ཡ་ཧུ་ད། 1
1
1ཨོ་ཐ་ཡི་གུ་ཤོ་ ཡ་ཧུ་ད་གེ་གི༌ལ། ཉི་ཇང་ཤོ་ ཡི་ཤུ་ཁིརིས་ག་ཟ་པ་དང་ ཡ་ཀུབ་ག་ བོ་ཉིང་གི༌ལ། ཡབ་དཀོན་མཆོག་གི་ ཕང་ཉི་ར་ཁཱན་དང་ ཡི་ཤུ་ཁིརིས་གི་སྐྱབས་ཨ་ཉི་ ཐཱན་གནང་ཁཱན་བ་ཀ་ཏཱན་ ཨོ་ཐ་ཡི་གུ་ འབྲི་ཅ་གི༌ལ།
2ན་ཤི་ དཀོན་མཆོག་ག་ བྱམས་པར་དང་ སྐྱིད་པུ་ ཉི་སྙིང་རྗེ་ ལག་ཏང་མང་པུ་ཨ་ཉི་ ཉོང་ཅེན༎
སློབ་དཔོན་རྫུས་མ༌བ།
3ཇི་གི་ཕང་ཁཱན་ ཇ་རོ་བ་ ཨའི་ཐམས་ཅན་གི་ཉོང་ཁཱན་ ཐར་པ་ག་ཀོར་གེ་ ཇི་གི་ ན་ཧ་འབྲི་བེ་ ཁེ་ལེ་ལ་དག་ཉི་ མི་ཝ་ཆོ༌ཝ། དག་པ་ཀབ་ཉི་ ཨོམ་ཤོ་ ཇི་གི་ ན་ཧ་དད་པ་ག་ཀོར་གེ་ འབྲི་བེ་ཁེ་ལེ་ལ་དག་ཉི་མི་ཉི་ དད་པ་ག་ཀོར་གེ་འབྲི༌ཅ། ཤེབ་ཐུར་ག་རང་ ཏ་བུ་ག་དེན་གེ་ དཀོན་མཆོག་གི་ རོ་ཀ་སོ་ངོ་བ་ཀ་ཏཱན་གནང་ཁཱན་ དད་པ་ག་དེན་གེ་ ཙ་དྲེག་ཅོ་དག་ཉི་ ཇི་གི་ ན་ཧ་ཡེག༌ཅ། 4ཧང་ཡ་དག་ནེ་ལ་ སོ་ངོ་ཚེ་བང་ ཙང་ཀེན་ཨ་ཉི་ ན་ཧ་པོང་ཀ་ནུ་ཕ༌ཅ། ཉི་རོག་ཏེ་བ་ཤོ་ དང་པོ་གེ་རང་ རོག་ཏེ་བ་ཀི་ ཁྲིམས་ཉོང་པེ་དག་ཉི་ འབྲིན་ཐ་ཁཱན་བ་གི༌ལ། རོག་ཏེ་བ་ཤོ་ དཀོན་མཆོག་ག་ ཆ་གནས་མ་ཐ་ཁཱན་ སོ་ངོ་བ་གི༌ལ། ཉི་རོག་ཏེ་བ་ཀི་ དཀོན་མཆོག་ག་ཐུགས་རྗེ་ཁེ་པ་ འགྱུར་གེམ་ཉི་ ལའི་ངན་པ་ཨ་ལེ་ག་ ཆོག་པེ་དག་ཉི་ཡེ་ན། ཉི་རོག་ཏེ་བ་ཀི་ ཨ་ཧ་སྦྱིན་བདག་དང་ གཙོ་བོ་ཡི་ཤུ་ཁིརིས་བུ་ ཞུ་ལུ་མ༌ལ།
