Daidasi 3
3
Keriso wenaalinumi pape aununa angele lea ei
1Nena wenaalimi nimu andere pimi gapamani alinuna rolo para aoma nimuna angele pangoma epe aunu pina lalapape ae. 2Nimimi menda para yangona pi na-lere yanda paluma raminyeke puma ara naare raayo pawa yarame komalolo pula ara alepape, lape.
3Akepeare naa pange ambalandere keyali aoma angele na-pangoma na-pape aunu raayosi puarima. Naare go suna aunu pape einumi raname komo arima eimi andi siambao-aripa. Naana ranamere yango rapu kundinono palapape ainya pange mendana alenda alenda repara wee pambada au puarima. Mendapareme naa rapu yanda liala pamendare naame pange nimu repara yanda liala pama.
4-5Go pa mapare monde rambamea Godena yarame komea ei pange pumi yarame komala ei pange penameyala epaparere nipumi naa rambamea. Nipumi go au pea eiri naame epe aunu menda pemanda diayapare nipuna ora pakama naa yarame komalo ara pisaya. Nipumi go au pisaya eiri ande nipuna epe Yaakopi Sipiridimi naa pena naki manda mandu ma-piraoma naa randepemare endoaya ei gea. 6Godeme naa mandaa Yesu Keriso naana Rambami ruparare ande epe Yaakopi Sipiridi andapupe ma-pirisaya. 7Go eiri nipuna pakama yarame komea eimi Gode rapu naa rondo menda naa maomare ande maisambao-aema endoaya eiri ora milima. Go angelenuri ora lea. 8Go angelenuri ora ma-pulaoma lala paliminya kone sialo. Akepeare Gode repara kone rulaeme repaamere nimuna aripulu ara epe aunu komea pinya kone suma lalo. Go aunuri wenaali raayo repara epe aunu pilimi.
9Go peapare apeape lea ei pange ambaisena aya kasuanuna binu pange ande Rudule Angele arere pulu ara yanda pia einuri ora gialepape. Go aunumiri ale menda papenaya pange ale menda na-andawilimi. 10Ali menda apimi wenaali ma-rekele rekele paluame rombo siape aununda piliandare gore neeme go ali rana laapo pa kingi angele lomare go alimi ora na-pangeleandare gore kou walape. 11Gupi au pia aliri nipuna koae aunumi gole nipu ma-koyao pange nipuri pora wanduaoma panane aeya.
12Neme Adimasi o Dikikusi laapo menda nee para epena rapaluandare gore neere mo ni pua alua Nigopolosi anda nane epainya poranu waru aisa pape. Niri ande kupa pu lombai pada naare epeleandare ni go anda para pua aluale. 13Senasi ande Rudule Angele waru andea ali pange Apolosi laapo niipuna polameya pipi nane ma-polopepe olemole raayosi ana pea paleme andape.
14Wenaalimiri nimuri ora epe aunu komea monge ando pala pinya. Nimumi reenu na-wia aunu na-pi ora epepe aunu komea pala pinya. 15Ni rapu mendaa aema repaame nee para yarayoe angele lanedamae. Gupuma mo nee rapu aeme Keriso yangonu para pange yarae angele damae. Godena pakama yarame komea ei pange nimi raayosi rapu winya ae.
Currently Selected:
Daidasi 3: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
