གཉིད་པ་ཀོ་རིན་ཐི། 7
7
1ཇ་ག་ཇ་རོ་བ་ ཨ་ཧ་དེན་གེ་ ཨོ་ཐ་བ་ ཐམས་ཅན་རང་ དབུ་མནའ་བཞེས་ཝ་ཨ་དེན་གེ་ ན་ཧ་ལུས་པུ་དང་ རྣམ་ཤེས་མ་ཙང་མ་ཅོད་ཁཱན་ ཐམས་ཅན་གེ་ ཨ་ཧ་བ་ཙང་མ་ཅོད་ཀེ། ཉི་ཨ་ཤི་ དཀོན་མཆོག་གེ་ཡོང་ཁེ་ཉི་ གནམ་མེད་ས་མེད་ དམ་པ་ཨ་ཉི་ཆོ་ཁེ༎
པ་ཝལ་ ཤོ་ནང་ཕེ་ཝ༌ལ།
2ཨ་ཧ་དེན་གེ་ ན་ཤི་ན་ཧ་སེམས་ཕེག༌ཅོ། ཨ་ཤི་ཐུར་ག་བུ་ ཧང་རང་མ་ལེག་པ་ ཨ་ཝ་མཱན༌ཅ། ཨ་ཤི་ཐུར་བུ་ ལམ་མང་གི་ཝ་གེ་ རིག་པ་མཱན༌ཅ། ཉི་ཨ་ཤི་ ཨི་བི་གེ་རང་ འབབ་ཁུངས་ཤོ་ལེ་ གོད་པ་མཱན༌ཅ། 3ཇི་གི་ན་ཧ་ཁ་ཏང་མེ་དེན་གེ་ ཨོ་ཐ་ཆཱས་ཡེག་ཅ་མང་གི། ཧང་ཡ་དག་ནེ་ལ་ ཇི་གི་ན་ཧ་ གོ་མ་གེ་རང་ཡེག་པ་ཅ་ ན་ཧ་བ་ཤོ་ དུས་ཏ་བུ་ག་དེན་གེ་ ཨ་ཧ་སེམས་ནང་ཀ་ཅ་དག༌ཉི། ཨའི་ཆོ་ནེ་བུ་ ཤི་ནེ་བུ་ ནའི་ཀབ་ཉི་རང་གི༌ལ། 4ཇི་གི་ན་ཧ་དེན་གེ་ གནམ་མེད་ས་མེད་ ལོ་དེ་ཏོག་ཏོ་ཨ་ཉི་ཆོ་ཝ༌ཅ། ཉི་ཇང་ ན་ཧ་ཡོར་ཀེ་ གནམ་མེད་ས་མེད་ ངལ་རངས་པ༌ཅ། ཇང་གནམ་མེད་ས་མེད་ སེམས་གསོ་ཉོང་པ༌ཅ། ཉི་ཨ་ཧ་བ་ གནམ་མེད་ས་མེད་ དཀའ་ཝ་ཅཱད་ནེ་བུ་ ཇང་གནམ་མེད་ས་མེད་ ཤོ་ནང་ཕེ་ཉི་ཆོན༌ཅ།
5ཨ་ཧ་བ་ མ་ཀེ་དོ་ནི་ཡ་ག་ ཤེག་ཏེན་གེ་བུ་ ཨའི་ད་སུར་རང་ ཤོང་ལ་ལེ་མ་ཉོང་ཅི། ཕིས་ཀ་ཨ་ནེ་བུ་ ཨོ་ག་ཨ་ནེ་བུ་ ཁོ་ལོང་ཕིན་ཆོ༌ཝ། ཉི་ནང་ཀ་ཨ་ནེ་ལ་ ཡོང་ཁེན་ཆོ༌ཝ། 6ཏི་ཏཱས་ ཨ་ཧ་བཱརང་ཀ་ཨུ་ཉི་ སེམས་ཤི་ཁཱན་བ་ཀ་ སེམས་གསོ་ཨ་ཉི་གནང་ཁཱན་ དཀོན་མཆོག་གི་ ཨ་ཧ་བུ་ སེམས་གསོ་ཨ་ཉི་གནང༌མ། 7རོག་ཤེག་པ་ཐུར་གི་ ཨའི་ཤོ་ནང་ཕེ༌ཝ། ཉི་ཨོམ་ཆང་རང་ ན་ཤི་རོ་ཀ་སེམས་གསོ་ ཨ་ཝ་ཀོར་གེ་ ན་ཐ་ཉི་ ཨའི་ཤོ་ནང་ཕེ༌ཝ། རོ་ཀི་ཇ་ག་ཏཱན་ ན་ཧ་བ་ ཇང་ན་ཧ་བཱརང་ཀ་ ཨོ་ཕེ་དེན་གེ་ནོང་མ༌ཅ། ཉི་ན་ཧ་བ་ གནམ་མེད་ས་མེད་ དྲཱན་མ༌ལ། ཉི་ན་ཤི་ ཇང་གནམ་མེད་ས་མེད་ ཕང་ལ་དག་ཉི་ ཡེག་པ་ཀབ་ཉི་ ཇང་གནམ་མེད་ས་མེད་ ཤོ་ནང་ཕེ༌ཝ།
