Afise 2
2
Həmɨnpwa vəm myentə a vor Ma Həmɨnpwa a Yaɓwarən
1Kɨnɨnɨng hwunə ɓətɨ wogi a vor pitə gəkɨlə ɗongə koddə le dəwnə ka səhase. 2Hwuna dɨ ɗa shi hashe ɓətɨya mbiɗitɨ mi vɨratə a dɨ ɗa, ta koddə həme da pɨlee a hawe. Sɨnə pite dɨ lyeni kaarən tən wule myee aawa koddə ləməgye da Həmɨnpwa. 3Hɨm kat hɨm gə nzamə waka wule mingɨn ta koddə kadawo sɨtə, ta ɗa wule shee sɨtə a dɨ mwo kat ka ɗyangalə hase. Ɓətɨ mbiɗitɨ ɓwaare, mya nzamə pukə yedi-kɨtta Həmɨnpwa gə səhase dam. 4Shezə ɓəgəng ndi Həmɨnpwa ma ka purutə kɨr-kɨr, gə mwoha kɨr-kɨre dan shi hakam, 5nda vəm myentə ɓwaa ka Ma Həmɨnpwa a Yaɓwarən kat ka ite hɨm nə ɓətɨ wogi gəkɨlə ɗongə koddə le dan. Dɨ ha wuladəha dan nda mbədəwnə. 6Həmɨnpwa mgban a maddəm ka myentə gə we ɓwaa ka Ma Həmɨnpwa a Yaɓwarən. Nda nzadəm a vor pwa ɓwaa ka Yesu Ma Həmɨnpwa a Yaɓwarən, 7gə a vor nzatɨnə ɓəgəng baa zə nzate ɓaga shi nda bɨldə wuladəha dan a kɨr-kɨr, a taa a də tɨlkan. Wule a nda bɨləm fyemtə dan dɨ haka Yesu Ma Həmɨnpwa a Yaɓwarən. 8Gə dɨ wuladəha da Həmɨnpwa nda mbədəwnə dɨ ha mwadiyale, aa hwunə mban ɗɨmi, Həmɨnpwa nə wulakəwnə, 9aa gə lyentə, gə-angɨn ɓe ama aa məndaranye. 10Gə hɨm nə lyenta Həmɨnpwa, nda gəədəm mi hweli dɨ haka Yesu Ma Həmɨnpwa a Yaɓwarən gə mya ɗam lyentɨ pepetə a ite Həmɨnpwa a nzadə kɨnɨnɨng gə mya ɗamtɨrə.
Pedə ne a vor Ma Həmɨnpwa a Yaɓwarən
11Gə-angɨn ɗyangam atɨ hwun myee myaa mwasarəwnə Yawude, tən Yawude 'ye mya jengdərən a lakəwne a dɨ warəwnə atɨ myee myaa jengdərən a lakəwne, a lakəwna mya ɗarən a sɨtə ka tyefi ɓwaara. 12Ɗyangam atɨ a nzate pɨri hwun tam ɓwaa ka Ma Həmɨnpwa a Yaɓwarən. Hwunə omi hwun tam a vor mi Israila, taa asə pedəwnə ka ləmə kɨləsəta Həmɨnpwa ka myee dan ka la mya boyo a nzadən, taa asə də hwun ɓa bədə myensəwnə a nəngɨn, gə hwun tam ɓwaa ka Həmɨnpwa a vɨratɨnə. 13Shezə hwun myee ɓong-ɓong ka Həmɨnpwa, ɓəgəng a vor Yesu Ma Həmɨnpwa a Yaɓwarən mye gɨsa dəwnə gbyel a haka Həmɨnpwa dɨ haka zaambə Ma Həmɨnpwa a Yaɓwarən.
14Gə sɨnə ɗoltɨ dam, ndi ma pedərən kpe təna gə hiɗə, nda kɨɗa kaanda kwonəsəte taka waka ji-nyatə hɨm a peyə a gəm hiɗə. 15Dɨ ha we dan nda nggurgə ɓashita Musa ka gɨraha darə gə nda dɨmaadə ma hwele hiɗə dɨ vor mi kpeyingɨn a pɨradə nzaa ɗoltə. 16A sɨtɨ hiɗətɨngɨn nda shi ka kɨləsətə a waka ji-nyaatɨngɨn dɨ kpeyə. Nda nggurgə kwonəsətɨngɨn dɨ ha we dan a nə kada ɓɨdɨmtə. 17Nda shi a hiwa ka ləməgi ɗoltə a hakəwnə hwun myee a itɨngɨn hwune ɓong-ɓong, ka minə gbyel ganə. 18Gə dɨ hakan mya peyəm kat a ɗɨməm humwatə a pɨrə humwa Baatə dɨ ha Pitə hiɗə.
19Gə ləngɨn ɓəgəng hwunaa yə omi, aa mi somi, hwun gəə ji-hwoɗəti ɓwaa ka myee da Həmɨnpwa. 20Hwunə mya nworəwnə a nə mgba-vɨnə kpe-lagbe ka kpalye ɓwaa ka Yesu Ma Həmɨnpwa a Yaɓwarən. Sɨnə farate mya kwak mgba-vɨne kaarə. 21Sɨnə pedə vɨnəngɨn kɨshi, nwoshingɨn a gbyala a gəə Shafə ɗəmɗəmə gə le da Həmɨmiye. 22Sə mgban ɓwaa kan mya dɨ nworəwnə gə hwuna gəə haa nzata Həmɨnpwa nə dɨ haka Pitɨ dan.
Currently Selected:
Afise 2: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
