2 Korintiye 1
1
1Hɨnə Bulus kpa-lagbe da Yesu Ma Həmɨnpwa a Yaɓwarən, a Həmɨnpwa a nggɨlə dɨ kanatɨ dan. Hɨnə ɓwaa ka Timoti nzə-nuwogəm a vor kottə.
Wunakaha zə haka ji-kotte a vor vɨra Korintiya kat ka myee Həmɨnpwa a vomiyərən 'ye a vor njiya Akaya.
2Maa wuladəha ka ɗolte dɨ haka Həmɨnpwa Baagəm ka Həmɨmiye Yesu Ma Həmɨnpwa a Yaɓwarən a nza ɓwaa kəwnə.
Həmɨnpwa a dɨ tal yedye
3Ɓondiyəm Həmɨnpwa ndi Baagə Həmɨmiye dam Yesu Ma Həmɨnpwa a Yaɓwarən, sɨnə Baate ka purutə, sɨnə Həmɨnpwate dɨ tal yedye. 4Sɨnə tal yedingenə a vor tənətɨdenə kat, gə hin mgban hina tal yedi myee a vor nagi ndawula tənəti ka wule talte Həmɨnpwa a tal yedingenə. 5Gə ɓətɨya tənəta Ma Həmɨnpwa a Yaɓwarən a pɨrə sɨsenə kɨr-kɨr, səngɨn nə ɗa dɨ haka Ma Həmɨnpwa a Yaɓwarən hina ɗɨm tal yedye kɨr-kɨr. 6Hin kana pɨrə vor itɨ tənəti, mgbaalə tənətɨngɨn nə atɨ mya tal yedingəwnə hwuna ɗɨm mbətə. Anda mgban mye tal yedingenə, mgbaaləngɨn nə atɨ gə mya tal yedingəwnə ka wule tal yedye ɓa vəwnə mbasɨtɨ ɓwamosowe a vor tənətɨ dəwnə ɓətɨ hina tənəə. 7Hinə dɨ bədə myensenə a nəngəwnə, gələ hin leyə atɨ naya hwuna pɨrə vor wule tənətɨngɨn ɓwaa kenə, sə mgban hwun ɓa ɗɨm tal yedye.
8Ji-nuwo, ɓe hwunaa ɗongə lee ləngɨn, ɓə kana hwuna lee sa bəngrenə a vor njiya Asiya ka tənəte hina pɨrədə. Tənətɨngɨn a saragə maasəngenə hinaa leyə atɨ hin ɓa mbə. 9Hina niyə ɓətɨ hin ɓa mbərə. Shezə angɨn a gwadenə hina leyə atɨ, hinaa dɨ mba ɗa asə a gwadə nəngenə, Həmɨnpwa nə ɓəmbə hina tingɨrən, ndi ma dɨ maddə wogye. 10Sɨnə dɨmdenə gə kwa-we, wule a hin ɓa nda pɨrədə, nda mɨna dɨmdenə gə wa a humwa. A hakan hina bədə myensenə gə ndi ɓa pɨrə humwa a dɨmdenə hina mbə. 11Gə hiwte hwuna dɨ ɗa gə le denə, ɓwaare hananang ɓa ɗa Həmɨnpwa usəkətə a humwan gə le denə ka gwate nda gwadenə ite nda wulakenə a kɨl hiwte ɓwaare a dɨ ɗenə.
Bulus a gbyaladə omotɨ dan
12Mgbaalə məndaranye denə nə atɨ səɗə-yedye denə nə dɨ bɨldə nzaasenə a vɨratə ka wakasəwnə bwang ka tikɨstə, aa ka wule kuta ka lelə vɨratɨnə, shezə gə wuladəha da Həmɨnpwa. 13Hinaa dorownə i ləməgi oti pɨrgə 'ye hwun ɓa mbarən a bələ a leyə. Na hɨmagə sate atɨ, 14hwuna nda lee diyalə ləməgye denə 'ye hina shikəwnə kaarən kat, gə ɓəgəng gbɨlə hwuna leyə. Hwun ɓa sɨga leyə kat baa a məndaranye kenə ɓətɨ hin mgban ɓa məndaranye kəwnə a fəra Yesu Həmɨmiye ɓa mɨnakan a vɨratə.
15Gəkɨlə na mwakəwnə a nə ləngɨn, kanatɨ de nə atɨ, hɨn ɓa zə hakəwnə a kwamətə gə hwuna ɗɨm pepetə a laka kpe. 16Na mwo atɨ na koɗə dɨ hakəwnə hɨn kana ɓa muɗə Masɨdoniya, dɨ hangɨn nə mgban na mɨna a hakəwnə gə hwuna gwadi na pɨrə a muɗə njiya Yawudiya. 17Hwuna dɨ niyə ɓətɨ omoti na nzaa ɓitɨrə ɗəng taa nidə pepe a bəl yedi ma? Hwuna dɨ niyə ɓətɨ humwatə kana bi ɗəng na nzaa ɓi omota, ndəng mgban na səwnə atɨ na zə, na mɨna virwo a səwnə atɨ taa dɨ zə ɓətɨya mi vɨratə a dɨ ɗa?
18Shezə Həmɨnpwa nə nzə-takale de ka tikɨstə, sə mgban ləma hina hiwawnə kan taa ndələ də. 19Gə ndi Nze da Həmɨnpwa Yesu Ma Həmɨnpwa a Yaɓwarən, sɨnə ma hɨn ka Silas ka Timoti a hiwawnə ka le dan, taa ndələ də a nə Yesu, ləməgingɨn diyalə nagi goɗi. 20Gə nagiya furo ləməgyee Həmɨnpwa a boyo a nzadərən a gə, diyalə tən naa a nə Ma Həmɨnpwa a Yaɓwarən. Səngɨn ɗa dɨ haka Yesu hɨm ji-kottə a dɨ sa atɨ Amin, gə fukata Həmɨnpwa. 21Həmɨnpwa nə gwadenə, kəwnə kat mya ɓə kangəm dwat a sɨtɨ Ma Həmɨnpwa a Yaɓwarən. Sɨnə vomiyəm, 22nda ɗɨkəm ɗuwo sate atɨ hɨm nə hɨnggən, ka Pitɨ Ɗəmɗəmtə a hubosəm, sɨnə kwamətɨ wule shee ndi ɓa vəm a humwa.
23Həmɨnpwa nə nzə-takale de ka ite atɨ na kwo zətə a Korintiya ɓə, gə ɓe zətɨ de aa ɗɨkə na nyakəwnə gə wule shi tukutye hwuna dɨ ɗa. 24Aa mbamti hina dɨ bɨləwnə a dɨ səwnə atɨ, hina pɨrgəwnə ka asə, shezə hinə dɨ ɗa lyenta Həmɨnpwa ɓwaa kəwnə gə hwuna gə ka hanɨngtə, gə dɨ ha mwadiyale dəwnə hwuna kangə dwat.
Currently Selected:
2 Korintiye 1: bcy
Highlight
Copy
Compare
Share
Want to have your highlights saved across all your devices? Sign up or sign in
(New Testament) © 2023 the Nigeria Bible Translation Trust
In cooperation with the
Ɓwaatiye Bible Translation and Language Development Project
and Wycliffe Bible Translators, Inc.
