མཇལ་ཁ། 2
2
ཨེ་ཕི་སཱས་ག་ ཆོས་ཚོགས།
1ཨེ་ཕི་སཱས་ག་ཆོས་ཚོགས་ག་ ཞིང་ཁམས་ག་འཐེན་པ་ག་ཏཱན་འབྲི་ཤོ།
ཨོ་ཐ་ཡི་གུ་ཤོ་ རོ་ཀ་ལ་ཉོང་ལོ་ཀ་ཕྱག་ཀ་ སྐར་མ་སྨིན་དྲུག་ཟུམ་ བསྣམས་ཁཱན་དང་ གསེར་ག་ག་ཙ་ཟུམ་ག་པོང་ཀ་ དང་ཉི་བཞུགས་ཁཱན་གི་ གསུངས་ཅ་གི༌ལ། 2ན་ཤི་ཨ་ཁཱན་བ་ ཇི་གི་སེན༌ཅ། ན་ཤི་དཀའ་ཝ་ཅཱད་ཉི་ ལའི་ཨ་ཁཱན་དང་ བཟོད་པར་སྒོམ་ཉི་ ཐེས་ཁཱན་ཁེ་པ་ ཇི་གི་སེན༌ཅ། སོ་ངོ་ངན་པ་ཆོ་ཁཱན་བ་ཀབ་ཉི་ ན་ཤི་ཐེས་པུ་མཱན༌ཅ། ཉི་སྐུ་ཚབ་མང་གི་ནེ་བུ་ གི་ལ་དག་ཉི་ ཡེག་ཁཱན་བ་ཀེ་ ན་ཤི་རྒྱུགས་ལ་ཉི་ རོག་ཏེ་བ་ཤོ་ སོ་ད་ཁོ་པ་བ་གི་ཝ་ལ་དག་ ན་ཤི་ཙ་ཆོད་པ༌ཅ། 3ན་ཤི་བཟོད་པར་སྒོམ་ཉི་ ཇ་ག་ཡོར་ཀེ་ གནམ་མེད་ས་མེད་ དཀའ་ཝ་ཅཱད་པ༌ཅ། ཉི་ན་ཧ་བ་ཀི་ ཝུ་དུག་ཉི་ ཐུབ་མ་ཐ་ཝ༌ཅ། 4དག་པ་ཀབ་ཉི་ ཨོ་ཐ་ཀོར་གེ་ ཇི་གི་ ན་ཧ་ཇུར་ཇང་ཕི༌ལེ། ན་ཤི་ ཇང་གོ་དང་པ་ ཕང་པ་པུརུས་ཀིན་ཨ་ཉི་ ཕང་པུ་མ༌ལ། 5ནཱན་ཧབ་ཏུར་ཅེན་མུ་གེ་ རོ་ཁེ་དི་ཝ་ལ་སྨོ་ མི་ཉི་གོད༌ཅོ། ན་ཧ་བ་ སྡིག་པ་གེ་ལོག་ཐཱན་ ན་ཤི་ གོ་དང་པ་ ཨ་ཝ་པུརུས་ཀིན་ཨ་ཉི་ཨའི། ནཱན་གི་ སྡིག་པ་གེ་མ་ལོག་ནེ་ལ་ ཇང་ན་ག་བཱརང་ཀ་ཨུན་ཐཱན་ ག་ཙ་ཐ་ས་བཱརང་ཀེ་ ཇི་གི་ ན་ག་ག་ཙ་དུང་ཉི་བུ༌ལེ། 6དག་པ་ཀབ་ཉི་ ནཱན་ཀབ་ཉི་ ཆཱས་ལེག་པུ་ཐུར༌ལ། ཉི་ཨུ་ཉུ་ཤོ་ ཇི་གི་མ་ལེག་པ་པུརུས་ཀིན་ཨ་ཉི་ ནཱན་གི་བུ་ ནི་ཀོ་ལེ་ཏཱན་བ་ཀི་ ཨ་ཁཱན་བ་ལེག་པུ་མ༌ལ།
