གཉིད་པ་ཀོ་རིན་ཐི། 6

1ཨའི་ཤོ་ དཀོན་མཆོག་ཀབ་ཉི་ཏབ་ཐུར་ ལའི་ཨ་ཁཱན་གི་ཝ་ཨ་དེན་གེ་ ཨ་ཤི་ན་ཧ་ཞུན་ཅ་ དཀོན་མཆོག་ག་ ཐུགས་རྗེ་ཁེ་པ་ དེ་ཝ་ཏོང་པ་མ་ཞུའི། 2ཧང་ཡ་དག་ནེ་ལ་ དཀོན་མཆོག་གི་ གསུངས་མ་ཅ་

ན་ཤི་ཞུ་ཁཱན་ཁེ་པ་ དུས་ཙུན་ཕྲིག་ཀིན་ རེན་པ་ཀབ་ཉི་ ཇི་གི་སྙན་གསེང་པ༌ཅ། ཉི་ཐར་པ་ག་ནོང་ཀ་ ཇི་གི་ན་ཧ་རུམ་པ་ཅ་#6:2 ཡ་ཤའི་ཡ་ག་དཔེ་ཆ་ 49:8 དག༌ཉི།

ཇི་གི་ན་ཧ་ཡེག་པེ་ ཨོ་མ་ཤོ་ དཀོན་མཆོག་ག་ ཐུགས་ཀ་ཚུད་པ་ག་ དུས་ཙུན་གི༌ལ། ཉི་ཐི་ནོང་ཤོ་ ཐར་པ་ག་ནོང་གི༌ལ༎

