2 Korintiye 10
10
Bulus a byelə a luwa nəngɨn a nə lyentɨ dan
1Hɨnə Bulus ka nəna dɨ nyisəwnə ka hyatane ka wule ɓuk-ɓukta Ma Həmɨnpwa a Yaɓwarən. Hɨnə ma imi a sa atɨ hɨn kana gə ɓwaa kəwnə hɨn tam ka mbarətə ka byelə pepeye. Shezə hɨn kana tam ɓwaa kəwnə, a vor dorshe de na dɨ səɗəwnə wak. 2Hɨnə dɨ nyisəwnə atɨ ɓe hwunaa ɗɨkdi na ɗəwnə sɨmwarashe gə na bɨlə imi atɨ hinaa dɨ ɗa wule ɗate vɨratə a dɨ ɗa. 3Gələ nagi a nə sate atɨ hinə nza vor vɨratə a vor sɨtə, hin aawa pakawatə ɓətɨ mi vɨratə a dɨ ɗa a sɨtə. 4Gəkɨlə wule sɨ nyate hina dɨ pakawatə kaarən, ingɨn aa wule 'ye mi vɨratə a dɨ pakawatə kaarən nə. Shezə wule sɨnyatɨngɨn nə ka gəta Həmɨnpwa gə nda kɨɗa məntəmətə darən i jeronye. 5Ka wule sɨnyatɨngɨn hina dɨ kɨɗa məntəmətɨ darən ka ndukodə na dɨ kərə ɓwaare lee Həmɨnpwa. Hina dɨ viriwadə ɗyangale da nagi ndo ma kat gə nda koddə Ma Həmɨnpwa a Yaɓwarən. 6Hin ɓa gə ka ɓwesɨtə, gə nagi ndo ma a aa koddəha hina ɗan sɨgbəɗye, anda mbiɗisəwnə mwa koddəha.
7Niyəmdə shee a humwasəwnə. Anda ama nə də dɨ niyi ɓətɨ ɓə mwaka nəngɨn, atɨ ndi nzə-kottɨ diyalə dɨ ɗa lyenta Ma Həmɨnpwa a Yaɓwarən, nda leyə atɨ sə mgban hina gə. 8Gə nagi na məndaranye kɨr-kɨr ka wule humwate Həmɨmiye a venə, angɨn gə hina gwadə mwadiyale dəwnə nda kangə dwat, aa gəkɨlə hina kɨɗəwnə, sopye aa dɨ genə ka angɨn. 9Hɨn taawa ɓəri gə na vəwnə kala ka ləməgyee na dɨ dorownə. 10Gə imi a sa atɨ, “Malɨmyee nda doro nə kɨr-kɨr ka gbindawne kaarən, hye kana nan sɨne she, makodingati taa asə də, byele dan nee ɓaa.” 11Wule myee dɨ bwe ləməgyee kat a leyə atɨ, anda ya ləməgi malɨmtɨ de a gə, hɨn kana tam ɓwaa kəwnə, sə mgban lyentɨ de ɓa gə a fəra na zə hakəwnə də.
12Hin aawa ɓərə gə hina kana nəngenə kaarən, a wule myee dɨ humwa nəngrən. Təna dɨ kana nəngrən ka nənəngrən, tən dəɗi tənaa lee asə. 13Hɨnggenə hin aawa məndaranye a ndukodə nəngenə a pɨrgə sa kana. Shezə hina dɨ məndaranye gə haa lyente Həmɨnpwa a kangdenə də, lyentɨngɨn nə muɗi tɨlə hakəwnə. 14Hin aawa məndaranye a pɨrgə haa kana, naya ɓa gə anda hinaa nda shi hakəwnə. Shezə hina ɓərə a shikəwnə ka ləmə feme da Ma Həmɨnpwa a Yaɓwarən. 15Sə mgban hinaa pɨrgə haa kana ka məndaranye denə a nə lyente imi a ɗa. Hina bəə myensenə atɨ mwadiyale dəwnə kana nyerə a pɨrə humwa kɨr-kɨr, wule lyentɨ denə a wakasəwnə ɓa fɨlə a mbəgə hee, 16gə hin ɓa bwe ləmə feme baa a dɨmgə vor njiya dəwnə. Hinaa dɨ məndaranye gə lyente imi a ɗatɨrə, hin ɓa muɗə hee imi aa nda zə də. 17Shezə “Ma dɨ məndaranye, maa nda məndaranye gə le da Həmɨmiye ɓəmbə.”#10.17 Naasə: Jerimaya 9.24. 18Gəkɨlə aa ma dɨ humwa nəngɨn nə mya dɨ humwan, shezə ma Həmɨmiye a dɨ humwan nə.
Currently Selected:
2 Korintiye 10: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