7ཨི་བི་ག་ན་ཆོ་ཝ་ཐུར་ དམ་པའི་ཐུགས་ཉིད་གི་ ཆོས་ཚོགས་བ་ཀ་ཏཱན་ གསུངས་ཁཱན་ཁེ་པ་ཉཱན༌ཅོ། ཨི་བི་གི་ རྒྱལ་ཁ་ཉོང་པ་ཐུར་ ཇི་གི་ ཨོ་ཉ་སོ་ངོ་ག་ ཚེ་ག་ཤིང་གེ་ ཟ་ལེ་ག་དབང་ཚད་བི༌ལེ། ཉི་ཨོ་ཉ་ཚེ་ག་ཤིང་ཤོ་ དཀོན་མཆོག་ག་ མཐོ་རིས་ག༌ཅ༎
ཨེས་མུར་ན་ག་ ཆོས་ཚོགས།
8ཨེས་མུར་ན་ག་ ཆོས་ཚོགས་ག་ ཞིང་ཁམས་ག་འཐེན་པ་ག་ཏཱན་འབྲི་ཤོ།
ཨོ་ཐ་གསུང་ཤོ་ གོ་དང་ཇུག་གི་ཁཱན་གེ་གི༌ལ། རོག་ཤོ་ གཤགས་ཐཱན་ ལོག་ཉི་བཞེངས་པ༌ཅ། 9ན་ཧ་བ་ ནང་དོག་པ༌ཅ། ཉི་གནམ་མེད་ས་མེད་ དུག་པུ་ཅ་དག་ཉི་ ཇི་གི་སེན༌ཅ། དག་པ་ཀབ་ཉི་ ངོ་མ་ཨ་ནེ་ཤོ་ ན་ཧ་བ་ བེ་དིང༌ཅ། ན་ཧ་ཀོ་ཁ་ཨ་ཝ་ཀོར་གེ་ ཇི་གི་སེན༌ཅ། རོག་ཏེ་བ་ཀི་ རོག་ཏེ་བ་ ཡ་ཧུ་དི་པ་གི་ལ་དག་ཡེག༌ལ། དག་པ་ཀབ་ཉི་ རོག་ཏེ་བ་ ཡ་ཧུ་དི་པ་མང་གི། ཧང་ཡ་དག་ནེ་ལ་ རོག་ཏེ་བ་ཤོ་ སེ་ཏཱན་ག་ སོ་ངོ་བ་གི༌ལ། 10དཀའ་ཝ་ཅཱད་པེ་ཅམ་ཁཱན་གེ་ ན་ཧ་བ་ ཡོང་མ་ཁེ། ན་ཧ་བ་ཀེ་ རྒྱུགས་ལ་ལེ་དེན་གེ་ བདུད་ཀི་ ནའི་ཚེ་བཙོན་ག་ཙུག༌པེ། ཉི་ན་ཧ་བ་ ནོང་སེ་ག་དེན་གེ་ ཀ་ལུ་ཏཱད༌པེ། ཤི་ལེ་ཁེ་ནེ་བུ་ དམ་ཚིག་ཙུང་ཉི་ཆོའི། ཉི་ཇི་གི་ན་ཧ་ སེ་རབ་ཨ་ཉི་ ཚེ་བི༌ལེ།
11ཨི་བི་ག་ན་ཆོ་ཝ་ཐུར་ དམ་པའི་ཐུགས་ཉིད་གི་ ཆོས་ཚོགས་བ་ཀ་ཏཱན་ གསུངས་ཁཱན་ཁེ་པ་ ཉཱན༌ཅོ། ཨི་བི་གི་ རྒྱལ་ཁ་ཉོང་པ་ཐུར་ ཨོ་ཉ་སོ་ངོ་ཁེ་པ་ ཤེབ་ཉིག་ཙིང་ ཤི་ལེ་མ་ཁེ༌ལ༎
པར་ག་མམ་ག་ ཆོས་ཚོགས།
12པར་ག་མམ་ག་ ཆོས་ཚོགས་ག་ ཞིང་ཁམས་ག་འཐེན་པ་ག་ཏཱན་འབྲི་ཤོ།
