Lyenta 16
16
Timoti a pedə nəngɨn ka yə Bulus ka Silas
1Bulus ka Silas a tɨla a Darbi, təna pɨrə a zə vor Listɨra, a hangɨn təna pa a nzə-kotti mya wa atɨ Timoti sɨne ka nzatə a hangɨn. Nuwogə Timoti Yawudati nggi nji-kotti mgban, baagən Helinə. 2Ji-kotte a vor Listɨra ka Ikoniyom a byelə a humwa Timoti pepe. 3Ndi Bulus nee dɨ mwi atɨ nda nggur Timoti a woyo kan, gə ləngɨn nda nggutən a jengdən a lakəwne gə Yawudee a bətɨ hangɨn leyə atɨ myaa jengdə Timoti a lakəwne, gəkɨlə baagən Helinə. 4Təna woyo vor vɨre som-som, tən ta boyə ji-kotte a heengɨn wule hiwate kpe-lagbe kat ka mi kpan-kpanyee a vor Urshelima a hiwa gə ji-kottə a koddə ləməgingɨn. 5Angɨn a ɗɨkə ji-kotte a heengɨn kat a kangə dwat, a nyerə vor mwadiyale, təna pɨrə humwa ta furi fərə-fərə.
Bulus a naa haa a nə a murə dɨ Masɨdoniya
6Ndi Bulus ka myee təna dɨ omo kaarən a koɗə dɨ njiya Firjiya ka Galatiya gə Pitɨ Ɗəmɗəmtə aa ɗakarən təna bwe le da Həmɨnpwa a vor njiya Asiya. 7Ite təna tɨla a ɓorotɨ njiya Misiya, təna ɓərə ɓa pɨrə vor njiya Bitiniya gə təna bwe le da Həmɨnpwa, Pita Yesu aa ɗakarən. 8Gə-angɨn təna pɨrə dɨ njiya Misiya a jengə a muɗə vɨra Tɨros. 9Ka tukotə Həmɨnpwa a wunə Bulus diya nda naa ama kangə ɓayatɨ Masɨdoniya, sɨndə kanyi dɨ nyisən atɨ, “Nggɨra a ɓayatɨ Masɨdoniya, hye sɨ gwadenə.” 10Ite Bulus ɓe naa haa tee, hina maɗə tan-tan a pɨrə a muɗə Masɨdoniya gə hin leyə mbak-mbak atɨ, Həmɨnpwa nə dɨ warenə gə hina dɨ boyə mingɨn ləmə feme dan.
Lidiya a luu Həmɨnpwa a Filipi
11Dɨ vɨra Tɨros hina pɨrə koombotə a hwul haa kpəkəkə a nggɨrə luutɨ Samotɨraki, ite hina bə haa kɨɗa, hina pɨrə a zə ɓayatɨ vɨra Neyapolis. 12Dɨ hangɨn hina pɨrə a zə vor vɨra Filipi. Filipi nə hiɗə dɨ vɨre kpan-kpanye da mi Masɨdoniya a vor njiya da mi Roma. Hina ɗɨm bətə a hangɨn.
13A fərə piyatɨ da Yawude, hina dɨmgə vor Filipi a zə kwaka haɓye gə hina ɗɨm haa a ɗa hiwtə. Hina ɗɨm haa a nza a byelə ka mandyee paya a hangɨn. 14Hiɗə dɨ vor mandyee dɨ kɨltenə, a nggi mate mya wa atɨ Lidiya, ngga dɨ ɗərdə wule baashe ka ɗuwo gaaɗətə, kote dɨ vor vɨra Tiyatira, kote mgban dɨ vor myee dɨ kala Həmɨnpwa gbəətə. Həmɨnpwa a virwa hubosə, ngga mwadiyale ka ləməgi myente Bulus a dɨ boyo. 15Ite nggi kat ka mi hwodarə a luu Həmɨnpwa, mya ɗarən batisɨmatə, ngga senə atɨ, “Anda hwun mwake atɨ hɨn nji-kotti dɨ koɗə Yesu, wam a hwode, hwuna nza a ɗɨm bətə də.” Sə ngga ɗɨkdenə hina zə.
Mye gbə Bulus ka Silas a vɨnə gbərəwe
16A fərə, hine dɨ muɗə haa hiwtə, hina peyə ka iti njiti, nji-kɨsati da yə həmingrə, kote ka pɨla nzə-dwatə a sɨsə a dɨ gwadə ngga dɨ naa haa, ngga dɨ lee sa ɓa ɗa. Ka wule naa hangɨn njitɨngɨn a dɨ ɗɨmə yə həmingrə gɨnətə. 17Njitɨngɨn ta koɗə beesenə hin ka yə Bulus, ta gəəshe ta sa atɨ, “Minə, tənə kɨse da Həmɨnpwa Həmɨ gətə, tənə myee dɨ kənəwnə tɨfə mbətə.” 18Sə ngga dɨ koɗə beesenə fərə-fərə ta ɗa. Ite Bulus a ɓwaa kaarə, nda virwa a boyə pɨla nzə-dwate a sɨsə atɨ, “A vor kwakɨ Yesu Ma Həmɨnpwa a Yaɓwarən dɨmgə sɨtɨ njite.” Də a hangɨn pɨla nzə-dwatɨngɨn a dɨmgə sɨtɨ njitɨngɨn.
