དང་པ་ཐེ་ས་ལོ་ནི་ཀི། 4

དཀོན་མཆོག་ ཐུགས༌ཀ་ཚུད༌ཁཱན་ཚེ།

1ཇུ་ཀ་དག་པ་ཀབ་ཉི་ ཨ་ཧ་ཡུང་ཟི་བ་ དཀོན་མཆོག་ཐུགས་ཀ་ཚུད་པ་ཨ་ཉི་ ཧང་ཏེན་ཆོ་ལེ་གི་ལ་སྨོ་ ན་ཤི་ ཨ་ཧ་བ་ཀེ་ལམ་པ༌ཅ། ཉི་ན་ཤི་ ཨུ་ཉུ་པུརུས་ཀིན་ ཨ་ཉི་རང་ཆོ་ཝ༌ཅ། ཉི་ཨོམ་ ཨ་ཤི་ ན་ཧ་ལ་སོ་སྐུ་ཆེ་ཨ་ཉི་ གཙོ་བོ་ཡི་ཤུ་ག་མཚན་ག་ ཨོ་ཉ་གེ་ལག་པ་ ཨའི་དག་ཉི་ཡེག༌ཅ། 2ཧང་ཡ་དག་ནེ་ལ་ ཨ་ཤི་ ན་ཧ་གཙོ་བོ་ཡི་ཤུ་ག་མཚན་ག་ དབང་ཚད་ག་ བཀའ་རྒྱ་བི་ཁཱན་ ན་ཤི་སེན༌ཅ།

3ནའི་དམ་པ་ཨ་ཉི་ཆོ་ལེ་ག་ དཀོན་མཆོག་ག་ ཐུགས་བཞེད༌ཅ། ཨུ་ཉུ་ཤོ་ ལུས་འབྲེལ་མ་ཙང་མ་གེ་སྤང་ཉི་ ཆོ་ལེ་ཁེ་ཝ་ཀོར་གེ་གི༌ལ། 4ཉི་ནའི་ཐམས་ཅན་ རང་རང་ས་ མེ་ཝག་ཙ་ཀབ་ཉི་ དམ་པ་དང་ གུས་ཞབས་ ཨ་ལེ་རུང་པ་ཨ་ཉི་ཆོ་ལེ་ག་ སེ་ལེ་ཁེ༌ལེ། 5དཀོན་མཆོག་གུམ་མ་ཡེ་ཁཱན་ སོ་ངོ་བ་ད་བུ་ བག་ཆགས་ཨ་ལེ་མང་གི། 6ཨོ་ཐ་ག་ཤེག་པ་ ན་ཧ་ཡི་ཤུ་པ་ ཡུང་ཟི་ཀབ་ཉི་ ནའི་ཐུར་གི་རང་ ལའི་ངཱད་པེ་ མ་གོད་ཅོ་ ཡང་ན་ལ་ ཁེབ་སང་ཤོ་ལེ་ མ་གོད༌ཅོ། ཨ་ཤི་གོ་མ་གེ་རང་ སྒྲིང་སྒྲིང་ཨ་ཉི་ ཡེག་པ་ཆོ་ཝ་ ཨུ་ཉུ་ད་བུ་ཨ་ཁཱན་ག་ གཙོ་བོ་གི་ ཁྲིམས་གནང་མེ་ན་དག༌ཉི། 7ཧང་ཡ་དག་ནེ་ལ་ དཀོན་མཆོག་གི་ ཨའི་མ་ཙང་མ་ཨ་ཉི་ཆོ་ལེ་ག་ ར་ཝ་མང་གི་ དག་པ་ཀབ་ཉི་ དམ་པ་ཨ་ཉི་ ཆོ་ལེ་ག་ར་ཝ་གི༌ལ། 8ཨོ་ཉི་ཨ་དེན་གེ་ ཨི་བི་གི་ གི་ནེ་བུ་ ཨོ་ཐ་ཡེ་ཁཱན་ མ་ལཱན་ཅ་གི་ལ་སྨོ་ སོ་ངོ་མང་གི་ཝ་ ན་ཧ་དམ་པའི་ཐུགས་ཉིད་གནང་ཁཱན་ དཀོན་མཆོག་ མ་ཞུན་ཅ་གི༌ལ༎

ཡུང་ཟི་ནང་དོ་ ཧང༌ཏེན་ཆོ༌ལེ་ཁེ༌ལེ་སྨོ།

9ཉི་ན་ཤི་ ཡི་ཤུ་པ་ནང་དོ་ ཕང་པེ་ཁེ་ཝ་ཀོར་གེ་ ཨ་ཤི་ ན་ཧ་འབྲི་བེ་མ་ཁེ༌ལ། ཧང་ཡ་དག་ནེ་ལ་ དཀོན་མཆོག་གི་ ནའི་ཐུར་གི་ཐུར་ག་ ཕང་པེ་ཁེ་ཝ་ཀོར་གེ་ ནའི་ནའི་ཏེན་ག་དེན་གེ་ ཡེ་ཉི་གནང་མ༌ཅ། 10མ་པ་ མ་ཀེ་དོ་ནི་ཡ་ག་ཆོ་ཁཱན་ ཡུང་ཟི་ཐམས་ཅན་ག་ ན་ཤི་ཨུ་ཉུ་ད་བུ་རང་ཨ་ན། དག་པ་ཀབ་ཉི་ ཡུང་ཟི་བ་ ཨ་ཤི་ ན་ཧ་ཨོ་ཉ་གེ་ལག་ཉི་ མང་པུ་ཨ་ཉི་ཨའི་དག་ཉི་ ཡེག༌ཅ།

