Romo 14
14
Nena Keriso yangonu na-rali pape
1Nimina rupara ali menda nipuna kone rulaya ei puri waru na-pale ali epa kondo pambeleandare gore pa anda mipape. Gupuma nipu para lalo Go eiri ora au pili go eiri pa au pili lo apeape na-dapape. 2Ali menda nipuna kone rulaya eiri ora andaaiyalo arare nipuri paalame na-kome olemole raayo pa nelea. Go peapare ali mendamere nipuna kone rulaya eiri puri waru na-palea puluyalo arare nipumi pa ena poae alenu komea nelea. 3Go einare mo olemole raayo pa nea ali nipumiri mo ena aya alenu komea noae ali para lalo ara lalore Nee nina rolo para ale pi na-lape. Gupuma mo ena aya alenu komea noale ali neeme pange mo olemole raayo pa nea ali para Neere go au puale ali ale loma na-rali pilia. Akepeare go olemole pa noaya ali nipuri Godeme ambala meae.
4Neeme mendana pupudengi nao-ae ali para lalo ara lalore Neere epe rupa pupudengi nale ali pi na-lape. Mo nipu andere-aya alimi komea gurupa manda rali pilia. Go pupudengi noae alimi nipuna pupudengi epe rupa nelea. Akepeare Godeme mandana para pialia.
5Mendapare wenaalimiri yapi mendare ora andaa yapi kone suaeme. Go pemepare wenaali menda paremere yapi di raayo pa mendaa pea kone suaeme. Gurupa konenu wilimindare gore menda nipuna kone para epala pilia eiri go eiri ora ei lama siamba ala pilia. 6Ali apimi nipuna kone suma yapi di mendare ora andaa naare kone wiliandare gore Realina bi andasiaoma andala ara pia. Menda apimi mendaa rupa olemole raayo pa neleandare gore nipumi Realina bi andasiao andalo ara pia. Go au pia eiri mo nala endana Gode repara ranae angele danda. Menda apimi enda mendane ei nalo ara mendane ei nidi piliandare nipumi pange gore Reali andasiao andalo ara pia. Gupuma nipumi pange Gode repara ranae angele da. 7Naa go aema wenaali mendame lalo ara lalore Nina go endoma ayo eiri nina komea ayo pi na-dema. Naa menda naana gole na-komoaema.
8Naa endoma aemandare Realina rana pea eina aema. Naa komelemanda pangere Realina rana pea au koma pima. Naa komelema o pa alima pangere naare Realina ei aema. 9Akepeare Reali komoma wala rekea eiri gore nipu ande komeme wenaali pange pa aeme wenaalinuna Reali aluame pisaya. 10Go einare neeme nena yangonuri akepea rali pilipae. Gupuma nena ame para lalo Neere alenda dia piri akepea lalepae. Naa raayo Godena lee wilina nipumi rali pinyayanda reka alima. 11Go eiri ande Godena angele wia bukame gupi leanda lalo:
Ni na-kome pa endoma ayo einare wenaali raayome
ni repara rumu yaruaoma yainya pilimi, lea.
Gupuma wenaali raayome wenaali ambunana
lee rona ara niri ora Gode lala pilimi.
Go angelere ande Realimi lea.
12Naa raayo Godena lee wilina reka ara naame naana pama aununa reenu raayo Gode repara la dema.
Nena Keriso yango menda koae eimi na-ma-lopainya lape
13Go einare menda menda rali puarima ei pereyaminya. Go au giaomare naana yangonu ma-lopaoma koae aunu ma-pape aunu na-paminya. 14Ni Reali Yesu rapu runaoma ayondare nina kone wipare ale menda nina pulua eimiri ni na-ma-koyalia kone wi. Go peapare ali mendame nipuna kone sialo ara lalo Neeme go au pula eimi ni ora ma-koyalia kone wiliandare gore go eiri ora nipu reparare kolea. 15Nena nele enda menda nena yangona konenu ma-koyalindare gore nipu repara pu na-alale. Nena nele endame nena yango na-ma-koyainya lape. Akepeare Yesu Kerisore go alina epa komo pea. 16Neeme epe ale loma angele lo ale ale mendame wala koae bi na-ma-siainya lape.
17Monde Gode nipuna Ki Rambuao-aya Eiri enda para ipa laapo naleme ei o na-naleme eimi na-pea. Godena Ki Rambuao-aya Eiri gore rendepona aya aunu pange Gode rapu kuma puma aeya ei pange ande Godena Yaakopi Sipiridimi gida raname komala ei. 18Go einare ali mendame Kerisona aunu paliandare gore Godeme nipu rapu raname komelea. Gupuma wenaalimi pange nipu para lalore Ora piae loma nipuna binu lalimi.
19Go einare naamere kuma pi einu ma-epao-aya aunu pange menda menda puri ma-palao-aya aunu kome pala puaminya. 20Neeme enda raayo nola kone wili eimi Godeme pea au na-ma-koyainya lape. Enda raayo pa nele. Go peapare neeme nele enda menda menda ali koae eimi ma-lopape nono pilia eiri gore kolea.
21Go eiri ora au gonda. Nele endame pange nele ipame nena yangonda ma-lopape nono pilindare go ipa o endanu na-nape. 22Go einu pape eina nena kone wili rupanuri gore nee pange Gode niipina komea kundiri pipape. Ali mendame nipuna kone para ipula ei puma neme koae ei pawa ae kone na-sualia ali nipuri ora raname komoae ali alia. 23Go peapare ali mendame nipuna kone sialo ara lalore Go nalo alere ora ale nalo o koae ale pae loma kone laapo laapo wiliandare gore Gode nipumi lalo Go alimi pa-au pia dea. Akepeare go ali nipumi go enda nolameya arare Gode repara kone na-rulaya. Ale menda puluameya ara Gode repara kone na-rulaoma ara pilindare gore go eina rupara koae ei epelea.
Currently Selected:
Romo 14: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
