1 Desalonaika 2
2
Polome Desalonaika ree anda nane pupudengi nisaya ei
1Amenuo, naame nimina andaa kimisu epe auri pa na-epama konere nimina wimiae.
2Desalonaika ree anda nane epolame amonore mo Pilipai ree anda nane ara wenaalinumi naa para ero larimi eimiri naa yalame ma-komada ara naa rendaa giame ei pange nimimiri pangamende. Go pamepare naana Godeme naana pu kana ma-yari aripandare naa rapu yanda liala ainya gole nimu para Godena Epe Angele epa walama. 3Naame go epa konge dama angelere wenaali koyape au pulame pange naana pima alenuri ale menda andere-ara na-epama pange wenaali makiraluame na-epama. 4Go au na-piri Godena rana pea rupa nipuna angele waloaema. Godemere naare ande Epe Angelere mandana naame ma-pamualima kone wia eimiri naame wenaalinu rana ma-paluameya naana rana pia ei na-pilima. Go einu na-piri Godeme naana puaema einuna reenuri la andoayanda nipu rana ma-pape aunu komea puaema. 5Naame nimi para mimi pula ara nimi para mimi pi angele na-lema eiri nimi kone wimi. Naare yayapi loma panda lia lia puaya ali mandana na-arima. Godena lee rona ara pima einu yandare nipumi kone wia. 6Mendane wenaalinumi pange nimimi pange naana binu minyasialiminya yanda na-pama. 7Naare Kerisona aposolo alinu arayapare golere nimi para go au pipa go au pipa loma mana mana na-lamande. Go peapare naame nimi reparare anginumi nimuna nongo nakinu wamu puaemende rupa nimi repara kuma pama. 8Naame nimi repara pumi komama eimiri naame nimi rapu Gode repara epea Epe Angele komea rali pulame na-pamapare naana endoaya einu pange nimi rapu rali pulame pama. Nimiri naana pumi pange na-kepele repaasi arimi.
9Amenuo, nimimi naame ipa kapu rambamu nama einuri nimimi kone sula pimira. Naame naarena pange rimbala pange pupudengi waru noarima eiri nimi mo Gode repara epea Epe Angele wadema eimi nimi kenda ma-riape yanda pamae.
10Godeme pange nimimi pange andamende. Nimi angele pangeme wenaali repara naame naana pama aunuri pai menda dia pange ora eiyande pange rondo menda na-aya eiyande. 11Naame nimi repara pama aunuri ande alimi nipuna nongo nakinu repara puaya aunu manda pamande. 12Naame nimi pu kana ma-yari arima. Gupuma naame nimina lo romba ma-epeao pama. Gupuma nimimi Godena rana pea rupa ao-paluma nipuna Ki Rambuao-aya Ei rupara paa pi ei rapu ao-paidaminyayandare nimi wilia eina nimi kongeyo piramande.
Ora kone rulada ara kendanu bembolaisimiya ei
13Go einaya ale mendana pangere naame Gode para ranae angele lala puaema. Gore ande naame nimi para Godena angele ma-epama dinare nimimi su alina angele rupa na-pangamepare ora Godena angele gole pangoma meamende. Go eiri gonda. Kone rulaeme wenaali reparare Godeme nimi rupara pupudengi nala. 14Naana amenuo, ande Diudia andasu para aeme Godena Keriso wenaali repara pisayande ei nimi para pange pande. Go au pi auri go para aeme Yesu Kerisona wenaali repara pande. Nimimi namende rendaare nena anda alinumi gole pamende rupa mandare nimumi ande Isaraelimi mandu rangala pae wenaalinumi rendaalinu ma-nao-aisimiya ae. 15Go menda alinumiri ande Reali pange Godena poropedi alinu luma naa rendaa rendaa ma-nao-arimi. Nimumiri Gode para rana na-ma-pao-aeme pange nimuri wenaali repara yanda yanda waru luma pange rendaa rendaa waru peme. 16Mo ande Isaraelimi na-mandu rangala pae wenaali para ande ma-endape angele wadoame pamapare mo alinumi rudu doame rapameae. Go au puaeme eimi nimuna koae au peme einu andayoma ora andaai wiae. Gupuma ambiare go peme eimiri Godena rono pangola pea ei nimina gole were pimi eina nimu para gole epa wiae.
Polome nimuna andaa wala kimisu polame wee pambaripaya ei
17Amenuo, naame nimi rapu engeisi mendaa na-arimapare nimi para naana kone puaripae. Naame nimi rapu aluame kone waru siala ara epape pora waru aisa pamae. 18Naana konemere nimi para wala perekeya epolame kone siama. Niri naare andapumi nimi repara wala lekeya epolame pawapare Sadanimi pora sese pae.
19Werepere naana Reali Yesu wala perekeya epeleandare gurupa naare nipuna lee wilina mombea arare naame ale milimapae. Naana kone su alo peme eiri aleyapae. Epe yangi ale yangi mulame raname komoalimapae. Nimi komea. 20Eeyara, nimi komeame naana pu rana ma-pala pimira.
Currently Selected:
1 Desalonaika 2: POLENT23
Highlight
Copy
Compare
Share
Want to have your highlights saved across all your devices? Sign up or sign in
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