པ་ཝལ་ནང་དོག་པ༌ལ།

3ཨ་ཧ་ལའི་ཁ་ག་ ཨི་བི་གི་རང་ ཅོན་ཏག་པེ་མར་ཆེན་དག་པ་གི་ ཨ་ཤི་ཨི་བི་ག་ ལམ་རང་ཀག་པུ་མཱན༌ཅ། 4དག་པ་ཀབ་ཉི་ ཨ་ཤི་ ཧང་ཨན་ཐཱན་རང་གི་ནེ་བུ་ ཨའི་ཤོ་ དཀོན་མཆོག་ག་ གཡོག་པ་གི་ལ་དག་ཉི་ ཁུངས་ཀེ་བེ་མིག་པ་ཕིན༌ཅ། དཀའ་ཝ་ཅཱད་ཉི་ ནང་དོག་ཉི་ ཉི་ཀ་ལུ་ཏཱད་ནེ་བུ་ ཨ་ཤི་བཟོད་པར་སྒོམ་ཉི་ཆོན༌ཅ། 5ཨ་ཧ་བ་ཏེ་ཐ་ཉོང༌པ། བཙོན་ག་ཙུག༌པ། རོ་ཙིག་ཁཱན་སོ་ངོ་བ་ཀི་ ཀ་ལུ་ཅོད༌པ། ལའི་ཤུག་ཨ༌ཝ། བི་ནང་ག་ཡི་ཕེ་མ་ཉོང་ཅི། ཉི་བི་ནང་ཁུ་ཉི་ཏུག༌པ། 6དག་པ་ཀབ་ཉི་ ཨ་ཤི་ཙང་མ་ཨན་ཆོ་ཉི་ ཧ་གོ་ཉི་ བཟོད་པར་སྒོམ་ཉི་ བྱམས་པར་ཀེ་ཉི་ སེམས་ནང་ཀེ་ཨ་ཉི་རང་ སྙིང་རྗེ་ཨ་ཉི་ དམ་པའི་ཐུགས་ཉིད་ག་ཐུང་ཀེ་ཨ་ཉི་ 7ཨ་ཤི་དེན་པ་ཡེག་ཉི་ དཀོན་མཆོག་ག་ སྟོབས་དབང་གི་ ཨ་ཧ་པོང་ཀ་ ཕྱག་ལཱ་མཛད་ཉི་གནང༌མ། ཉི་དཀོན་མཆོག་གི་ ཨའི་དྲང་པུ་ཅོད་ཉི་ གནང་ཁཱན་ཁེ་པ་ ཨ་ཧ་མཚོན་ཆ་གི༌ལ། ཉི་ཨོ་ཉ་མཚོན་ཆ་གི་ བཱརའ་ག་ནོད་པ་ཀེ་བེ་རེ་བེ་ ཉི་ཨའི་ཏེན་ག་ སྐྱབས་བུ་ཨ་ལེ་རེ༌བེ། 8ཨ་ཤི་གུས་ཞབས་ཉོང་པ་ ཉི་ངི་ནང་བུ་ཁུ་ལེ་ཁེ༌ཝ། ཨ་ཧ་མེམ་ཅོར་ཆོ་ཝ་ ཉི་ཨ་ཤི་བསྟོད་པ་བུ་ཉོང༌པ། ཨའི་ཤོ་ སོ་ད་ཁོ་པ་ཨ་ཉི་ཙིན༌ཅ། ཨོ་ཉེ་རང་གི་ནེ་བུ་ ཨ་ཤི་དེན་པ་ཡེག༌ཅ། 9ཨའི་གུམ་ཡེན་ཐཱན་རང་གི་ནེ་བུ་ གུམ་མ་ཡེ་ཝ་ད་བུ་ཙིན༌ཅ། ཨའི་ཤི་ལེ་ཅམ་ཉི་རང་ཆོན༌ཅ། དག་པ་ཀབ་ཉི་ གསོན་པོ་ཨ་ཉི་རང་ ཆོ་ཝ༌ཅ། ཨ་ཤི་ཏེ་ཐ་ཉོང་ཐཱན་རང་གི་ནེ་བུ་ ཨའི་མ་ཤི་ཝ༌ཅ། 10ཨའི་གནམ་མེད་ས་མེད་ ཁོ་དང་ཆཱད་པ༌ཅ། ཨོ་ཉེ་རང་གི་ནེ་བུ་ ཤོ་ནང་ཕེ་ཉི་ཆོན༌ཅ། ཨའི་དུག་པུ༌ཅ། ཨོ་ཉེ་རང་གི་ནེ་བུ་ སོ་ངོ་མང་པུ་ཐུར་ བེ་དིང་ཅོད༌ཅ། ཉི་ཨ་ཧ་ ཧང་རང་མཱན༌ཅ། ཨོ་ཉེ་རང་གི་ནེ་བུ་ ཨ་ཤི་ཐམས་ཅན་རང་ ཉོང་པ༌ཅ། ཨོ་ཐེན་ཨ་ཉི་ ཨའི་ཤོ་ དཀོན་མཆོག་ག་ གཡོག་པ་གི་ལ་དག་ཉི་ ཁུངས་ཀེ༌བ།

11དབའི་ ཀོ་རིན་ཐི་པ་ ཇ་རོ་བ་ ཨ་ཤི་ན་ཧ་ཏཱན་ ཆཱས་ཐྲང་ཉི་ཡེག་པ༌ཅ། ཉི་ཨ་ཧ་སེམས་ཁེ་པ་ ན་ཧ་དེན་གེ་ཕེག་པ༌ཅ། 12ཨ་ཤི་ན་ཧ་དེན་གེ་ ཨ་ཧ་སེམས་མ་ཆོག་པཱན་ ཐ་ཝ་མཱན༌ཅ། དག་པ་ཀབ་ཉི་ ན་ཤི་ཨ་ཧ་དེན་གེ་ ན་ཧ་སེམས་མ་ཆོག་པཱན་ཐ་ན། 13ཇི་གི་ཇང་ཏེན་ག་ ཝག་ཙ་བ་ཀ་ ཡེག་པ་པུརུས་ཀིན་ཨ་ཉི་ ཇི་གི་ན་ཧ་བུ་ཡེག་ཅ་ ཨ་ཧ་དེན་གེ་ ན་ཧ་སེམས་ཆོག༌ཅོ༎