5ན་ཤི་སེན་ཐཱན་རང་གི་ནེ་བུ་ ཇི་གི་ ན་ཧ་ལོག་ཉི་རང་ཡེག༌པེ། གཙོ་བོ་གི་ རོ་ཀ་སོ་ངོ་བ་ ཨི་ཇིབ་གེ་ ཐར་ཉི་གནང༌མ། ཨོ་ཉེ་རང་གི་ནེ་བུ་ ཚི་ངེ་དག་པ་ཀབ་ཉི་ དད་པ་མ་ཨ་ཁཱན་བ་ མེ་པ་ཕིན་གེ༌མེ། 6ཉི་ཞིང་ཁམས་ག་འཐེན་པ་བ་བུ་ རང་རང་ས་ དབང་ཚད་དང་ཏུ་ཉི་ མ་ཆོ་ལཱན་ རོག་ཏེ་བ་ཆོ་ས་གེ་ ཇོང་ཁཱན་བ་ དཀོན་མཆོག་གི་ རོག་ཏེ་བ་ མ་འགྱུར་བརྟན་པ་ག་དེན་གེ་ ཐིག་ཐཱན་ ཨོ་ཉ་ནོང་ཆི་ལུ་ག་ནོང་ཀ་ ཁྲིམས་ཀེ་བེ་དེན་གེ་ མེར་བུ་ནང་ཀ་ཐ་ཝ༌ཅ། 7ཨུ་ཉུ་པུརུས་ཀིན་ཨ་ཉི་ ཁྲོམ་ས་དོམ་དང་ ག་མོ་ར་ ཉི་ཨོ་ཉ་ཁོར་ཀ་ཆོ་ཁཱན་ ཁྲོམ་བ་བུ་ དམ་པ་མ་ཁཱན་དང་ མ་ཙང་མ་ཨ་ཉི་ ལུས་འབྲེལ་ཨ་ཁཱན་བ་ཀི་ ཕུང་མ་ཆོ༌ཝ། རོག་ཏེ་བ་ཀི་ མ་འགྱུར་བརྟན་པ་ག་ མི་ནང་ཀ་ཁྲིམས་ཉོང་ཉི་ བཱརའ་ངན་པ་ཨ་ཁཱན་བ་ཀ་དེན་གེ་ དཔེ་རི་ཝ༌ཅ།
8ཨུ་ཉུ་པུརུས་ཀིན་ཨ་ཉི་ ཨོ་ཐ་སློབ་དཔོན་རྫུས་མ་བ་ཀི་བུ་ མོང་ཤི་ཐོང་མ་དག་ཉི་ཏ་ཡེག༌ལ། དག་པ་ཀབ་ཉི་ ལུས་འབྲེལ་མ་ཙང་མ་གི་ རོག་ཏེ་བ་ཀི་ རོག་ཏེ་བ་ཀ་ལུས་པུ་ ཙོག་པ་ཅོད༌ལ། ཉི་དཀོན་མཆོག་ག་ དབང་ཚད་མ་ཞུ་ལཱན་ ཐུང་ཀ་ཆོ་ཁཱན་ གཟི་བརྗིད་ཅན་བ་ཀ་ ཁ་ཏང༌ལ། 9མོ་ས་ག་ སྐུ་ཕུང་ཀོར་གེ་ སེ་ཏཱན་ཀབ་ཉི་ ཤག་རུམ་ཅ་ཨ་ཉི་ ཞིང་ཁམས་ག་འཐེན་པ་ག་ གཙོ་འཛིན་ མི་ཁ་ཨེལ་གི་ཆང་ སེ་ཏཱན་ག་ ཁ་ཏང་མེ་མར་བཱན་ གསུངས་མ་ལ་ གཙོ་བོ་གི་ ན་ག་ཁྲིམས་གནང་ཆེན་དག༌ཉི། 10དག་པ་ཀབ་ཉི་ ཨོ་ཐ་སོ་ངོ་བ་ཀི་ ཧ་མ་གོ་ཁཱན་ ཐམས་ཅན་ག་ ཁ་ཏང་ཉི་ མ་ལེག་པ་ཡེག༌ལ། རོག་ཏེ་བ་ཀི་ ཨ་ལེ་ལ་མ་དང་ཏུ་ཉི་ཤ་ ཨ་ཝ་ཨ་དེན་གེ་ མི་ལེ་མ་སེ་ཁཱན་ སེམས་ཅན་བ་ ཇཝ་ཆུ་མ་པུརུས་ཀིན་ཨ་ཉི་ རོག་ཏེ་བ་བུ་ ཇཝ་ཆུམ༌ཅ།