8ཇི་གི་འབྲི་ཁཱན་ཡི་གུ་གི་ ན་ཧ་བ་ རེབ་ཀིན་ཐུར་ག་དེན་གེ་ ཁོ་དང་ཆཱད་པེ་ རིག་པ་ཨ་དེན་གེ་ ཇང་གོ་མ་ཤེབ་ཐུར་ཏ་ སེམས་ཕམ་ཐཱན་རང་གི་ནེ་བུ་ ཨོ་མ་ ཇང་སེམས་ཕ་མུ་མཱན༌ཅ། 9དག་པ་ཀབ་ཉི་ ཨོམ་ཤོ་ ཇང་ཤོ་ནང་ཕེ་ཝ༌ཅ། ཧང་ཡ་དག་ནེ་ལ་ ཇི་གི་ན་ཧ་བ་ ཁོ་དང་ཆཱད་པེ་ བི་ཝ་ཨ་དེན་གེ་མང་གི་ཝ་ ན་ཧ་བ་ ཁོ་དང་ཆཱད་ཅ་ཨ་ཉི་ ཨོ་ཉེ་གི་ ན་ཧ་བ་ སྡིག་པ་གེ་ལོག་པེ་རིག༌པ། ཨོ་ཉ་ཁོ་དང་ཆཱད་ཁཱན་ཁེ་པ་ དཀོན་མཆོག་གི་ ཐུགས་བསམ་ བཞེས་ཝ་དང་ཏུ་ཉི་ ཇུང་མ་ཨ་དེན་གེ་ ཨ་ཤི་ན་ཧ་ ཧང་རང་ནོད་པ་མ་ཀེ་ཤི། 10ཧང་ཡ་དག་ནེ་ལ་ དཀོན་མཆོག་གི་ ཐུགས་བསམ་ གནང་མ་དང་ཏུ་ཉི་ ཁོ་དང་ཆཱད་ནེ་ལ་ ཨོ་ཉེ་གི་ སྡིག་པ་གེ་ལོག་ཐཱན་ ཐར་པ་ཉོང་པེ་རིག༌ཅ། ཉི་ཨུ་ཉུ་ད་བུ་ ཁོ་དང་ཆཱད་པ་ཀབ་ཉི་ ཧ་ལ་རང་ དྲཱན་མེ་ཁེ་ལུ་མཱན༌ཅ། དག་པ་ཀབ་ཉི་ འཛམ་གླིང་ག་ ཁོ་དང་ཆཱད་པ་ཀབ་ཉི་ སྡིག་པ་གེ་ ལོག་པེ་མ་རིག་ནེ་ལ་ ཨུ་ཉུ་གི་ ཤི་ལེ་རིག༌ཅ།
11གོད་ཅོ་ལེ་ དཀོན་མཆོག་གི་ ཐུགས་བསམ་གནང་མ་དང་ཏུ་ཉི་ ན་ཧ་བ་ ཁོ་དང་ཆཱད་ཅ་ཨ་ཉི་ ན་ཧ་ཐུང་ཀ་ ཧང་ཇུང་མ་ཡ། ན་ཧ་བ་ བརྩོན་འགྲུས་ཀེ་བ་རི་ཝ༌ཅ། ན་ཤི་ནའི་ཏེན་ག་ རྒྱབ་ཨ་ལེ་ག་སེམས་ཨ་ཉི་ སྡིག་པ་ཨ་ཁཱན་ཀབ་ཉི་ གནམ་མེད་ས་མེད་ རོ་ཙིག་པ༌ཅ། ན་ཧ་བ་ རིག་པ་སྒྲིམ་པ་རི་ཝ༌ཅ། ཇང་རུ་མེ་ག་ སེམས་ཨ་ཝ་རི་ཝ༌ཅ། ན་ཧ་བ་ གནམ་མེད་ས་མེད་ བདག་འཛིན་ཨ་ཁཱན་རི་ཝ༌ཅ། ཉི་ལའི་ངཱད་ཁཱན་ག་ ཁྲིམས་ཀེ་བེ་ག་ གྲ་སྒྲིག་རི་ཝ༌ཅ། ཉི་ལེག་པུ་ཅོད་པེ་དེན་གེ་ ན་ཤི་ཧབ་ཏུར་རེ་བ་ཐུར་ ཙ་དྲེག་པ་དག་ཉི་ ན་ཤི་ཁུངས་ཀེ༌བ། 12ཇི་གི་ཡི་གུ་འབྲི་བེ་དེན་ཐ་ཤོ་ ཨི་བི་གི་ ལའི་ངཱད་པ་གི་ལ་སྨོ་ ཨུ་ཉུ་མ་ནེ་ལ་ ཨི་བི་ག་ཏཱན་ ལའི་ངཱད་པ་གི་ལ་སྨོ་ ཨོ་ཉ་ཀོར་གེ་ འབྲི་བ་མང་གི་ཝ་ཆོ༌ཝ། དག་པ་ཀབ་ཉི་ ན་ཤི་ཨ་ཧ་དེན་གེ་ ཧབ་ཏུར་ཚ་གྱང་བང་ཅ་གི་ལ་སྨོ་ དཀོན་མཆོག་ག་སྤྱན་ག་ ན་ཤི་གེན་མེ་རེ་ཆེན་དག་པ་གི་ ཇི་གི་འབྲི་བ་གི༌ལ། 13ཨོ་ཉི་ཨ་དེན་གེ་ ཨ་ཤི་སེམས་གསོ་ཉོང༌པ།
ཉི་ཨུ་ཉུ་མ་ཚཱད་པ་ ན་ཤི་ཏི་ཏཱས་ ཤོ་ནང་ཕེ་ལེ་རིག་ཉི་ རོ་ཀ་སེམས་ སྐྱིད་པེ་རིག་པ་ཨ་དེན་གེ་ ཨའི་ལག་ཏང་ ཤོ་ནང་ཕེ་ཝ༌ཅ། 14ཇི་གི་རོ་ཀ་ ཇང་ན་ཧ་བ་ཀབ་ཉི་ གནམ་མེད་ས་མེད་ ངལ་རངས་པ༌ཅ། ཉི་ན་ཤི་ ཇང་སེམས་ཤི་ལེ་ མ་ག་ཝ་ཅ་དག་ཉི་ཡེག༌པ། ཇི་གི་ན་ཧ་ ཧ་ལ་ཨ་ནེ་བུ་ དེན་པ་ཡེག་པ༌ཅ། ཉི་ཨོམ་ ཇི་གི་ཏི་ཏཱས་ག་ཏཱན་ ཇང་ན་ཧ་བ་ཀབ་ཉི་ ངལ་རངས་པ་ཅ་དག་ ཡེག་ཁཱན་བུ་ དེན་པ་གི་ལ་དག་ཉི་ ཁུངས་ཀེ༌ཅ། 15རོག་ན་ཧ་བཱརང་ཀ་ ཨོ་ཕེ་གང་ཀ་ ན་ཤི་ རོ་ཀ་གུས་ཞབས་ཨ་ཉི་ ཉི་གནམ་མེད་ས་མེད་ ཙི་ཉི་ཞུ་ཁཱན་དང་ ནའི་ཐམས་ཅན་གི་ རོ་ཀ་ཆ་གནས་ཐ་ཝ་ཀོར་གེ་ ཡིད་ཀ་ཨ་ཉི་ རོ་ཀི་ན་ཧ་བ་ ལག་ཏང་ མང་པུ་ཕང༌ལ། 16ཇི་གི་ན་ཧ་ཐུང་ཀ་ གནམ་མེད་ས་མེད་ ལོ་དེ་ཏོག་ཏོ་ཨ་ཉི་ ཆོ་ལེ་རེ་བ་ཨ་དེན་གེ་ ཇང་ཨོམ་ གནམ་མེད་ས་མེད་ ཤོ་ནང་ཕེ་ཝ༌ཅ༎
Currently Selected:
གཉིད་པ་ཀོ་རིན་ཐི། 7: TNTB
Highlight
Share
Copy
Want to have your highlights saved across all your devices? Sign up or sign in
Tshangla New Testament
© 2023, The Bible Society of India
all rights reserved
