Lyenta 17
17
Bulus ka Silas a Tasalonika
1Ite yə Bulus ka Silas a koɗə dɨ vor vɨre Amfibolis ka Apoloniya, təna tɨla a vor Tasalonika, a hangɨn vɨnə kəndəshe da Yawude nee də. 2Bulus a pɨrə vor vɨnə kəndəshingɨn ɓətɨ nda duwa ɗa. Nda bɨlərən shee dɨ vor Malɨmtɨ Ɗəmɗəmta Həmɨnpwa a vor bətɨ piyatɨ da Yawude koɗəsə mwaakɨn. 3Ndi ta kənərən shee ta bɨlərən bwang atɨ mbak-mbak Ma Həmɨnpwa a Yaɓwarən ɓa tənə a mbɨrə, nda mɨna maggə we ka myentə. Nda sarən, “Yesu ma na dɨ boyownə le a nəngɨn, sɨnə Ma Həmɨnpwa a Yaɓwarən.” 4Imi dɨ vorsərən tən Yawudengɨn a mwaka ləməgingɨn a 'ye Bulus ka Silas a bɨlərən. Imi mgban hananang dɨ vor Heline 'ye dɨ gəə kala Həmɨnpwa, təna mwa kat ka mandi dyeksəkye a wakasərən hananang.
5Ite mi kpan-kpanye da Yawude a niyə ɓwaare hananang mwaka ləməgyee Bulus ka Silas a dɨ kəndərən, təna ɗa jiwne a maɗə a pedə tataryi ɓwaare, ji-woyo ɓayə lumotə, a fɨdərən ɗiye gə təna maddə mwanatə a vor vɨra Tasalonika. Ɓwaare a rɨfə a pɨrə vor hwoda Jason, tən ta ɨl Bulus ka Silas gə təna kasatɨrən a dɨmə kaarən a haa bwange a haka ɓwaarengɨn. 6Tən ɓe niyə tənaa pa Bulus ka Silas a vor hwoɗingɨn, təna nggəl Jason ka i ji-kotti, a fowo a dɨmə kaarən a haa bwange, a haka yə həmi njiya. Tən ta gəəshe ta sa atɨ, “Minə, tənə myee dɨ woyi tukuta vɨratə kat, ɓəgəng tən shi ganə a hakam, 7Jason a luutɨrən a vor hwodan. Təna ushi gɨraha da Kaisar həmə kpanə Roma, təna sa atɨ a həmə nə də som, mya wa atɨ Yesu.” 8Ite ɓwaaree peyi kat ka yə həmi njiya ɓe kɨl ləməgingɨn, hubosərən a ngama. 9Ji-ɓashitə a ɗɨkdə Jason ka mbiɗitɨ ji-kottɨngɨn təna mbwa taa təna bəngərən, təna ɓə ɗakarən.
Bulus ka Silas a Biriya
10Haa ta tukwa, ji-kotte a vor Tasalonika a dɨmə ka Bulus ka Silas a raadərən təna pɨrə a muɗə vɨra Biriya. Ite təna tɨlə hangɨn, təna pɨrə vɨnə kəndəshe da Yawude. 11Yawudee a vor Biriya wulagə mirə a vor Tasalonika ka yedi pepeye gəkɨlə təna luu le da Həmɨnpwa ka hɨmne a sardə kwakingrən a kɨlə pepe, təna dɨ wuna Malɨmtɨ Ɗəmɗəmtə fərə-fərə a nidə ləməgyee də gə təna le diyalə ləməgingɨn. 12Gə-angɨn imi dɨ vor Yawude hananang a mwaka ləməgye da Həmɨnpwa. Sə mgban imi dɨ vor mandi dyeksəki Heline ka i moryi Heline a mwaka le da Həmɨnpwa.
13Ite Yawudee a vor Tasalonika a kɨlə atɨ Bulus nee dɨ bwe le da Həmɨnpwa a vor Biriya ɓə, təna dɨmə a wudə hangɨn ta ngama hubə ɓwaare ta maddə mwanatə. 14Tee gbyel ji-kotte a vor Biriya a raadə Bulus a zəkan a kwaka gbɨnuwe, yə Silas ka Timoti a mbiɗi vor Biriya. 15Myee raadə Bulus a muɗə a tɨlə kan a vor vɨra Atina. Dɨ hangɨn mingɨn a mɨnə ka lyenshe da Bulus atɨ yə Silas ka Timoti a pan a hangɨn tan-tan.