11རོག་ཏེ་བ་ ཧབ་ཏུར་ ནང་དོག་པེ་ཁེ་ལེ་ཡ། ཧང་ཡ་དག་ནེ་ལ་ རོག་ཏེ་བ་ཀི་ ཀ་ཡིན་གེ་ དཔེ་ངན་པ་གོད༌ལ། ཀ་ཡིན་གི་ རོ་ཀ་བོ་ཉིང་ ཤེ་ཝ་ཆོ༌ཝ།#1:11 ཇུན་པ་ག་དཔེ་ཆ་ 1:1–16 བ་ལམ་པུརུས་ཀིན་ཨ་ཉི་ རོག་ཏེ་བ་ཀི་ ཏི་རུ་ག་དེན་གེ་ ཧང་རང་ཨ་ལེ་རེ༌བེ།#1:11 ཁ་ཇང་ག་དཔེ་ཆ་ 23–24 ཉི་རོག་ཏེ་བ་ཀི་ ངོ་ལོག་པ་ཨ་དེན་གེ་ ཀོ་ར་པུརུས་ཀིན་ཨ་ཉི་ ཇཝ་ཆུ༌མེ།#1:11 ཁ་ཇང་ག་དཔེ་ཆ་ 16
12ཨོ་ཐ་སོ་ངོ་བ་ཀབ་ཉི་ ན་ཧ་བ་ ཏབ་ཐུར་ཛོམ་ཉི་ཟ་ནེ་ལ་ རོག་ཏེ་བ་ཀི་ ངི་ནང་ཁུ་ལེ་མ་ཝ་ ཟཱན་ཇམ་ཉི་ རང་ཏེན་ག་དེན་གེ་ཤ་མི་ཉི་ ཨ་ལ་ཀབ་ཉི་ ན་ཧ་ལྟོ་ག་དུས་ཙུན་ ཙོག་པ་ཅོད༌པེ། རོག་ཏེ་བ་ཤོ་ ངམ་སུ་ཕ་ལེ་མང་གི་ཝ་ རི་དི་གི་ཕག་ཉི་བུ་ཁཱན་ མུག་པ་ད་བུ་གི༌ལ། རོག་ཏེ་བ་ཤོ་ དུས་ཙུན་ག་བུ་ སེ་མ་སེ་ཁཱན་ ཤིང་ད་བུ་ཐུར་གི༌ལ། ཉི་ཤིང་ག་བ་ ར་ཅི་གེ་རང་ ཝུས་ཉི་གེ་མ་ཨ་དེན་གེ་ ཤེབ་ཉིག་ཙིང་ཤི་ཝ༌ཅ། 13རོག་ཏེ་བ་ཤོ་ རྒྱམ་མཚོ་ག་མཚོ་རི་ མ་ལེག་པ་ཨ་ཉི་ ལག་ཁཱན་ད་བུ་གི༌ལ། རོག་ཏེ་བ་ཀི་ ངི་ནང་ཁུ་སི་སི་ཨ་ཝ་ ལའི་ག་བ་ཨ་ཁཱན་ཤོ་ མཚོ་རི་ལག་པ་ཀབ་ཉི་ བོམ་ནང་ཤོ་ཝ་ད་བུ་གི༌ལ། རོག་ཏེ་བ་ཤོ་ ཀོར་ཉི་རང་ཆོ་ཁཱན་ སྐར་མ་སྨིན་དྲུག་གི༌ལ། ཉི་མ་འགྱུར་བརྟན་པ་ག་ ནག་དུང་དུང་ མེར་བུ་ཁེ་པ་ རོག་ཏེ་བ་ཀ་དེན་གེ་ ཅམ་པ༌ཅ།