11ཨ་ཤི་གོ་མ་ ན་ཧ་ཡེག་པ་པུརུས་ཀིན་ཨ་ཉི་ ན་ཧ་ཚེ་ག་ ཙང་ཀེན་ཆོ་ལེ་ག་ མིག་པ་ཕི། རང་ཏེན་ག་གུབ་ཀ་ ཁེ་ཝ་ལའི་ཨའི། ཉི་རང་ཏེན་ག་ག་དང་གི་ ལའི་ཨ་ཉི་ཟའི། 12ཨོ་ཐེན་ཨ་ཉི་ དད་པ་མ་ཨ་ཁཱན་བ་ཀེ་ ན་ཤི་གུས་ཞབས་ཉོང༌པེ། ཉི་ནའི་ ཧང་ཚཱས་ནེ་བུ་ བཱརའ་ག་ཏེན་མེ་མ་ཁེ༌ལ༎

གཙོ་བོ་བྱོན་མེ་ཀོར་གེ།

13ཨ་ཧ་ཡུང་ཟི་བ་ ཡི་ཤུ་པ་ཤི་ཁཱན་བ་ཀ་དེན་གེ་ ན་ཤི་སེན་ཆེན་དག་ཉི་ ཨ་ཧ་སེམས༌ཅ། ཧང་ཡ་དག་ནེ་ལ་ རེ་ཝ་མ་ཁཱན་ སོ་ངོ་བ་ད་བུ་ཨ་ཉི་ ནའི་སེམས་ མ་ཤིན་ཆེན་དག་པ་གི་གི༌ལ། 14ཨ་ཤི་དད་པ་ཨན་ཅ་ ཡི་ཤུ་གཤགས་ཐཱན་ ལོག་ཉི་བཞེངས་པ་གི་ལ་དག༌ཉི། ཉི་ཨུ་ཉུ་པུརུས་ཀིན་ཨ་ཉི་ གཙོ་བོ་ཡི་ཤུ་ག་ དད་པ་ཨན་ཐཱན་ ཤི་ཁཱན་བ་བུ་ དཀོན་མཆོག་གི་ ཡི་ཤུ་ཀབ་ཉི་ ལོག་ཉི་བསྣམས་པེ་གི༌ལ། 15ཨ་ཤི་ཨོ་མ་ ན་ཧ་ཡེག་ཁཱན་ཁེ་པ་ གཙོ་བོ་ག་གསུང་གི༌ལ། གཙོ་བོ་བྱོན་མ་ཀབ་ཉི་ ཨའི་མ་ཤི་ཝ་ཨ་ཉི་ཆོ་ཁཱན་བ་ ཤི་ཁཱན་བ་ཀེ་ གོ་མ་མ་དི༌ལ། 16གཙོ་བོ་ རོག་ཏེན་བྱོན་མ་ཀབ་ཉི་ ཞིང་ཁམས་གེ་དོང་ གསུང་སྐད་ཤུག་ཅཱན་ཨ་ཉི་ བཀའ་རྒྱ་གནང༌མེ། ཞིང་ཁམས་ག་འཐེན་པ་ག་ གསུང་སྐད་དང་ དཀོན་མཆོག་ག་ དམག་དུང་ཐེད་ཉི་བྱོན༌མེ། ཉི་ཁིརིས་ག་ དད་པ་ཀེན་ཐཱན་ ཤི་ཁཱན་བ་གོ་མ་ཝུ༌ལེ། 17ཉི་ཤ་ རོག་བྱོན་མེ་གང་ཀ་ ཨའི་མ་ཤི་ཝ་ཨ་ཉི་ཆོ་ཁཱན་བ་ ངམ་ཐུང་ཀ་ གཙོ་བོ་མཇལ་བེ་དེན་གེ་ མུག་པ་ག་ རོག་ཏེ་བ་ཀབ་ཉི་དུང་ཉི་བསྣམས༌པེ། ཉི་གེ་ ཨའི་དུས་ཏ་བུ་རང་ གཙོ་བོ་ཀབ་ཉི་ཆོ་ལེ་གི༌ལ། 18ཨོ་ཉི་ཨ་དེན་གེ་ ཨོ་ཐ་གསུང་གི་ཨ་ཉི་ ཐུར་གི་ཐུར་ག་ སེམས་གསོ་ཨའི༎

Currently Selected:

དང་པ་ཐེ་ས་ལོ་ནི་ཀི། 4: TNTB

Highlight

Copy