ཨོ་ཐ་གསུང་ཁེ་པ་ ཉ་གེ་ཐ་གེ་རང་ ཡ་ཚེ་བུ་ཨ་ཝ་ གི་རིང་མེན་ཁཱན་གེ་གི༌ལ། 13ནཱན་ཤོ་ སེ་ཏཱན་གི་ རོ་ཀ་ཁྲི་ཅོད་ས་བཱརང་ཀ་ ཆོན་ཅ་གི་ལ་དག་ཉི་ ཇི་གི་སེན༌ཅ། ཨོ་ཉེ་རང་གི་ནེ་བུ་ ནཱན་གི་ ཇང་ཀབ་ཉི་ དེན་པ་ཨ་ཉི་ཆོ་ཝ༌ཅ། སེ་ཏཱན་ག་བཱརང་ཀ་ཆོ་ཉི་ ཇ་ག་དམ་ཚིག་ཙུང་ཉི་ འཛོམས་དཔང་ཨ་ཁཱན་ ཨེན་ཏྲི་པཱས་ཁེ་པ་ ཤེ་ལེ་གང་ཀ་བུ་ ནཱན་གི་ ཇ་ག་དད་པ་ཨ་ལེ་ཐུབ་མ་ཐཱན་ཤི།
14ཨོ་ཉེ་རང་གི་ནེ་བུ་ ཇི་གི་ ན་ཧ་ད་སུར་ ཇུར་ཇང་ཕི་ལེ་ཁེ་ཝ༌ཅ། ན་ཧ་པོང་ཀེ་ ཚེ་བང་གི་ བ་ལམ་གི་ཡེ་ཁཱན་དང་ཏུ་ཉི་ཨ་ན། ཨིས་རེལ་ག་སོ་ངོ་ག་ སྡིག་པ་ཨ་ལེ་རིག་པེ་དེན་གེ་ བ་ལམ་གི་ བ་ལག་ག་ཡེན་བི་ཝ་ཆོ༌ཝ། ཉི་རོ་ཀི་ཨ་ཉི་ ཨིས་རེལ་ག་ སོ་ངོ་བ་ཀ་ སྐུ་ག་ཕུལ་ཁཱན་ཚོགས་ ཟ་ལེ་རིག༌པ། ཉི་ལུས་འབྲེལ་མ་ཙང་མ་ ཨ་ལེ་རིག༌པ། 15ཨུ་ཉུ་པུརུས་ཀིན་ཨ་ཉི་ ན་ཧ་པོང་ཀ་བུ་ ནི་ཀོ་ལེ་ཏཱན་བ་ཀི་ ཡེ་ཝ་དང་ཏུ་ཉི་ ཨ་ཁཱན་ཚེ་བང༌ལ། 16ཨོ་ཉི་ཨ་དེན་གེ་ སྡིག་པ་གེ་ལོག༌ཅོ། ཨུ་ཉུ་མ་ནེ་ལ་ ཇང་དོ་ཟོ་རང་ ན་ཧ་བཱརང་ཀ་ཨུན་ཐཱན་ ཇ་ག་ནོ་ཝང་གེ་ཤོ་ཁཱན་ གི་རིང་ག་ཐུང་ཀེ་ཨ་ཉི་ ཇི་གི་ རོག་ཏེ་བ་ཀབ་ཉི་ ཕྱད་མདའ་ཕི༌ལེ།
17ཨི་བི་ག་ན་ཆོ་ཝ་ཐུར་ དམ་པའི་ཐུགས་ཉིད་གི་ ཆོས་ཚོགས་བ་ཀ་ཏཱན་ གསུངས་ཁཱན་ཁེ་པ་ཉཱན༌ཅོ། ཨི་བི་གི་ རྒྱལ་ཁ་ཉོང་པ་ཐུར་ ཇི་གི་ ཨོ་ཉ་སོ་ངོ་ག་ གུམ་ཉི་ཐ་ཁཱན་མ་ན་#2:17 དང་པོ་ ཨིས་རེལ་ག་སོ་ངོ་བ་ ས་ཏོང་པ་གེ་ཨ་ཉི་ དི་ལེ་གང་ཀ་ རོག་ཏེ་བ་ཟ་ལེ་དེན་གེ་ དཀོན་མཆོག་གི་ ཞིང་ཁམས་གེ་དོང་ གནང་ཁཱན་ག་ མ་ན་དག་ཉི་ ཡེག་ཅ་གི་ཝ༌ལ། མ་ན་ཤོ་ གོད་པ་ཀབ་ཉི་ བ་ལིང་ཨ་ཝ་ཆོ་ཝ༌ལ། དག་པ་ཀབ་ཉི་ ངམ་ག་དྲེ་ཁེ་ལ་ཀབ་ཉི་ ཞུན་དི་ཝ༌ལ། བི༌ལེ། ཉི་ཨོམ་ཆང་རང་ ཇི་གི་ རོ་ཀ་ལུང་བ་ལིང་མིན་ ཨ་ཝ་ག་ཐུང་ཀ་ མིང་སིང་མ་འབྲི་ཐཱན་བི༌ལེ། ཉི་ཨོ་ཉ་མིང་ཁེ་པ་ ཉོང་ཁཱན་ཐུར་གི་མ་ཏོག་པ་ བཱརའ་ཨི་བི་གི་རང་མ་སེ༌ལ༎