གསོན་པོ་ཨ༌ཉི་བཞུགས༌ཁཱན་ དཀོན༌མཆོག༌ག་མཆོད༌ཁང་།

14དད་པ་མ་ཨ་ཁཱན་བ་ཀབ་ཉི་ ངེ་ཤིང་ཏབ་ཐུར་མ་བང༌ཤོ། དྲང་པུ་དང་ངན་པ་ ཧང་ཏེན་ཆ་མེ་རེ་བེ་ཡ། ཉི་འོད་ཟེར་དང་མེར་བུ་ ཧང་ཏེན་ཏབ་ཐུར་ ཆོ་ལེ་རེ་བེ་ཡ། 15ཁིརིས་དང་ བདུད་ག་བར་ཀ་ ཏུན་ཆ་ཧང་ཏེན་ དྲིག་པེ་རེ་བེ་ཡ། ཉི་དད་པ་ཨ་ཁཱན་དང་ དད་པ་མ་ཨ་ཁཱན་ ཧང་ཏེན་ཆམ་ཉི་ ཆོ་ལེ་ཡ། 16དཀོན་མཆོག་ག་ མཆོད་ཁང་དང་སྐུ་ག་བ་ ཧང་ཏེན་ཆ་མེ་ཡ། ཧང་ཡ་དག་ནེ་ལ་ ཨའི་ཤོ་ གསོན་པོ་ཨ་ཉི་བཞུགས་ཁཱན་ དཀོན་མཆོག་ག་ མཆོད་ཁང་གི༌ལ། དཀོན་མཆོག་ རོག་ཏེན་གི་ གསུངས་མ་ཅ་

ཇང་རོག་ཏེ་བ་ཀ་པོང་ཀ་ཆོ་ལེ་ ཉི་རོག་ཏེ་བ་ཀ་པོང་ཀ་དང༌མེ། ཉི་ཇང་ཤོ་ རོག་ཏེ་བ་ཀ་ དཀོན་མཆོག་རི༌ལེ། ཉི་རོག་ཏེ་བ་ཤོ་ ཇ་ག་སོ་ངོ་རི༌ལེ།#6:16 ལེ་ཝི་ག་དཔེ་ཆ་ 26:12; ཡར་མི་ཡ་ག་དཔེ་ཆ་ 32:38; ཨི་ཇ་ཀི་ཨེལ་ག་དཔེ་ 37:27 17ཨོ་ཉི་ཨ་དེན་གེ་ རོག་ཏེ་བ་ཀ་ནང་ཀེ་ ཤོན་ཨོ་དོ། ཉི་ན་ཧ་བ་ རོག་ཏེ་བ་ཀེ་ སོ་སུ་ཨ་ཉི་ཆོའི་དག༌ཉི། གཙོ་བོ་གི་ གསུངས་མ་ཅ་ མ་ཙང་མ་ཆོ་ཁཱན་བ་ མ་ཐོབ༌ཅོ། ཉི་ཇི་གི་ ན་ཧ་བ་ཐོག༌པེ།#6:17 ཡ་ཤའི་ཡ་ག་དཔེ་ཆ་ 52:11; ཨི་ཇ་ཀི་ཨེལ་ག་དཔེ་ཆ་ 20:34,41 18ཉི་ཇང་ ན་ཧ་ཨ་པ་རི༌ལེ། ཉི་ན་ཧ་བ་ཤོ་ ཇ་ག་ཟ་དང་ ཟ་མིན་བ་རི་ལེ་དག་ཉི་ ཤུགས་སྟོབས་ཆོ་ཁཱན་ གཙོ་བོ་གི་གསུངས་མ༌ཅ།#6:18 2 ཤ་མུ་ཨེལ་ག་དཔེ་ཆ་ 7:14

Currently Selected:

གཉིད་པ་ཀོ་རིན་ཐི། 6: TNTB

Highlight

Copy