2 Korintiye 2
2
1Gə-angɨn na boyə huboshi atɨ taa diyə mɨnə hakəwnə, gə ɓe zətɨ de aa shikam ka yedi-kɨttə ka sə. 2Ɓə hɨn kana kɨɗa yedingəwnə, ɓə she wonə ɓa vi hanɨngta, aa mɨni myee na kɨɗa yedingrən na? 3Mgbaalə sa ɗa na ɓə dorownə malɨmtɨrə nə atɨ, gə hɨn kana tɨla a hakəwnə, ɓe naa gə ka yedi-kɨttə dɨ haka myee kana təna vi hanɨngtə. Hɨn mwakəwnə kat atɨ hanɨngtɨ de, hanɨngtɨ dəwnə nə kat. 4Gə ite na dorownə malɨmtɨngɨn, hɨne a vor hubo diksɨktə ka sɨtɨ kpalatə ka hɨritə a dii. Taa dori gə na kɨɗa yedingəwnə, na doro gə hwuna leyə atɨ hɨne dɨ mworəwnə kɨr-kɨr.
Nggurə ɓwaara gə səhase dan
5Anda ama kɨɗa yediha gə səhasa nda ɗa, aa hɨnə nda kɨɗa yedi ɓəmbə, hɨm nə kat nda kɨɗa yedingəm, taa mwi atɨ na gɨrədə ləngɨn. 6Wule sɨmwarashe hakpanə ji-kottə a ɗan kənəte. 7Ndɨka hwuna nggurəngə səhase dan, hwuna gwadən a nyerədən gə ɓe yedi-kɨttə aa saragə maasəngɨn. 8Gəkɨlə ləngɨn, hɨnə dɨ nyisəwnə atɨ, hwuna mɨna bɨlən mwoha. 9Sa ɗɨki mgban na dorownə malɨmtɨngɨn nə atɨ, gə na leyə a hwun ɓa mba koddə shee na kənəwnə kat. 10Ma kat hwuna nggurəngə səhase dan, nagi ndo wule səhasə, hɨn mgban hɨn nggurəngə səhasəngɨn. Ka diyale səhasa na nggurən gən, anda a wule səhasə nə də mya ngguro ma gən, hɨn nggurən gən a humwa Ma Həmɨnpwa a Yaɓwarən gə le dəwnə, 11gə ɓe Shetan aa ɗɨm humwatə a lugəm doome, gə hɨm leyəm kuta dan kat.
12Ite na tɨla a vor vɨra Tɨros gə na hiwa ka ləmə feme da Ma Həmɨnpwa a Yaɓwarən, Həmɨmiye a wuni kwatɨfe gə na ɗan lyentə. 13Ite na niyə nzə-nuwogi Titus tam a hangɨn, huboshi aa bə, na gərən kwasatə a pɨrə a muɗə vor njiya Masɨdoniya.
Kɨnne dɨ haka Ma Həmɨnpwa a Yaɓwarən
14Mye ɗa Həmɨnpwa usəkətə ndukodən, gə sɨnə ma dɨ koɗi kenə a vor gɨɓatə dɨ ha kɨt ne da Ma Həmɨnpwa a Yaɓwarən, mya dɨ woyə a bwe le dan a mbəgə hee ka pomo-nɨnga fɨli mbəgə hee kat. 15A haka Həmɨnpwa, hin minə dɨ woyi bwe ləmə mbətə ɓətɨ pomo-nɨngə dɨ dɨma dɨ haka Ma Həmɨnpwa a Yaɓwarən dɨ zə haka myee ɗɨm mbətə kat ka myee a kwaamɨ we dɨ mbəri. 16A haka myee a kwaamɨ we, pomu wo, a haka imi mgban pomo-nɨngə myenti. Wonə ma kəni a nənəngɨn nda ɗa wule lyenta kpe-lagbe da Yesu? Taa ama də. 17Hin tam ɓətɨ mbiɗitɨ ɓwaare, a wule myee dɨ woyi bwe le da Həmɨnpwa gə təna ɗɨm shi nənəngrən a ɓa gə kwa-moone darən. Shezə hɨnggenə ka diyale hina dɨ ɗa lyentɨ denə gə hinə ɓətɨ myee Həmɨnpwa a lyentɨrən gə hina bwe ləme dan bwang ka tikɨstə gə hinə kɨse da Ma Həmɨnpwa a Yaɓwarən.
Currently Selected:
2 Korintiye 2: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