19Ite yə həmi nji-kɨsatɨngɨn a niyə a leyə atɨ tɨfə ɗɨm gɨnətɨ darən gbəə, təna pedə Bulus ka Silas a kəsə a zə kaarən a haa bwange a humwa ji-ɓashitə a kwa-lumotə. 20Ite təna tɨla kaarən a humwa makpane da ji-ɓashitə təna sa atɨ, “Minə Yawude, təna pɨra a vɨratə a ngamarə. Hubə ɓwaare nə maɗi kangi-kangi kat. 21Təna woyo a dɨ kənə myee dam wule shee kwale dam a vor njiya Roma aa mwakarən.”
22Ɓwaare kat a hangɨn a maɗə a peyə nə yə Bulus ka Silas a ndɨlkarən ka nyatə. Ji-ɓashitə mgban a sa atɨ a mya saɗagərən gə sɨɓwetə a byengtɨrən ka sɨfyelye. 23Ite mya byengtɨrən kɨr-kɨr a mbəə, təna pɨrdərən a vɨnə gbərəwe. Ji-ɓashitə a fyel-kwaki ma dɨ jin ji-gbərəwyingɨn atɨ nda nidə vɨnə gbərəwe pepe ɓe ama aa giɓə. 24Nzə-jin ji-gbərəwye ɓe kɨl fyelte mya fyel-kwakingɨn, nda pɨrdərən a haa gungulunge a gbaltɨrən a gbalye kat.
25Ka vor tukotə, yə Bulus ka Silas nee dɨ ɗa hiwtə, dɨ gəə dyemshe dɨ ɓondi Həmɨnpwa, mbiɗitɨ ji-gbərəwye kat mgban nee dɨ kɨltɨrən. 26Də a hangɨn njiya a nzaa humuro kɨr-kɨr a takadə haa kat, mgba-vɨnə gbərəwe a vɨngɨɗə. Kwa-vənye kat a wonə a pukə bwang, malye mya pukə mbwayi ji-gbərəwye də kat a gbəkəyə a laya. 27Ite nzə-jin ji-gbərəwyingɨn a viɗiya gə shintə, nda naa kwa-vənye kat wonə bwang-bwang, nda dɨɗa sungwa ɓa zub nəngɨn a mbɨrə, gələ haagən ɓətɨ ji-gbərəwye kat dɨmə gyeɓə muɗə. 28Də a hangɨn Bulus a maddə kormɨngɨn kaɓa kpan, a waha a san atɨ, “Ɓe ɓɨl nanga. Hinə ganə kat a vor vɨne.”
29Nzə-jin ji-gbərəwyingɨn a waha atɨ a mya shikan ka tikɨle gə nda naa haa, nda rɨfə a pɨrə vor vɨnəngɨn a dɨ fukə humwa Bulus ka Silas, sɨsən ta wurən gə kala. 30Nda dɨmaadə yə Bulus ka Silas a haa bwange, a ɗiyərən atɨ, “Mi kpan-kpanye, mɨnə kana na ɗa gə na ɗɨm mbəta?”
31Yə Bulus ka Silas a luwa a san atɨ, “Zə mwadiyale ka Yesu Həmɨmiye, hye ɓa ɗɨm mbətə, hye kat ka mi hwodəw.” 32Də a hangɨn təna boyən le da Həmɨnpwa, ndi kat ka mi hwodan. 33Ka vor tukotɨngɨn, nzə-jin ji-gbərəwyingɨn a zəkarən a haa ndi ɓa suɓwarəngə ɓokye darən, də mgban ndi kat ka mi hwodan mya ɗarən batisɨmatə. 34Beetɨ itɨngɨn nzə-jin ji-gbərəwyingɨn a zəkarən a hwodan a vərən sɨzɨmtə, hanɨngən gəkɨlə nda mwadiyale ka Həmɨnpwa ndi ka mi hwodan kat.
35Ite haa ɓe kɨɗa ji-ɓashitɨngɨn a lyenə nzə-jin ji-gbərəwyingɨn she atɨ a nda ɗaka yə Bulus ka Silas təna dɨmgə gbərəwe a muɗə. 36Nzə-jin ji-gbərəwyingɨn a sa Bulus atɨ, “Ji-ɓashitə nə lyanashe atɨ a mya ɗakəw hye ka Silas hwuna muɗə. Zəm, dɨməm muɗəm a vor ɗoltə.”
37Də a hangɨn Bulus a sa myee mya lyanatɨrən atɨ, “Təna byengrenə a haa bwange, a furo ɓwaare, tənaa ɓashiyenə ka diyale, nagiya atɨ hin ji-njiya Romati, təna mɨna gbenə a vor vɨnə gbərəwe. Ɓəgəng təna shea mɨna ɓa dɨmdenə a omrenə hina muɗə ɗəng-ɗəng a vor ɓota? Ə'ə, aa dɨ ɗa! A təna shi ka nənəngrən asɨ dɨmdenə a haa bwange a raadenə hina muɗə.”
38Ite ji-ɓwesɨtee mya lyanatɨrən a mɨnə a boyə ji-ɓashitə ləməgye yə Bulus a boyo, kala a gərən gə təna kɨlə atɨ yə Bulus ka Silas ji-njiya Romati. 39Ji-ɓashitɨngɨn asɨ nyisə yə Bulus ka Silas, a pororən njiya, təna dɨmdərən gə vor vɨnə gbərəwe, təna nyisərən atɨ a təna dɨmgə vor vɨra Filipi a muɗə. 40Naya yə Bulus ka Silas a dɨmgə vor gbərəwe, təna muɗə hwoda Lidiya a pa ji-kotte də, təna byelə a nyerədə ji-kottɨngɨn kat, təna shea dɨmə a muɗə.
Currently Selected:
Lyenta 16: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
