Lyenta 18
18
Bulus a Korintiya
1Beetɨ ite Bulus a ɗaka Atina, nda muɗə vor vɨra Korintiya. 2A hangɨn nda pa a Yawuda mya wa atɨ Akila, haa mwasasən nə Pontus. Ndaa ɓongə ka shitə a vor njiya Italiya ndi ka mesən Bɨriskila. Təna ɗaka vor njiya Italiya a shi Korinti gəkɨlə hama kpane Kɨlawdiyus a hiwa atɨ a Yawude kat a ɗaka vor vɨra Roma. Ite Bulus a tɨlə vor Korinti, nda zə haka yə Akila ka mesən Bɨriskila gə nda ɗɨm naasərən, 3gə ndi Bulus nzə-ɗii wule sɨlarye ka baaseshee mya dɨ kwapa kwakre kaarən nə. Kotə wule lyente Akila ka Bɨriskila a dɨ ɗa mgban. Bulus a nza a ɗa lyentɨngɨn ɓwaa kaarən. 4Nagi ndo fərə piyati da Yawude, Bulus a dɨ pɨrə vor vɨnə kəndəshe darən gə nda nggala hubo Heline ka Yawude kat gə təna virwa a mwadiyale ka Həmɨnpwa.
5Ite Silas ka Timoti a dɨma dɨ Masɨdoniya, təna sɨ pa Bulus ɓə ɗaka mbiɗitɨ lyente nda dɨ ɗa kat mɨnə bwe le da Həmɨnpwa dɨ hiwa Yawude atɨ Yesu nə Ma Həmɨnpwa a Yaɓwarən. 6Ite Yawude a ndɨlka Bulus a kwo le dan, təna boyən ləməgi hashe, nda kpuwgə sɨɓwetɨ dan a sarən atɨ, “Zaambəngəwnə ɓa kpasəwnə, zaambəngəwnə tam a na. Gəngnə hɨn ɗakəwnə, hɨnə dɨ mɨnə haka myee aa Yawude.”
7Də Bulus a ɗakarən a dɨmgə vɨnə kəndəshe darən nda pɨrə hwoda ama mya wa atɨ Titus Yustus, mangɨn a dɨ kala Həmɨnpwa gbəətə, hwodan nee gbyel ka vɨnə kəndəshe da Yawude. 8Ama nə də mya wa atɨ Kɨribus sɨnə ma kpana dɨ nidə vɨnə kəndəshe da Yawude, ite nda kɨl le da Həmɨnpwa, ndi ka mi hwodan ka imi Korintiyati hananang 'ye kɨltən, təna mwadiyale, mya ɗarən batisɨmatə.
9A fərə ka tukotə Həmɨnpwa a wunə Bulus diya, Bulus a naa haa, də Həmɨnpwa a san atɨ, “Ɓe kala aa gu, pɨrə humwa hye ta bwe le de, ɓe gbə kwaamɨnga, 10gə hɨnə ɓwaa kəw, taa ɗakəw. Asə aa dɨ gu, hɨnə ka ɓwaare hananang 'ye hɨngginə a vor vɨratɨnə.” 11Gə-angɨn Bulus a nza vor Korinti a ɗa kiwatə hiɗə ka gbɨle sɨne dɨ kənərən le da Həmɨnpwa.
12Ite Galiyo nə hama njiya Akaya, a itɨngɨn nə Yawude a pee nəngrən a kɨr Bulus a zəkan a humwa raamə ɓashitə. 13Təna kaadən atɨ, “Manə nə dɨ vwaka ɓwaare dɨ sarən atɨ, a təna ɗaka ɓashitɨ dam a kala Həmɨnpwa gbəətə dɨ a tɨfə som.”
