɓwaa ka myee nda vomiyərən. 19Mwoshinə hwuna leyə atɨ, wule gbaktɨ gəte nda gə kaarə ite taa iti tɨlkarə, ite dɨ lyeni kam hɨm myee mwakan. Gətɨngɨn nə ite bɨldə lyentɨ gbaktɨ maase dan. 20Wule gətɨngɨn nə nda ɗa lyentə kaarə a maddə Ma Həmɨnpwa a Yaɓwarən gə we ka myentə, a nzadən a tɨfə zɨməngən gaarə a vor pwa. 21Ma Həmɨnpwa a Yaɓwarən nə həmne ka gətə ka nyerəte a vor pitə kat. Gəte a vor kwakɨngɨn nə pɨrgə nagi ndo kwakə a nzatɨnə ɓəgəng kat ka ite ɓaga shi. 22Həmɨnpwa a ɗɨkdə nagi ndo sə a pukəngɨn. A ɗɨkdən nda gəə sɨnə ne a nə nagi ndo sə kat gələ petɨ ji-kottə. 23Gələ tənə sɨsən, sɨne a wakasərən nagi a ndo haa, a vor nagi ndo sə kat.
Currently Selected:
Afise 1: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