14ཨ་དམ་གེ་ མི་རབས་ཟུམ་ག་ཚི་ངེ་བཞུགས་ཁཱན་ ཧ་ནོག་གི་ ཨོ་ཐ་སོ་ངོ་བ་ཀ་ཀོར་གེ་ ལུང་བསྟན་ཉི་གསུངས་མ་ཅ་ གོད་ཅོ་ རོ་ཀ་དམ་པའི་ཞིང་ཁམས་ག་འཐེན་པ་ སྟོང་ཕྲག་སྟོང་ཕྲག་བ་ཀབ་ཉི་ གཙོ་བོ་བྱོན༌ལ། 15རོ་ཀི་འཛམ་གླིང་ག་ སོ་ངོ་བ་ཀ་ ཁྲིམས་ཅཱད་ཉི་གནང༌མེ། ཉི་རོ་ཀི་ དཀོན་མཆོག་ག་ ཆ་གནས་མ་ཐ་ལཱན་ ངན་པ་ཨ་ཁཱན་ ཐམས་ཅན་ག་ ཁྲིམས་ཀེ༌བེ། ཉི་དཀོན་མཆོག་ག་ ཆ་གནས་མ་ཐ་ཁཱན་ སྡིག་ཅན་ཐམས་ཅན་གི་ རོ་ཀ་ཀོར་གེ་ ཆཱས་ངན་པ་ ཨ་ཝ་ཨ་དེན་གེ་ ཁྲིམས་ཀེ་ཉི་གནང་མེ་དག༌ཉི། 16ཨོ་ཐ་སོ་ངོ་བ་ཤོ་ ཁ་ཏང་ཁཱན་དང་ བེརེག་ཏོང་ཇིག་ཁཱན་ སོ་ངོ་བ་གི༌ལ། ཉི་རོག་ཏེ་བ་ཀི་ ངན་པ་ ཧང་ཨ་ལེ་ལ་མ་ཐུར་ཨ༌ཝ། རོག་ཏེ་བ་ཀི་ རང་ཏེན་ག་ བསྟོད་པ་ཕིན༌ཅ། ཉི་རོག་ཏེ་བ་ཀ་ ཕཱན་མེ་ཆོ་ནེ་ལ་ བཱརའ་ག་བུ་ བསྟོད་པ་ཕིན༌ཅ༎
རིག་པ་སྒྲིམ༌ཅོ།
17དག་པ་ཀབ་ཉི་ ཇི་གི་ཕང་ཁཱན་ ཇ་རོ་བ་ ན་ཤི་ཤོ་ གཙོ་བོ་ཡི་ཤུ་ཁིརིས་ག་ སྐུ་ཚབ་བ་ཀི་ གསུངས་ཁཱན་བ་ ཡིད་ཀ་ཨ་ལེ་ཁེ༌ལེ། 18དུས་ཇུ་ཀ་དག་པ་ཀབ་ཉི་ ཨུ་ཉུ་ད་བུ་ མེམ་ཅོར་ཁཱན་བ་ཤོ་ཉི་ རོག་ཏེ་བ་ཀི་ ངན་པ་ཧང་ཨ་ལེ་ ལ་མ་ཐུར་ཨ་ལེ་དག་ཉི་ སྐུ་ཚབ་བ་ཀི་ ན་ཧ་གསུངས་མ་ཆོ༌ཝ། 19ཉི་ཨོམ་ ཨོ་ཐ་སོ་ངོ་བ་ཀི་ ན་ཧ་བ་ནང་དོ་ ཐུར་གི་ཐུར་ག་ དགྲ་ཨ་ཝ་ཅོད༌ལ། རོག་ཏེ་བ་ཀི་ རང་བཞིན་ག་སེམས་ཀི་ ཧང་མི་ཝ་ཐུར་ཨ་ན། དག་པ་ཀབ་ཉི་ རོག་ཏེ་བ་ཀབ་ཉི་ ཐུགས་ཉིད་མ་བཞུགས་པ༌ལ།