Bulus a Atina
16Ite Bulus nee dɨ kula yə Silas ka Timoti a Atina, yedingɨn a kɨɗən kɨr-kɨr, le a hasən gəkɨlə wule furtɨ kɨriye ka hwoɗi pɨlee a vor vɨra Atina. 17Gə-angɨn Bulus a pɨrə vɨnə kəndəshe da Yawude a tiya alale ka Yawude ka Helinee dɨ koɗə Həmɨnpwa. Fərə-fərə nda duwa kangə lumotə a wule haa ɓwaare a ləkə də, ndi ta alale ka myee dɨ shi hangɨn. 18Imi dɨ vor ndəkəshe a vor Atina, a myee mya watɨrən atɨ Epikuriye#17.18 Epikuriye: Tənə myee dɨ koɗə kəndəshe da ma mya wa atɨ Epikurus, atɨ hanɨngtə nə kaɓa sə kpana pɨri kat kana ɓwaara a ɗɨmə vɨratə. ka Stoyikye#17.18 Stoyikye: Wule ndəkəshingɨnə mgban a koɗə kəndəshe da ma mya wa atɨ Zeno, kotə a atɨ ɓwaara a kwo shi vɨratə kat ka ootə., a tiya məntəmətə ka Bulus. Imi dɨ vorsərən a ɗiyə atɨ, “Nda a shiya kpanuwa a dɨ boya?” Imi mgban a sa atɨ, “A gi atɨ sɨne dɨ kəndəshe a nə i pɨle hweli, a wule 'ye hɨm aa leyəmtɨrən ganə.” Təna boyo she, gəkɨlə Bulus a dɨ hiwa ka ləmə feme a nə Yesu ka mattə gə we ka myentə. 19Ndəkəshingɨn a zə ka Bulus a vɨnə petɨ darən a mya wa atɨ Arepagu, a hangɨn təna san atɨ, “Mɨni boyenə le pepe a nə kəndəshi hwelye hye dɨ kəndərən dinəng. 20Gə shee hye dɨ kəndərən nə som ka 'ye hina leyə, hine mwi atɨ hina lee naarə ləngɨn.” 21(Mi vɨra Atina kat ka omyee nza vor vɨratɨngɨn, taa iti lyenti kaarən som, pɨrgə byele ka kɨl le a nə ləməgi hwelye dɨ pɨra a hakarən.)
22Bulus a maɗə a kangə vor peta mi Arepagu darən a sarən, “Mi Atina! Nate na nəwnə, hwun ji-mwo kala gbəəti kɨr-kɨr nagi dɨ ndo basa. 23Gəkɨlə ite na dɨ woyə vor vɨratɨnə, hɨn naa kɨriye a hee hwuna dɨ kala pɨle gbəətə də, hɨn naa itɨ kɨriti mya dorshe a nəngrə atɨ: ‘həmɨnpwate myaa leerən nə.’ Sa hwunaa leerən, kat ka angɨn hwuna dɨ kalan-gbəətə, sɨnə na shi ɓa boyownə le a nəngɨn.
24“Həmɨnpwate ɗa vɨratə kat ka shee a vorsə, sɨnə Həmɨ gətə a nə pwa ka njiya, ndi ndaawa nza wule shafa ɓwaare a nwo ka tyefingrən. 25Ndaawa mwo asə dɨ tɨfə ɓwaara, ndaawa mwo asə mgban dɨ haka ɓwaara dunge, gəkɨlə sɨnə ka nənəngɨn dɨ və ɓwaare myentə, ka hawa mya dɨ pi kan, kat ka nagi ndo sə. 26Dɨ haka ɓwaara hiɗə Həmɨnpwa a dɨmaadə zərgi ɓwaare nə a vɨratə kat, gə təna nza a luu vor vɨratə kat, nda takarən a hee nzatə a bəngə nagi ndo mi bəte ta nza heengɨn. 27Həmɨnpwa a ɗaasə gə ɓwaare a ɨltən, a yapa a pan nagi a nə sate atɨ ɓə tam ɓong-ɓong ka nagi ndo ma a wakasəm. 28‘Gə le dan hɨm a ɗɨməm myentə a dɨ woyo a luwa hawe a mbə.’ Ɓətɨya i waniyi dəwnə a mɨna boyo atɨ, ‘Gəngnə hɨm nə je dan.’
29“Hɨm leyəm gəngnə atɨ hɨm nə je da Həmɨnpwa, gə-angɨn ɓe myaa niyəmdə Həmɨnpwa ɓətɨ wule pɨla, a mya ɗa ka dyamse ka nggɨrngɨme ka fare, a wule pɨlee ɓwaare a dɨ ɗa ka tyefingrən. 30Ka kaaɗəng a ite ɓwaare nee nza vor ɗongə leetə, gəkɨlə ləngɨn mgban Həmɨnpwa a nggur mbasɨtə ka ɓwaare. Ɓəgəng Həmɨnpwa nə dɨ wa ɓwaare kat dɨ nagi dɨ ndo haa gə təna mɨna a hakan a por-njiya gə səhase darən. 31Gə Həmɨnpwa nggɨl fəra ndi ɓa ɓashiyə vɨratə kan ka diyale dɨ haka ma nda nggɨlə. A nə angɨn nə nda bɨldən ka matte nda maddə mangɨn gə we ka myentə.”
32Ite ndəkəshingɨn ka mbiɗitɨ ɓwaaree kangə hangɨn a kɨl lə mattə gə we ka myentə, təna pulu Bulus a mɨndə ləngɨn ɓaa, imi mgban a sa Bulus atɨ, “Hine dɨ mwi atɨ hina mɨna kɨl wule ləməgi pepeyee dɨ hakəw.” 33Beetɨ angɨn Bulus a dɨmgə vor petɨngɨn da Arepagu a muɗə. 34Də a hangɨn imi ɓyeləng a mwaka ləməgye da Bulus a nə Yesu təna mɨnə gyenge dan. A vorsərən ama nə də mya wa atɨ Diyonisus sɨne hiɗə dɨ vor mi petɨ Arepagu, ka itɨ meti kwakɨngrə nə Damaris, ka mbiɗitɨ myee mwakan.
Currently Selected:
Lyenta 17: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