14Ite Bulus a wuna kwaamɨngɨn ɓa luwa le a boyo, gbyel həmɨn Galiyo a sarən atɨ, “Hwun Yawude, samdə kwakingəwnə kɨləm le. Ləməgyee hwuna kaadəha kaarən, anda səhasə kɨr-kɨr Bulus a ɗa, hɨn ɓa nda sardə kwaki a kɨlə pepe. 15Ɓəgəng, hwuna shikan ganə a nə sɨkwale dəwnə ka kwaki i shi, ka ləmə hiwatɨ dəwnə, ə'ə! Dɨməm muɗəm hwuna wudə a taka ləməgingɨn sɨrə ka nənəngəwnə. Hɨn taa dɨ ɓashiyəwnə a nə wule shee asə aa pɨrdi də.” 16Də a hangɨn həmɨn Galiyo a ɗɨkə mya omtɨrən a dɨmdərən gə vor vɨnə ɓashitə. 17Mingɨn ɓe niyə shea, təna virwo a kɨr Sostanis, ndi ma ka vɨnə kəndəshe da Yawude a tɨfəngɨn a lyebə humwa vɨnə ɓashitə. Həmɨn Galiyo ɓe naa ləngɨn, nda nggurgə nəngɨn ndaa liyaa bəgərən myenti.
Bulus a mɨnə Antiyoktɨ Siriya
18Beetɨ ləməgingɨn kat, Bulus a nza a ɗɨm bətə a vor Korinti nda ɓə ɗaka ji-kottə a pɨrə koombotə ɓa muɗə vor njiya Siriya, yə Akila ka Bɨriskila a raadən a muɗə kan. Ite Bulus a tɨlə Senkɨriya, nda sawgə nəngɨn gə kormi gbəte nda gbə humwa Həmɨnpwa naa. 19Ite təna tɨla a Afisus, Bulus ɓe janga gə koombotə ɗaka yə Bɨriskila ka Akila, nda nggɨrə a zə a pɨrə vor vɨnə kəndəshe da Yawude a bɨlərən le da Həmɨnpwa. 20Təna nyisən atɨ a nda nza hakarən a ɗɨm bətə a vor Afisus, nda kwo. 21Ite nda ɗakarən a dɨmə ɓa muɗə, kat ka angɨn nda sarən atɨ, “Anda Həmɨnpwa mwa, hɨn ɓa mɨna a hakəwnə.” Də nda pɨrə koombotə a ɗaka Afisus. 22Ite nda tɨla a vɨra Kesariya, nda nggɨrə a zə Urshelima a wunaka ji-kotte də, dɨ hangɨn nda jengə a zə Antiyok.
23Ndi ɓe nza ɗɨm bətə a vor Antiyok, nda ɗaka hangɨn a pɨrə a woyə hee som-som a vor njiya Galatiya ka Firjiya ta boyə ji-kottə ləməgye, ta nyerədərən gə təna kangə dwat.
24A itɨngɨn a Yawuda mya dɨ wa atɨ Apolos, sɨnə dɨ vɨra Alezandiriya a vor Ijip, nda shi vor Afisus, ndi mgban nzə-lee byelə kɨr-kɨr, nda mɨna lee Malɨmtɨ Ɗəmɗəmtə kɨr-kɨr. 25Mya kənən shee a nə təfəgye da Həmɨnpwa, sɨnə ka hɨmnə bwe ləməgye da Yesu ka diyale, nagi ka sate atɨ batisɨmate Yohana a dɨ ɗa nə ɓəmbə nda leyə. 26Ndi Apolos a tiya ta bwe ləməgye da Həmɨnpwa pɨraɗaw ka hanɨngtə a vɨnə kəndəshe da Yawude. Ite yə Bɨriskila ka Akila a sardə kwakingrən a kɨl ləməgye da Həmɨnpwa 'ye Apolos a dɨ boyo, təna warən a hwodarən a nzadən a mɨna bɨlən ləməgye da Həmɨnpwa a təfəgye kana.
27Də Apolos a maɗə a pɨrə ɓa muɗə Akaya, ji-kotte a vor Afisus a gwadən a dor malɨmtə zə haka ji-kotte a njiya Akaya gə təna lurən. Ite nda tɨlə hangɨn mgban, nda shikarən ka gwadəha kɨr-kɨr tən myee mwaka Yesu dɨ ha wuladəha dan. 28Gə a haa bwange bwang Apolos a alale a mgbɨlə Yawude, nda boyərən diyale dɨ vor Malɨmtɨ Ɗəmɗəmtə a dɨmarəndən bwang atɨ Yesu nə Ma Həmɨnpwa a Yaɓwarən.
Currently Selected:
Lyenta 18: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