20དག་པ་ཀབ་ཉི་ ཇི་གི་ཕང་ཁཱན་ ཇ་རོ་བ་ ན་ཤི་ ན་ཧ་ཚེ་ཁེ་པ་ ན་ཧ་དམ་པའི་ དད་པ་ག་རྨང་ཐུང་ཀ་ ཅོད་པེ་གོད༌ཅོ། ཉི་དམ་པའི་ཐུགས་ཉིད་གི་ རིག་པ་དང་ཏུ་ཉི་ སྨོན་ལམ་ཏབ༌ཅོ། 21ཨ་ཧ་གཙོ་བོ་ཡི་ཤུ་ཁིརིས་གི་ རོ་ཀ་བྱམས་པར་ག་ཐུང་ཀེ་ཨ་ཉི་ ན་ཧ་བ་ ཚེ་མ་འགྱུར་བརྟན་པ་ནང་ཀ་ ཕ་ཉི་གནང་མེ་དེན་གེ་ ནོང་ཅ་ཨ་ཉི་ ན་ཤི་ དཀོན་མཆོག་ག་སྙིང་རྗེ་ནང་ཀ་ ཆོ་ལེ་གོད༌ཅོ།
22དོགས་པ་སག་ཁཱན་བ་ཀ་ བྱམས་པར་ཀེ་ཤོ། 23ཉི་བཱརའ་སོ་ངོ་བ་ མི་ག་ ག་དང་གེ་རུན་ཐཱན་ སྐྱབས་ཨའི། དག་པ་ཀབ་ཉི་ རོག་ཏེ་བ་ཀ་ སྡིག་པ་གི་ཙོག་པ་ཅོད་ཁཱན་ ཁ་མུང་ཆང་ ན་ཤི་ལེག་པེ་མང་ཕ༎
བསྟོད་པ་ག་སྨོན་ལམ།
24ཉི་ཨོམ་ ན་ཧ་བ་ རོ་ཁེ་མ་དི་ཝ་ཨ་ཉི་ ཐ་ལེ་རེ་ཁཱན་དང་ ཅོན་ད་སུ་རང་མ་ཝ་ཨ་ཉི་ ཤོ་ནང་ཕེ་ཏོག་ཏོ་ཨ་ཉི་ རོ་ཀ་གཟི་བརྗིད་ཅན་ག་ སྐུན་མདུན་ག་ ཕ་ལེ་རེ་ཁཱན་ དཀོན་མཆོག་ག་ གཟི་བརྗིད་ཕུལ་ཁེ། 25ཉི་རོག་ཐུར་ཤ་ ཨ་ཧ་དཀོན་མཆོག་དང་ སྐྱབས་མགོན་གི་ཝ་ཨ་དེན་གེ་ ཨ་ཧ་གཙོ་བོ་ ཡི་ཤུ་ཁིརིས་ག་ཐུང་ཀེ་ཨ་ཉི་ རོ་ཀ་ཏཱན་ གཟི་བརྗིད་ཕུལ་ཁེ། ཧང་ཡ་དག་ནེ་ལ་ གཟི་བརྗིད་དང་གུས་ཞབས་ སྟོབས་དབང་དང་དབང་ཚད་ ཐམས་ཅན་རང་ གོ་ཙུག་ཏེན་གེ་ག་ཏཱན་ ཨོ་མ་སག་པུ་དང་ ཚི་ངེ་ཨ་ནེ་བུ་ དུས་ཏ་བུ་རང་ དཀོན་མཆོག་ག་གི༌ལ། ཨ་མེན༎
Currently Selected:
ཡ་ཧུ་ད། 1: TNTB
Highlight
Copy
Compare
Share
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
