Daidasi 2
2
Kone wi wenaalinuna mana angelenu wi ei
1Go peapare neeme mo ora angele wia rupa raluma waloape. 2Kone wi alinu para koae ipa noma na-keyainya dapape. Nimuna kone para aoma kone rulada ei pange pu ada au puma la andala einu pange puri paloma wanduainya lape.
3Mendaa rupa pange mo kone wi wenanu pange ora wenanumi puaeme aunu puma yaakopi rupa ao-paidapape loma mana lape. Gupuma nimumi mendana pi la-la na-pi pange koae ipa naleme eimi dipula na-adilina lape. 4Nimumi go au pilimindare gore mo pena wenanumi pange nimuna alinu pange nimuna nongo nakinu repara pu alenaya wadame. 5Gupuma go wenanumi nimuna kone para pamu pange nimu yaakopi rupa ao-palinya dapape. Nimumi nimuna nongo nakinu pange alinu waru andere-ao pange nimuna andanu waru andere-ao pilimi. Gupuma nimuna alinuna rolea para ao-pilimi. Go aunu raayo pilimindare gore Gode repara ipula angelena mendame koae au pi menda na-deme.
6Mo pena pena nakinu pange mendaa rupa nimuna kone para paminya lape. 7Nena pili aunu raayosi wenaalimi andoma epe aunu komea andala pinya lala pape. Puri waru paloma ora rupa ora angele komea walala pape. 8Go au pilindare mendame nee repara rondo menda aya ei na-andelea. Gupumare mo yanda runguli alinu pange naa repara lape angele dia deandare nimu pange yala meala pilimi.
Pupudengi nademe alinuna mana angele
9Mo pakama pupudengi nademe alinu pange nimuna pupudengi nademe alina rolo para ala pipape. Gupuma nimumi pilimi aunu raayomere mo nimuna andaa alinu para rana ma-palimi. 10Nimumi mo nimu andere-aeme alinuna angele yokonali na-pilimi pange nimu repara pake na-no pilimi. Go au na-piri nimuri ora epe aunu komea puma panda punyaoma ao-aema lo walala pinya dapape. Go einu raayo pilimindare gore Gode naana rambami alina angele walalimindare gore epe aunu pala pilimi.
Naame epe rupa ara Yesu epolo pea naare maisambao aminya
11Akepeare Godeme yarame komea eimi wenaali raayo rambamea eiri penameyao ambala walea. 12Go yarame komoma rambamea eimiri naa para walalore naame suna aunu pulameya Gode repara kou waloaema einu giaomare kone para aomare rendepona aminya pange Gode aya rupa monge andoma aminya. 13Go aunu pulu arare ande maisambao-aema naare opolo epeleandare gore naana andaa Gode naana rambami ali Yesu Keriso nipuna paa pi ei rapu opopalia. 14Keriso nipuri naana komisaya. Nipumi go au pisaya eiri naana puaisimiya koae koae aunumi naa ma-koyapanayanda naa rambamisaya. Gupumare naare yaakopi wenaali nipuna ei komea ma-aoma epe aunu komea puluame rana komo amonoya pea. 15Naare raayosi mo wenaali repara go angele alala pipape. Nimuna pu kana ma-yariaoma pa-au pilimi repaa ma-rendepoyaoma puri paloma ara waru lape. Gupuma nena angele para gupinda go dale pangalepa loma na-giainya lape.
Currently Selected:
Daidasi 2: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
