Penameyaya ei 7
7
Daoseni 144 Isaraeli wenaali
1Go ei ando pereyaomare eindiolo alinu raayo malapu ora andawa. Mo eindiolo alinu mendare naare pambala naneyame aripaya mendare naare ipula nane aripa laapore ree lapona ao-lapapeya. Gupuma go alinumi mendane mendane epaya pokiki raayo sese pameya. Go pameya eiri monde ipa kouna pange suna pange repananu pokikimi lewa lewa palimiya pisimiya. 2Go ei andomare eindiolo menda naare ipula nane aoma epa. Nipumi ande endoma ao-ae Godena pare au ao-aya ale ma-epa. Go eindiolo ali nipumi monde malapu eindiolonu ora andapu wi la mea. Go eindiolo alinuri go su pange go ipanu raayo ma-koyainyayanda Godeme puri alisaya repaa. 3Nipumi mo eindiolonu para gupi la. Nimimi go su pange ipa pange repananu raayo ambe na-ma-koyalepape. Akepeare ande Godena wenaali nimuna wenona nipuna pare au ambe na-ayale go au na-pipape, la. 4-5Gupuma ande Godeme nipuna pare au ma-aripa wenaali raayo daoseni 144 raayo arimi. Go repaa mo Isaraeli andasu para aisimiya ruru raayona aoma epala pisimiya repaa. Mo ruru meala pisimiya rupare gurupa.
Diudana rururi daoseni 12
Rubenina rururi daoseni 12
Gadina ruru daoseni 12
6-8Asiana ruru daoseni 12
Napidalina ruru daoseni 12
Manasana ruru daoseni 12
Simionona ruru daoseni 12
Lipaina ruru daoseni 12
Isakana ruru daoseni 12
Sebulunina ruru daoseni 12
Diosepana ruru daoseni 12 pange
Benisamenena ruru daoseni 12
raayo Godena pare au meameya.
Epeni nane aeme wenaali kumburape
9Go ei pereyaomare andawapare wenaali ora andapupe andawa. Mendame yarepeape rupa dia. Nimuri ora anda rando rando menda menda pange ruru rando rando menda menda pange angele rando rando le wenaali raayo arimiya. Nimu raayore kaakepi aka raayo yamameya. Gupuma nimuna ki paranuri raname komalo ara siambao-aeme repana palana keranu siambao arimiya. Nimu raayo ande seana pirisaya Godena pange ande Sipisipi menasi laapona lee wilina reka arimiya. 10Nimu raayome andapu wi loma lalore gupi lame. Naa rambami auri ande Sipisipi menasimi pange mo naana seana pipi Gode niipumi naa rambamepe ae, lisimiya. 11Ande eindiolo raayo monde sea pange ande kalu alinu pange ande pa piri malapu alenu ma-kopoliaoma arimi. Gupuma nimumi monde seana lee rona piri rumu yaruaoma Gode repara yainya pame. 12Nimu raayome gurupa lisimi.
Ora ae. Gode nipuna bi minyasiado arare
puri pale ei pange paa pi ei pange
bi minyasiada ei pange
ranae angele pange
kone ora andapu su rekele pi auri
naana Godena ei ora pa suari pe ae
e lame. Ora ae.
13Monde kalu ali mendame ni parare gupi la. Mongo kaakepi aka maraoma aema repaare ane aoma ipulumipae la. Gupuma nimuri apiyapae, loma angaa mea.
14Go lapare neme lalore Ni marea lawa. Neeme komea kone wili lawa. Go lawandare nipumi wala gupi la. Mongo repaare ande koae yandanu andama andama puma wanduama wanduama pamende repaa ae la. Nimuna akanuri ande Sipisipi menasina weeme randepe rumbuma yaako mapae einu maraeme la. 15Go eina reenare nimumi rimba yapiyalosi Godena seana lee rona ara nipuna pupudengi nalimi. Mo seana pia Godeme mo wenaali nimu raayo ale mendame warapanayanda rambamilia. 16Nimu reame pange ipa nalame wala na-komeleme. Naareme pange nipuna riripu pea eimi pange mo wenaali na-ma-koyalia.
17Akepeare mo Gode nipuna seana rapu pia Sipisipi mename nimu andere-alia. Ande Sipisipi menanu andere-ao-aya Alimi pea rupa andere-alia. Nimu nipumi ande endoma aya ipa ande pa ipulu piri ipa para karu pelea. Gupuma nimuna lee para epelea reenu Godeme kunalia.
Currently Selected:
Penameyaya ei 7: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
