Galaesia 6
6
Naame menda mendana kenda rambamu riaminya
1Na amenuo, nimimi ali mendame koae aunu menda pulu-ainyaloma andelemendare gore nee Epe Yaakopi Sipiridimi pa dea au puali ali neemere nipu ma-rendepoyape. Go au pilindare gore neeme kuma pi rupasi ma-rendepoyape. Gupuma nee pange waru andere-ape. Akepeare nee laa andeleaya laloe.
2Menda mendana kendapi einu riala pipape. Go au pili eimiri gore Keriso nipuna Rudule Angele raliale.
3Ali mendame nipu bi na-winyayapare nipu bi wi ali lari pamiliandare gore nipuna gole nipu makirada. 4Ali menda nipuna pilia aunuri epe au pi o koae au pi lo pangere nipuna gole rali pilia. Epe aunda piliandare gore nipuna pande auna raname komelea. Go au pi auri menda rapu manda meaoma na-pape. 5Akepeare menda nipuna kendapi eiri nipuna gole riala pilia.
6Ande Godena angele andolameyanda wape pia ali nipumi siamba alia epe alenuri gore nipu mongeriada ali rapu rali pilia.
7Nena gole nee na-makirape. Mendame Gode keyali na-ma-aulao-aya. Ali menda nipuna mapuna polea wai alenu napedeandare gore mo nipuna poala alenu komea nelea. 8Ali mendame nipuna ambalana konenu pa siamba ara e mapu poleandare gore go ei ruparare gore komala eina nape alenu mandia. Go peapare mendame ande Epe Yaakopi Sipiridina aunu rupara pupudengi neleandare gore Epe Yaakopi Sipiridimi nipu endoaya ei aloma naare raayosimi ora pa-ao-alia. 9Go einare epe aunu pape eina gimi na-komaminya. Naame gimi na-komelemandare gore ande wai alenu napeda naarenare gore epe endanu komea mandima. 10Go einare menda repara epe aunu pape pora menda sualiandare gore naare raayo epe aunu komea pualima. Go aunu pula ara mo naana mendaa para kone rulaema repaare popeke ki nane ripinilima.
Pereyada angelenu lea ei
11Nimimi neme na kimi ramayo wape pula arare andapu apo wape pili andalepa. 12Go nimuna dona yongale rungulape eina puri padame repaa nimuri mo mendane wenaalina lee angaana kama nane aunumi andainya au pulu ara ako lambi diame. Nimumi go au pi auri mo Kerisona ekeraisa wape pi repana kone rulaeme eina nimu rendaa meapeyanda peme.
13Monde dona yongale runguli au puaeme repaame golere ande Rudule Angeleme lea aunu na-peme. Do yongale rungulape eina puri padame repaame lalore Naame ma-parima loma ako lambi luame. 14Go peapare nemere ale mendana bi na-minyasialua. Nemere Yesu Keriso komisaya eina komea nipuna bi minyasialua. Nipu ambala ekeraisa wape pi repanana komea eiri go suna aunu pape einu kone siape eiri na kone ruparare ambala pereyaya. Gupuma neme go aunu wala na-pulua.
15Yongale rungudima o yongale na-rungudima pange ale menda dia. Naa pena wenaali Godeme ma-aulaya ei komeare ora ririnale. 16Nimuna ao-paluaeme rupara go lalo angele ralueme repaa nimu rupara pakama yarame komala ei pange kuma pi ei winya. Nimu rapu pange Godena wenaali rapu go au pinya.
17Pereyado arare go angele lalo. Ni repara mendame wala rendaa menda na-ginya. Akepeare ambia nina dona go wia kondore gore niri Yesu Kerisona pakama pupudengi nado ali ayo ei walea.
18Go einare naana Reali Yesu Kerisona pakama yarame komea ei na amenu nimi rapu winya. Go au pinya.
Currently Selected:
Galaesia 6: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
