Romo 13
13
Andere pimi alinumi dame angelenu waru pangalepape lea ei
1Wenaali raayo andere pimi gapamani alinuna angele waru pangalepape. Go alinu raayo andere pirinyayare Godeme puri alea. Gupuma Godeme nimu puri alea. 2Menda apimi go alinu rapu yanda diiandare gore Godeme go au pinyaloma angele lea alinuna angele rungudame. Nimumi go einda rungudimindare gore nimuna gole nimu andidame. 3Akepeare andere pimi alinuri koae aunu puaeme alinumi komea paalame komoaemepare epe aunu puaeme alinumiri paalame na-komoaeme. Go einare andere pimi alinu paalame na-komola kone wilindare gore epe aunu komea pape. Go au pilindare nipumi nee raname ora waru komelea. 4Akepeare nipuri Godena pupudengi nao-ae ali nee repara epe aunu ma-epaluameyanda aya. Go peapare neeme koae aununda pualindare neeme nipu paalame komape. Akepeare nipuna purimi nee manda andidia. Nipuri Godena pupudengi nada ali. Gupuma nipuri Godeme da rupa wenaali andiaya. 5Go eina andere pimi alinuna angele waru pangalepape. Go eiri Godeme nee rendaa gula pea eina diayapare gole nena koneme gole kone wili.
Go au puluandare gore ora au pulu ara pi kone wili.
6Go einayanda pange nimimi dakisi muni lopao peme. Akepeare go andere pimi alinumi nimuna pupudengi epe rupa no pereyalimindare nimumi Godena au pada ara pimi. 7Neenda nimuna runduaya ali alindare gore ambe ambulu moneape. One mone dakisi muninu raayo ambe alala pape. Neeme go aliri gonde aliyande loma andasiaoma andala pape.
Wenaali menda menda repara pu alape eina angele lea ei
8Mendame nee rundu na-ma-ainyalape. Nee repara runduaya eiri ora pu ada ei komea ainyalape. Menda apimi nipuna yangonda pu alo aliandare gore nipumi ande Rudule Angele apo pangalanda. 9Ande Godena mana angelemere gupi lea.
Ali pe wena o wena lami ali rapu pake na-nape lea
pange ali na-luma komape lea pange
mendana ale pake na-nape lea.
Gupuma mendana alenu meawe kone
na-suape lea.
Go einu pange mo mana angelenu mendapare raayosi go komea ei rupara epa kondo pambeme.
Go eiri gore nena gole nee rana komale rupare
nena ali yango pu waru alala pape lea eina rupara
epa kondo pambeme.
10Menda ali apimi nipuna ali yango repara pu alo aliandare gore nipumi go ali repara pa aunu menda na-pilia. Go einare pu aloaya einda pilindare gore monde Rudule Angele raayo go pangalenda.
11Go au pula peme naarere nimi kone wimiae. Ambia nimiri u na-pali reka ape naare ambala epea. Ambala naare Keriso repara kone rulao-arima eiri andalu pae. Go peapare ambiare Godeme naa rambamula pea naarere repara repara pia ae. 12Rimbale ei repara go pereyado ara yapi repara go doameyanda pia ae. Go peale koae aunu puaema aunuri giaminya. Gupuma paa naa yanda paminya naana kanga dolonu meaminya. 13Naame naana aema einu pange pima aunu raayo rendepona aunu paminya ae. Koae ipanu naleme para pange wena pake naleme o ali pake naleme aunu pange yanda pia aunu pange mendame epepe aunu piminda yanda diiame aunu raayosi giaminya. 14Nimiri nimina do rianuna rana pea einu na-pala pipape. Go au na-piri Yesu Keriso nipuri nimina kanga ma-aulalepape.
Currently Selected:
Romo 13: POLENT23
Highlight
Share
Copy
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
