2 Korintiye 9
9
1Taayə mɨni mgbaalə dorshi ke gə na boyownə le a nə lyentɨ gwadə myee Həmɨnpwa a vomiyərən. 2Gə hɨn leyə atɨ hwune dɨ mwo gwadəha, gə ləngɨn nə mgban na dɨ məndaranye kəwnə a haka mi Masɨdoniya atɨ gəm ji-kottɨ Akaya mwa atɨ tən ɓa lyanashe ka taa həmtə darən. Wule hɨmna hwuna ɗarən hwun mi Akaya gə hwuna vədə taa həmtə dəwnə, angɨn a ɗɨkdə hakpanə ji-kottɨ Masɨdoniya a maɗə mgban gə təna ɗa asə. 3Səngɨn nə ɗa na dɨ lyen ji-nuwogəm ji-kotti a hakəwnə gə hwuna vədə hɨnggəwnə həmti gə ɓe məndaranye denə a nəngəwnə aa gəə lə ɓayə a nə byelə vədə həmtə dəwnə. Hwuna ɓərə a pedə taangɨn ka haa-tan ɓətɨ na boyə ɓwaare. 4Gə anda hin kpapa ka imi dɨ Masɨdoniya sɨ pəwnə hwunaa nda pedə asə, sopye ɓa genə gə mwate hina mwakəwnə a nə lə pedə taangɨn. She hɨnggəwnə sɨ sopi a nə ləngɨn, myaa yə boyo. 5Səngɨn ɗa na dɨ niyə ɓə wula na nyisə i ji-kotti təna zə hakəwnə na ɓə zə, gə hwuna pedə taa həmte hwuna sa atɨ hwun ɓa pedən. Angɨn ɓa bɨldə sate atɨ həmtɨngɨn ka hanɨngtə ka mwosəwnə hwuna vədə, aa ka nggwonshe ɓətɨ mbamti mya bɨləwnə.
Vədə həmtə ka hanɨngtə
6Naarə ləməgyee na dɨ boyownə nə atɨ, ma kat laga daase ɓyeləng a njiya, wule shee ndi ɓa ɗɨmə nə ɓyeləng mgban, ma mgban laga daase kpan a njiya, ndi ɓa ɗɨmə kpan mgban. 7Nagi ndo ma a səɗə ka yedingɨn gaarə a vor hubosən a nə sa kana nda vədən. Ɓe myaa vədə həmtɨngɨn ka yedi-kɨttə ɓətɨ mbamti mya bɨləwnə, gəkɨlə Həmɨnpwa a dɨ mwo ma dɨ vədə həmtə ka pɨr-pɨre. 8Həmɨnpwa nee ka gətə nda həmə kəwnə kɨr-kɨr gə nagi goɗi hwuna ɗɨm sa hwuna dɨ ɨlə kaɓa kpan a pɨrgə hɨmatɨ dəwnə gə hwun ta ɗa ɓwaare lyentɨ pepetə kat. 9Naya Malɨmtɨ Ɗəmɗəmtə a boyə atɨ,
“Nda dɨ ɓyanashe a takarən a waka ji-poritə,
pepeta Həmɨnpwa taa mbati kaarə.”#9.9 Naasə: Dyemshe 112.9.
10Niyəm ɓəgəng ndi Həmɨnpwa a dɨ və ji-hawtə daase təna lagashe, nda vədə sɨzɨmtə gə mya zɨmə, ndi ɓa vəwnə daase kaɓa kpan hwuna laga, ndi ɓa gwadə lyentɨ pepetɨ dəwnə ngga la kaɓa kpan. 11Nagi dɨ ndo tɨfə kat, Həmɨnpwa ɓa ɗɨkəwnədə, a vəwnə ɗɨmtə gə hwun ta gwadə imi ta həmi kaarən. Hin kana zə ka həmtə dəwnə a Urshelima, angɨn ɓa ɗɨkə mgban mya humwa Həmɨnpwa a ɗan usəkətə.
12Lyentɨ fyemtɨnə hwuna ɗa imi, aa gəkɨlə hwuna gwadə myee da Həmɨnpwa 'ye taa asə kaarən təna ɗɨm asə dɨ hakəwnə nə ɓəmbə, giɓə angɨn ɗɨkə hee naa pas ka usəkəte mya dɨ ɗa Həmɨnpwa, 13ta ndukodə kwakɨngɨn gə həmte hwuna həmə. Angɨn bɨldə sate atɨ hwune dɨ ɗa lyenta Həmɨnpwa, ɓwaare ɓa ɓondi Həmɨnpwa gə hwuna mwa a koddə ləmə feme da Ma Həmɨnpwa a Yaɓwarən gə wule gwate hwuna dɨ gwadə ɓwaare hananang ka həmtə dəwnə. 14Hiwtɨ darən ite təna dɨ ɗəwnə bɨldə wule mwote təna dɨ mworəwnə gə wule wulate Həmɨnpwa a wulakəwnə kɨr-kɨr. 15Zə humwamə Həmɨnpwa gə wule həmtə dan a ite ɓwaare aa dɨ mbarə a boyo!
Currently Selected:
2 Korintiye 9: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