ཐི་ཨ་ཏྲི་ར་ག་ ཆོས་ཚོགས།
18ཐི་ཨ་ཏྲི་ར་ག་ ཆོས་ཚོགས་ག་ ཞིང་ཁམས་ག་འཐེན་པ་ག་ཏཱན་འབྲི་ཤོ།
ཨོ་ཐ་གསུང་ཁེ་པ་ སྤྱན་ཤོ་ མི་དིར་པ་ཀབ་ཉི་ ཤོ་ཁཱན་འོད་ད་བུ་དང་ ཞབས་ཤོ་ ཟངས་མི་ག་གོག་པ་ཀབ་ཉི་ འོད་ཆར་བ་ད་བུ་ཆོ་ཁཱན་ དཀོན་མཆོག་ག་ སྲས་གེ་གི༌ལ། 19ན་ཤི་ཨ་ཁཱན་བ་ ཇི་གི་སེན༌ཅ། ན་ཧ་སྙིང་རྗེ་དང་དད་པ་ ན་ཤི་ཕྱག་ཞུ་ཁཱན་དང་ བཟོད་པར་སྒོམ་ཉི་ཐེས་ཁཱན་ ཐམས་ཅན་རང་ ཇི་གི་སེན༌ཅ། ཉི་ན་ཤི་ གོ་དང་པ་ ཨ་ཝ་གེ་ལག་ཉི་ ཨོ་མ་ཨ་ན་དག་ཉི་བུ་ ཇི་གི་སེན༌ཅ།
20ཨོ་ཉེ་རང་གི་ནེ་བུ་ ཇི་གི་ ན་ཧ་ཨོ་ཐ་ཀོར་གེ་ ཇུར་ཇང་ཕི་ལེ་ཁེ་ཝ༌ཅ། ན་ཤི་ཨོ་ཉ་མེ་ཝག་ཙ་ ཨི་ཇེ་བེལ་གི་ ཡེ་ཝ་དང་ཏུ་ཉི་ཨ་ན། རོ་ཀི་ རོག་ཤོ་ དཀོན་མཆོག་ག་ འཐེན་པ་ཨ་ཉི་ཙི་ན། དག་པ་ཀབ་ཉི་ རོ་ཀི་ཡེ་ཉི་ ཇ་ག་ཕྱག་ཞུ་ཁཱན་བ་ ལུས་འབྲེལ་མ་ཙང་མ་ ཨ་ལེ་རིག༌ལ། ཉི་སྐུ་ག་ཕུལ་ཁཱན་ཚོགས་ ཟ་ལེ་རིག༌ལ། 21ཇི་གི་ རོག་སྡིག་པ་གེ་ལོག་པེ་ག་ དུས་ཙུན་བི་ཝ་ཆོ༌ཝ། དག་པ་ཀབ་ཉི་ རོ་ཀི་ རོ་ཀ་ལའི་ཙོག་པ་གེ་ ལོག་པེ་མ་ནཱན་ཤི། 22ཨོ་ཉི་ཨ་དེན་གེ་ ཇི་གི་ རོག་མར་བེ་རིག་ཉི་ མར་ཁཱན་པ་ལང་ག་ ཡི་ཕེ་བི༌ལེ། ཉི་རོག་ཏེ་བ་ཀི་ ཨ་ཁཱན་ལའི་ངན་པ་གེ་ མ་ལོག་པ་སག་པུ་ ཇི་གི་ རོག་དང་ རོག་ཀབ་ཉི་ ལུས་འབྲེལ་ཨ་ཁཱན་ ཐམས་ཅན་རང་ གནམ་མེད་ས་མེད་ དཀའ་ཝ་ཅཱད་པེ་བི༌ལེ། 23ཉི་ཇི་གི་ རོ་ཀ་ཕྱག་ཞུ་ཁཱན་བ་ ཐམས་ཅན་རང་ ཤེ་ཉི་གེ༌མེ། ཉི་ཤ་ ཆོས་ཚོགས་ཐམས་ཅན་གི་ ཇང་ཤོ་ སོ་ངོ་བ་ཀ་སེམས་དང་ མི་ཁཱན་ཐམས་ཅན་རང་ མཁྱེན་ཁཱན་གི་ཝ་ལ་དག་ཉི་ སེ་ལེ་རེ༌བེ། ནའི་ཐམས་ཅན་ག་ ན་ཤི་ཨ་ཝ་དང་ཏུ་ཉི་ ཇི་གི་ཚ་མང་སྤྲོད༌པེ། 24དག་པ་ཀབ་ཉི་ ཨོམ་ ཐི་ཨ་ཏྲི་ར་ག་ཆོ་ཁཱན་ བཱརའ་སོ་ངོ་བ་ ངན་པ་ཡེ་ཝ་དང་ཏུ་ཉི་ མ་ཨ་ཁཱན་བ་ཀ་ ཇི་གི་ཡེག་ཅ་ བཱརའ་གི་ སེ་ཏཱན་ག་གུམ་ནང་ཆཱས་ ཆི་ལུ་དག་ཉི་ ཆིན་ཁཱན་ཁེ་པ་ ན་ཤི་མ་ལམ་ཅི། ཇི་གི་ ན་ཧ་ཐུང་ཀ་ བཱརའ་རོང་ཧང་རང་མ་ཀེ༌བ། 25གི་ནེ་བུ་ མང་གི་ནེ་བུ་ ཇང་མ་ལོག་པ་སག་པུ་ ན་ཤི་ཉོང་ཁཱན་ཁེ་པ་ སྒྲིང་སྒྲིང་ཨ་ཉི་ཙུང་ཤོ།
26ཨི་བི་གི་ རྒྱལ་ཁ་ཉོང་ཉི་ ཇུ་ཀ་སག་པུ་རང་ ཇ་ག་སེམས་དང་ཏུ་ཉི་ ཨ་ཝ་ཐུར་ ཇི་གི་རོ་ཀ་ རྒྱལ་ཁབ་བ་ཀ་ཐུང་ཀ་ དབང་ཚད་བི༌ལེ། 27རོ་ཀི་རྒྱལ་ཁབ་བ་ པེར་ག་ཕྱག་འཁར་ག་ ཐུང་ཀེ་ཨ་ཉི་དབང༌པེ། ཉི་ས་གི་ཅོད་ཁཱན་ཁོ་ ཁོ་ཝ་པུརུས་ཀིན་ཨ་ཉི་ ཁོ་ལེ་རེ༌བེ།#2:27 མགུར་མ་ག་དཔེ་ཆ་ 2:9 ཡབ་གི་ ཇ་ག་དབང་ཚད་ གནང་མ་པུརུས་ཀིན་ཨ་ཉི་ རོག་ཏེ་བ་ཀི་བུ་ དབང་ཚད་ཉོང༌པེ། 28ཉི་ཇི་གི་ རོག་ཏེ་བ་ཀ་ ཝུན་བེད་པུ་ག་ བོ་ཇུ་ལུ་བུ་ བི༌ལེ། 29ཨི་བི་ག་ན་ཆོ་ཝ་ཐུར་ དམ་པའི་ཐུགས་ཉིད་གི་ ཆོས་ཚོགས་བ་ཀ་ཏཱན་ གསུངས་ཁཱན་ཁེ་པ་ ཉཱན་ཅོ༎
Currently Selected:
མཇལ་ཁ། 2: TNTB
Highlight
Copy
Compare
Share
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
