2 Korintiye 8
8
Vədə həmta ji-kottə
1Ɓəgəng ji-nuwo, hinə dɨ mwi atɨ hwuna lee wule wulate Həmɨnpwa a wula ka ji-kotte a vor njiya Masɨdoniya. 2Kat ka wule kanaha kɨr-kɨra təna pɨrədə ka tənətə, hubosərən nee naa pas ka hanɨngtə. Kat ka wule poritɨ kɨr-kɨrte təna gə vorsə, təne dɨ həmi kɨr-kɨr ka ɓwaare. 3Hɨn leyə mbak-mbak atɨ təna dɨ həmə ka hubosərən kat, təna ɗa sa təna mban a ɗa, təna ɗa sa pɨrgə maasəngrən. Ka hubosərən hiɗə 4təna nyisenə kɨr-kɨr atɨ mya vərən humwatə gə təna pɨrə vor lyentɨ gwadə myee Həmɨnpwa a vomiyərən. 5Təna ɗa a pɨrgə kanate hina kana, a tiyatɨ ləngɨn təna vədə nəngrən a haka Həmɨmiye, təna mɨna vədə nəngrən a hakenə ɓətɨ Həmɨnpwa a kana. 6Gə ləngɨn hina nyisə Titus atɨ, ɓətɨya nda tiya lyentə ta pedə taa həmtə dəwnə, nda pɨrə humwa a kpawa lyentɨ pepetɨngɨn. 7Ɓəgəng naya ɓətɨ hwuna tiya ɗashe kat pepe a vor mwadiyale dəwnə ka byele dəwnə ka leetɨ dəwnə ka lyentɨ twaitɨ dəwnə ka mɨni mwote hwuna mworenə, sə mgban zəm pɨrəmə humwa ka ɗashi pepeyi vədə həmtɨngɨn.
8Aa mbamti na dɨ bɨləwnə atɨ hwuna ɗaasə, kanati na dɨ kanarəwnə gə na lee twaitɨ mwoha dəwnə naya ɓətɨ imi dɨ vor mi Masɨdoniya a ɗa. 9Gə hwun lee wule wulate Həmɨmiye Yesu Ma Həmɨnpwa a Yaɓwarən a wulakam, ka sate atɨ ndi nzə-gɨnəti a vor pwa, kat ka angɨn nda sɨ gəə nzə-poriti a vɨratə gə le dam, gə hɨm minə ji-poriti hɨm a gəm ji-gɨnəti.
10Kiwate pɨri, aa həmti mba-mba hwuna vədə, shezə hwunə ka hɨmnəngɨn a hubosəwnə gə hwuna ɗaasə. Sɨnə shalale de a na dɨ mwa hwuna ɗa: 11Hɨnə dɨ səwnə atɨ sa hwuna tiyarən pepe, hwuna kpawan pepe ɓətɨya hwuna ɗa hɨmnə ɗa shingɨn. Kpawamə gwahangɨn ka sa hwuna gə kan a tɨfəngəwnə. 12Gə anda ka mwosəwnə hwuna mwo atɨ ɓa vədə həmtɨngɨn, Həmɨnpwa ɓa luwo. Həmɨnpwa ɓa luu sa ma a gə kan, aa wule sa ma tam kan nə.
13Aa mwosenə nə atɨ hina gwadə imi a piyadərən gə sɨtɨre, imi a shea nggur sɨtɨrəngɨn ta ɓwa kan. Mwosenə nə atɨ mya gwamdəsə gə hɨm nə kənəsə. 14Ɓəgəng hwun hwunə ka ɗɨmtə kəwnə, tən taa asə kaarən. Gə-angɨn hwuna gwadərən, ndəng a humwa hwun mgban ɓa ɗongə asə, tən kana gə kan, tənə ɓa gwadəwnə. Hwun ɗɨmə kənəsə. 15Ɓətɨ Malɨmtɨ Ɗəmɗəmtə a boyo atɨ, “Ma pedə shee gbəwdərən kɨr-kɨr aa pɨrgə ama, sə mgban ma pedərən ɓyeləng, aa pɨrgə ama ka asə.”#8.15 Naasə: Dɨmatə 16.18.
Mye lyen Titus a Korinti
16Hɨn ɗa Həmɨnpwa usəkətə gə nda ɗɨkdə Titus nda gwadəwnə ɓətɨya hina mwo gwasəwnə. 17Aa nyitte hina nyisən gə nda zə hakəwnə nə ɗɨki, ndi ka nənəngɨn mwosən nə atɨ nda zə hakəwnə. 18A nə angɨn hinə dɨ pedən ka a nzə-nuwoti, a ji-kotte mbəgə hee mwakan kat gəkɨlə nda dɨ woyo a bwe ləmə feme da Həmɨnpwa. 19Aa gəkɨlə ləngɨn nə ɓəmbə, sɨnə ji-kottə a nggɨlə hina woyo kaarən, ndewo weti. Nda gwadenə ka nggur taa həmte hina ngguro ɓa zəkan a Urshelima gə mya ndukodə Həmɨmiye a bɨldə sate atɨ ka hɨmne hina dɨ mwo gwadəha. 20Hinə dɨ gɨra nəngenə a nə lyentɨngɨn, gə ɓe ama aa ɗɨmgenə le atɨ təfəgyee hina dɨ koɗərən ka taa həmtɨngɨn aa wula. 21Gəkɨlə hinə dɨ ɓəri kɨr-kɨr gə hina ɗa sa pepe, aa gəkɨlə Həmɨnpwa a dɨ nidenə nə ɓəmbə, gə dii ɓwaare nee a sɨsenə.
22Hinə dɨ lyentɨrən ɓwaa ka a nzə-nuwoti a hina mwakan kɨnɨnɨng a vor təfəgye som-som gə ɓə bɨlenə twaitɨ lyentɨ dan. Ɓəgəng sɨnə ka hɨmnə ɗa lyentɨ dan a pɨrgə i kwamətə gəkɨlə ɓə mwakəwnə kɨr-kɨr. 23Anda ama ɗiyəwnə le a nə Titus, hwuna sa mangɨn atɨ Titus nə ndewo lyentɨdenə, nzə-lyenti mgban a wakasəwnə. Ama kana ɗiyəwnə le a nə ji-nuwogəm i kpeye, hwuna sa mangɨn atɨ tənə myee ji-kottɨ vəni hiwtə a lyentɨrən a hakəwnə, tənə wule myee mya dɨ ndukodə Ma Həmɨnpwa a Yaɓwarən gə lyentɨ darən. 24Gə ləngɨn bɨləmərən bwang atɨ hwune dɨ mwo myee dɨ koɗə Həmɨnpwa gə təna naa sa ɗɨki hina dɨ məndaranye kəwnə, gə mbiɗitɨ vəni hiwtə kat ka ji-kottə a na angɨn.
Currently Selected:
2 Korintiye 8: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
