Epesusi 1
1
Polome Epesusi ree anda aeme wenaali para ramayo wape pisaya ei
1Niri Polome go ramayo wape pi. Gode nipuna ranana niri Yesu Kerisona aposolo ali ma-maya. Neme nimi Epesusi ree anda para aeme wenaalinu para go ramayo wape pi. Nimi Godena epe yaakopi pu romba ma-siae wenaalinu pange Yesu Keriso rapu runaoma ara wenaalinu Gode para raminyeke puma ara angele pangoma puaeme.
2Naana Apa Gode pange naana Reali Yesu Keriso niipu laapome pumi yarame komea ei nimi para pakama ginya pange nimi para kuma pi ei niipu laapome ginyae.
Keriso rapu runaemandare nipumi naana remonu rana ma-pao-aya ei
3Naame Keriso rapu runaoma aemandare Yesuna Apame naa yakili ada ara naana remona endanu nipuna Aya Lena wia einu naa wamo pinyaya naa para ambala gea. Go einare naame naana Reali Yesu Keriso nipuna Apa Gode para ranae laminya. 4-5Ambaisenande Gode nipumi go su ambe na-wari ara naa Yesu Keriso rapu runaoma ara nipumi nipuna wenaalinu amonoya ambala yarepe misaya. Go pisaya eiri Gode nipumi naa nipuna lee rona epe yaakopi pange rondo menda na-ae wenaali amonoya pisaya. Godeme naa para pumi kome eimiri nipuna ambala la wisaya rupa Yesu Keriso rapu runaoma naa nipuna siriri ma-aya. Go einare Gode nipuna ranana pange nipumi pula loma kone wisaya ei. 6Gode nipumi nipuna pumi pakama yarame komea eimiri naa para nipuna loma komea Naki pakama gisaya einare naame Godena bi ma-minyasiaminya. 7-9Keriso komeandare Godeme naana koae aunu kone na-wi naa kepe rapaisaya. Godeme nipuna pumi pakama yarame komea eiri ora andaaipeyala ara nipumi naa go yarame komea ei ora andapupe guaya. Gode nipuna kone waru rekele pu suma andisaya eimiri nipumi nipuna pula kone wisaya ei pisaya. Nipumi nipuna kundiripu pula kone wisaya eiri pu pereyalua kone wisaya. Kerisona rupara go au pula kone wisaya. Gupumare Godeme go kundiripu pula kone wisaya eiri naa para penameyao walisaya.
10Go naare milia dinare Godeme nipuna pula kone wi ei pilia. Gode nipumi nipuna pula kone wi eiri Gode nipumi wari wenaalinu pange so yaa nane pange go suna aya alenu raayosi mendaa para ma-mombeaoma Keriso kalu ali ma-piralia.
11Gode nipumi naa ambala manda muma Keriso rupara rumada ara Godeme nipuna anda ruru repaa amonoya naa ambala ma-aisaya. Go misaya eiri Gode nipuna ora ambala ririna go su yaa laapo ambe na-wari ara pula kone wisaya ei. Go su yaa laapona pe aunu raayosiri Gode nipuna ambala ririna pula kone wisaya ei pange nipuna pinya kone wi ei. 12Ririnare mendame ambe na-pi ainyaloma naame ambala Keriso repara nipumi pula laya aunu ora pilia loma maisamba ara naame Godena epe paa pi puriri raname komala ara minyasiaminya.
13Gupumare nimi pange ora angele pangoma aemendare nimi go epe angelemere gore nimi rambamea. Nimimi Keriso para kone rulaisimiyandare Gode nipumi nipuna la wi angele menda lala ara lalore, Nimi repara epe Yaakopi Sipiridi gula, lisaya rupa nipumi nimi para monde Sipiridi gisaya. Nimi go Epe Yaakopi Sipiridi gialo eimiri gore nimiri nai loma rekena sialo, lisaya. 14Ali mendame mena yawe duame wali kadia dina wali kari ada rupa mandare Godeme nipuna wenaali repara go Yaakopi Sipiridi ambala gea. Go einare go Sipiridi ambala gea eimiri, nipumi nipuna wenaali repara adoa loma la wisaya leenu raayosi milima. Naare koropa wi wenaali mandana arimapare Godeme go pea eimiri naare kepe rapae wenaalinu alima, kone suaema. Go einare Godena epe paa pi puriri raname komala ara minyasiaminya.
Polo nipumi yainya paripaya ei
15-16Go einare neme ambala ririna nimimi Reali Yesu para kone rulao-aeme ei pange nimimi Godena wenaali raayosi para nimina pu aloaeme ei pangoma neme Gode para naare raayosi nimina ao-paluaeme eina ranae loayo. Neme nimi para kone suma yainya pao-ayo dinare gupa yainya puayo. 17Neme naana Reali Yesu Keriso nipuna Gode mo epe paa puma puri pale Apame mo Epe Yaakopi Sipiridi nimi repara ginyayanda yainya pao-ayo. Mo Epe Sipiridimi nimi epe kone rekele pu ma-siainyaya pange nipumi Gode nimi repara walenaya pange yainya pao-ayo. Neme nipu lora pi eiri nimimi Gode kone sialiminyayanda yainya pao-ayo. 18Neme nimi repara Godeme nimina remona lee rumbu pea ei ma-kiaoma pange nimina konenu ma-lombao siaoma Godena paa ma-andainyayanda neme Gode repara yainya pao-ayo. Go eina nimi Gode nipumi mea wenaalinu nimimi mo maisamba pimi aunuri kone sialiminya. Go maisamba pimi aunuri monde Gode nipuna wili mandaa meada ara lea rupa nimi yakili ada ara epe aunu andapupe gula lea ei kone sialiminyaya, yainya pao-ayo. 19-20Gurupa pange Gode nipu repara kone rulao-aema wenaalinu Gode nipuna puri waru pale ei andaai mandana naana pu romba rupara ma-piraya ei nimimi kone sialiminyayanda yainya pao-ayo. Gode nipumi monde naana pu romba rupara puri waru pale wele kongapumi pupudengi noayo eiri go mendaa kongapumiri nipumi nipuna Naki Keriso komisaya ei ma-rekoma nipuna Aya Lena nipuna popeke ki nane ma-piraisaya. 21Keriso nipumi Gode nipuna Aya Lena kalu alinu raayosi pange ririna alinu raayosi pange andaa alinu raayosi pange realinu raayosi lu angulao-aya. Yesu nipuri ambia pange ora werepe nane kalu ali bi wia ali mendame Yesu nipuna bi wi ei lu angulape-nae-ya. 22Gode nipumi wari alenu raayosi Kerisona ange rolo para suma Godeme Keriso nipuna wenaalinu para alenda alenda raayonuna nipu komea Reali ainyayanda ala monelisaya. 23Gupumare Keriso wenaalinuri Kerisona do aema. Keriso nipuna gole go su yaa laapo rupara aeme alenu pange wia alenu raayosi ana ma-pao-aya. Go ei mandana Keriso wenaalinumiri Keriso nipu ana ma-pao-aeme.
Currently Selected:
Epesusi 1: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
